پتریا زارۆیێن ل سەر جادا کار دکەن تووشی دەست درێژیا سکسی دبن
ئه‌ڤرۆ نيوز:
ماموستایەکێ زانکویێ دا زانین، ژ ئاریشَین گەلەک مەترسیدار و ھەستیار کو توشی زارۆیی دبن ل دەمێ کارکرنێ لسەر جادا چو کوڕ یان کچ تەحەروش و دەستدریژیا سکسی یە و گۆت: ئەڤجا دڤێت ئاسایشا دەروونی یا زارۆیی بھێتە پاراستن و پیتە ب مافێ وی بھێتە دان چونکی دەستدریژیا ل سەر زارۆیی ئێکە ژ گرفتین دەروونی کو دبیتە ئەگەرێ کارتیکرنەکا نەرێنی ل سەر پاشە روژا زارویی وەکو ھەستکرن ب کێماسێی و خەموکی و نیگەرانیا بەردەوام.
زاخۆ,ھشیار دوبانکی:
چالاکڤان دبوارێ چڤاکی دا ھەسن عومەر ئەشکەرا کر، باوەری نەمان ب پروسا خواندنێ و نەگرنگی دانا دایک و بابا و پەیرەو نەکرنا یاسایێن تایبەت ب کارکرنا زارویی ژلایێ دەستھەلاتێ ڤە و ھەبوونا ڤێ ھزرێ کو دڤێت زارو ھەر ژ زاروکینیا خوە فێری کارکرنێ ببیت و باوەری بخوە ھەبیت و ھەژاریا خیزانی ئەڤە ھەموو دبنە ئەگەر کو زارۆ لسەر جادە و ناڤ کولانا کار بکەت.
ماموستایێ زانکویا زاخۆ پشکا دەروونناسیێ نزار عسمەت دیار کر، ھەلبەت کارکرنا زارۆیی ل سەر جادا یا بەربەلاڤە دگەلەک کومەلگەھا دا و بتایبەت دجڤاکێ مە دا و ئەگەرێن ڤێ دیاردێ ژی ئەڤەنە کو ھەر تاکە کەسەک ھەلگرێ غەریزێن بایلوجیە، لەورا تاک پێکولێ دکەت ڤان پێداویستیێن بایلوجی تێر بکەت ب رێکێن جودا جودا و گۆت: لێ فاکتەرێن سەرەکی پشت گوە ھاڤێتنا زارۆیانە ژلایێ دایک و باباڤە کو ئەڤە کارتیکرنەکا نەرێنی لسەر گەشەکرن و ھەلچون و رەفتار و کەسایەتیا زارویی دکەت ژبەرکو ئەگەرێ سەرەکی یێ ئاریشێن دەروونی پشتگوە ھاڤیتنە و کارکرنا زارویی لسەر جادا دبیتە ئەگەرێ پەیدابونا گرفت و تێکچونێن دەروونی و لەشی و کەسایەتیا زارویی ب شیوەکێ گشتی. دو بۆ تێرکرنا یێدڤێت زارویی خێزان پیدڤی ب داھاتیەکێ یە ھەکە بارێ وان یێ ئابوری یێ لاواز بیت دایک و باب نەچار دبن زارۆیێن خوە فرێکەنە کاری .
ھەسنی بەحس لڤێ چەندێ ژی کر، دەرکەفتنا زارویا و ڤەقەتیانا وان ژ خێزانی و قوتابخانێ بۆ ماوەیێن دریژ و مانا وان لسەر جادە و کولانا رەنگڤەدانێن نێگەتیف ژێ پەیدا دبن وەکو بکارئینانا مادێن بێھوشکەر لسەر ئالودە دببن ھەروەسا دبنە کەرەستەکێ ئاسان کو گروپێن دەرڤەی یاسایێ ژبو مەرەمێن خوە بکار بینن و دئەنجام دا ببن بەشەک ژ پێلانین وان و گۆت: ڤەقەتیا زارۆیی ژ مالێ دبیتە نێجیرەکا بساناھی کو بھێتە سەردا برن وکارین خراب دگەل بھێنە کرن و فیری گوتن و کار و زاراڤین پەککەفتی ببن وەکی زورداریێ ھەر وەکو زورداری لێ ھاتیە کرن و دوور دکەڤن ژ تیکەلێین جڤاکی و حەز دکەن بتنی بمینن و فیری خازوکیێ دبن.
نزار ئەو ماموستایێ زانکویێ ھندەک چارەسەریان پشنیاز دکەت و ڤان لایەنان بەرپرس دبینیت ل ھەمبەر ڤێ دیاردێ و دبێژیت: خیزان و حکومەت و رێکخراوێن مافێ مروڤی و بتایبەت مافێ زارۆیان بەرپرسیارن ژ کارکرنا زارۆیی لسەر جاددا لێ بەری ھەموویان خێزان ژبەرکو خێزان لایەنێ سەرکی یێ تێرکرنا پێداویستێن زارۆیی دھێتە ھژمارتن پاشان حکومەت و رێکخراو بەرپسیارن ژ نەھیلانا دیاردا کارکرنێ ل سەر جاددا، لەوا پێدڤیە حکومەت داھاتەکێ بۆ زارۆیی دابین بکەت ھەر ژ دەستپێکا ژدایک بونا وی تا مەزن دبیت ئەڤە مافێ زارۆیی یە و دڤێت گگرنگی ب زارۆیی بھێتە دان ، ژبەرکو گرنگی دان ب زارویی دبیتە فاکتەرێ سەرەکی یێ ئاڤاکرنا جڤاکەک ساخلەم و سەرکەفتی.