پتریا جـاران لـەنگـیا زارۆیان ب خـوە چـارەسـەر دبیت
بەرپەرێ ساخلەمیێ:
د. عەبدوللا نەبی سالح، تایبەتمەندێ نەخۆشیێن هەستی و شكەستنان دیاركر كو سێ ئەگەرێن سەرەكی بۆ لەنگیا زارۆیان، ئەوژی دەڤەرا قوقلكێ و چوك و گوزەكا پێی و ب تایبەت دەمێ كارتێكرن ل قوقلكا پێی دبیت و گۆت: ل دەڤ هندەك زارۆیان زڤرین دكەڤیتە ئالیێ خوارێ و دبیتە ئەگەر پێن زارۆیان وەكو كڤانان دیارببن، ل وی دەمی ئەم پێدڤی ب گرتنا تیشكەكێ دبین دا تەئكید ببیت كو چ ئەگەرێن دیتر نینن ژبلی نەدروستیا گوشا سروشتی ل هەستیێ رانی، دەربارەی چارەسەریا لەنگی و خواربوونا پێیان ژی ئەوا ژ ئەنجامێ نەدروستیا قوقلكێ پەیدادبن هەلبەت دپتریا دەمان دا چارەسەریا پاراستنا زارۆی دهێتە كرن و دۆرێن 90% پشتی گرێدانا قاییشێ یان ب كارئینانا حەفازا یان بۆرینا چەند هەیڤان بخوە چارەدبن، هندەك جارا هندەك حالەتێن سڤك هەنە كو پێدڤی ب نشتەرگەریێ دبن.
د. عەبدوللا نەبی دیاركر دەمێ چوك و گوزەكا پێی ئەگەرێن لەنگینێ بن، ل وی دەمێ پێن زارۆی دێ بۆ ژناڤدا هێنە وەرگێران و گۆت: رەنگە ئەڤ چەندە بێی ئەگەر ژی پەیداببیت یانژی ژ ئەنجامێ بێهێزیا هەستیان یان ئەگەرەكێ زكماكی بیت، ئەڤ خواربوونە دبیتە ئەگەر كو زارۆ خوار برێڤەبچیت.
تایبەتمەندێ نەخۆشیێن هەستیان و شكەستنێ ئەوژی دیاركر كو ل وی دەمی دڤێت تیشكەك بۆ پێن وی بهێتە گرتن دا ل هندەك ئەگەرێن دیتر ژی بگەریێن وەكو نەخۆشیا كساحێ (نەرمە هەستی) یان هەبوونا وەرەمەكێ دهەستیێن پێن وی دا، هەروەسا دڤێت ب شێوەیەكێ رێكخستی پشكنینا وی بهێتە كرن داكو پشت راست بین كو ل گەل بۆرینا دەمێ زێدەنابیت.
هەروەسا دیاركر ژی كو دپتریا دەمان دا ژی ل گەل بورینا دەمی ئەڤ حالەتە ب خوە چارەدبن، بەلێ هندەك جارا دەما مەزن دبن رەوشا وان خرابتر لێ دهێت و كارتێكرنەكا خرابتر ل سەر رێڤەچوونێ دكەت، لەورا دبیت ئەو پێدڤی ب نشتەرگەریەكێ بیت بۆ كورتكرنا هەستێ پێی ل سەر گوزەكێ، داكو زڤینا خوە یا سروشتی وەرگریت و هەڤسەنگی بكەڤیتە پێن وی و ل گەل ڤێ چەندێ هەستی دێ هێنە جێگیركرن، بەلێ ئەڤ چەندە گەلەك یا كێمە و روودانا وێ تشتەكێ دەگمەنە كو هەردو پێ پێكڤە ب لەنگن و خوارببن و هەكە هەبن ژی ل گەل بۆرنیا دەمی چارەدبن و كێم جارا پێدڤی ب نشتەرگەریێ دبن.
د. عەبدوللا نەبی گۆتژی: ئاریشێن پێیان ژی هندەك جارا دبنە ئەگەر زارۆ ب لەنگیت و ژوان ئاریشەیان ژی هێزبوونا زەڤلەكێن پێی كو دبیتە ئەگەر تل مەزن ببن و خار ببن ئەڤەژی تا رادەیەكی ئالوزیێ بۆ دایك و بابان پەیدادكەن و ئەڤ ئاریشە ژی پتریا وان یێن قنێتینە و ل گەل زارۆبوونێ پەیدادبن و دبنە ئەگەرێ لەنگینێ، ئەڤە گەلەك جارا ب رێیا راهێنانا و چارەسەریا سروشتی مفای دبینن.
