پاداشت نامق: گرنگی ب یاریێن گۆرهپانێ نا هێته دان
ئهڤرۆ، ههولێر: سولین سلێمان
د دیدارهكێ دا یاریزانا یاریێن گۆرهپانێ و یانا سیروانی نوو پاداشت نامق بۆ رۆژناما ئهڤرۆ دیاركر ئهو بهرههڤیان بۆ قارهمانیێن داهاتی یێن ههرێمێ و ئیراقێ دكهت لێ مخابن چو گرنگی بۆ ڤێ یاریێ نا هێته دان.
زێدهتر ناڤهاتی ئهوچهنده ژی گۆت: سهرباری قوتابیا كۆلیژا وهرزشی مه و گههشتیمه قۆناغا سێیێ كو ئهڤچهنده بوویه پالدهر راهێنانێن خوه بهردهوامبم و باشترین شێوه بۆ ههر قارهمانیهكێ بهرههڤبم و زێدهباری یاریزانا یاریێن گۆرهپانێ یا یانا سیروانی نوو ههروهسان بۆ یاریا فوتسالێ ژی من پشكداری كرینه و ژ تیمێن ههڤڕك بووین د خولێ دا، لێ مخابن بۆ یاریا گۆرهپانێ تایبهت یا هاڤێتنا رومی گرنگیهكا كێم بۆ دهێته دان بهروڤاژی یاریێن دی كو جواهیهكا مهزن دناڤبهرا وان دا ههیه ژلایێ پشتهڤانیێ ڤه.
ژلایهكێ دووڤه پاداشت یا 22 سالی دیاركر بهری نوكه پشكداری چار قارهمانیێن ئیراقێ كرینه و رێزێن دویێ و سێیێ ب دهستڤه ئیناینه لێ نهبوونا یاریگههێن تایبهت ڕێگریێ د ئهنجامدانا راهێنانان دكهت تایبهت ژبلی یا كولیژێ و ئهو یاریگهها ئهم دچینه راهێنانان رێكا وێ یا دووره و دهم پێ دڤێت لهورا هیڤییا من ئهوه ژ لایهنێن پهیوهندیدار ئهڤێ ئاریشێ چارهسهربكهن و گۆت: سۆپاسیا خێزانا خوه و مامۆستایێن كۆلیژێ كو گهلهك هاریكار و پشتهڤان بووینه ههتا بگههمه ئهڤێ ئاستێ بلند و دێ بهردهوامبم ههتا بگههمه ئارمانجا خوه كو پشكداری قارهمانیێن نێڤدهولهتی ژی بكهم.