٩٠٠ بووك و زاڤا د شەهیانا ب كۆم دا ل پارێزگەها دهۆكێ دێ پشكداربن
دهۆك، دلۆڤان ئاكرەیی:
بەرپرسێ رێكخراوێن جەماوەری و پیشەیی ل مەكتەبا رێكخستنا پارتی ل دهۆكێ دیاركر، ب هەلكەفتا 80 سالیا دامەزراندنا پارتی و ب پشتەڤانیا فەرماندە مەنسور بارزانی ئامادەكاریێن شاهیانا ب كۆم ل پارێزگەها دهۆكێ د قووناغێن دووماهیێ دایە و دێ دەست ب بەلاڤكرنا گەرا ئێكێ یا پێشینەیێ ل سەر بووك و زاڤایان كەن، كو هەژمارەیا وان 450 كەسن و ب گشتی هەژمارەیا وان دبیتە 900 بووك و زاڤایانە.
شەمدین سلێڤانەیی، بەرپرسێ رێكخراوێن جەماوەری و پیشەیی ل مەكتەبا رێكخستنا پارتی ل پارێزگەها دهۆكێ بۆ رۆژنامەیا ئەڤرۆ گۆت: «هژمارەیا بووك و زاڤایان 900 كەسن، د گەرا ئێكێ دا پێنج ملیۆن دینار، وەكو هاریكاری ل سەر بووك و زاڤایان دێ هێنە بەلاڤكرن، پشتی دەمەكێ دی دێ گەرا دویێ، كو هەر پێنج ملیۆن دینارن ل سەر بووك و زاڤایان دێ هێنە بەلاڤكرن، زێدەباری چەندین هاریكاریێن دی بۆ ب رێڤەبڕنا ئاهەنگێ كو دێ پێشكێشی بووك و زاڤایان هێنە كرن».
گۆت ژی: «د ڤێ پرۆسێ دا پشكا سنۆرێ لقێ ئێك یێ پارتی ل دهۆكێ 150 كەسن، ل سنۆرێ لقێن هەشت و نەه ل زاخۆ و ئاكرێ بۆ هەر لقەكێ 90 كەسن، ل سنۆرێ لقێ شێخان و ئامێدیێ ژی بۆ هەر لقەكێ 60 كەسن، كو سەرجەمێ وان دبیتە 900 كوڕ و كچ، یێن كو ناڤێن وان د پشككێشانێ دا دەركەفتین، زێدەباری 80 كوڕ و كچێن شەهیدان، دیسا چەندین ناڤێن دی بێی هەستا حزبی ناڤێن وان هاتینە هەلبژارتن و دێ هاریكاریا هەمیان بێ جوداهی دێ هێتە كرن».
