پتریا قوربانیێن تاوانێن ئەلكترونی ئافرەتن
ئەڤرۆ
ل گەل پەیدابونا سوشیال میدیایێ و تورێن جڤاكی رەشهنێریا ئەلكترونی د جڤاكی دا پەیدا بویە و پتریا كەسێن دبنە قوربانیێن ڤان جورە تاوانا ئافرەتن دەمێ كور سوزا هەڤژینیێ ددەتە كچێ و باوەریێ بو چێدكەت حەتا وێنە و ڤیدیویێن خوە بو فرێدكەت و پاشی گەفێن بەلاڤكرنا وان لێدكەت بەرامبەر زێر و پارا یان ل گەل دەركەفتن و خوە ب دەستڤە بەردان.
د. ئاواز حەجی جەعفەر چارەسەركارا دەروونی بو روژناما ئەڤرۆ دیار كر كو
دەمێ تەكنولوجیا هاتیە د جڤاكی دا ئەم د بەرهەڤ نەبوین بو ڤێ پێشكەفتنێ و گۆت: (ئەنترنێتێ وەكو پێلەكێ ب سەر مە داگرت و ب شێوەكێ بێ سنور كەفتە دەستێ هەموو چینێن جڤاكی و هەر ئێك ژ مە لدووڤ تێگەهشتنا خوە سەرەدەری ل گەلدا كر و تیك توكی و فێسبوكی تاكێن مە پەروەردە كرن، ژبەرهندێ ئەم كەفتینە دناڤ ڤان جورە تاوانادا و رەشهنێریا ئەلكترونی زێدەبو.)
ژلایێ یاسایی ڤە پارێزەر ئەیاد سەعدی دیار كر كو تاوانا رەشهنێریا ئەلكترونی روژ بو روژێ بەر ب زێدەبونێ یە و لدووڤ وان ئامارێت بەر دەست ژ حالەتان یا بەر ب دیاردێ ڤە دچیت و گۆت: ئەڤە دیاردەكا مەترسیدارە دڤێت رێگری لێ بهێتەكرن چ ب رێكا هشیاریا جڤاكی بیت یان ب رێكێن یاسایی بیت).
پارێزەری گۆتژی: (د یاسایا ژمارە 6 دا یا سالا 2008 د بەندێ 2 دا هاتیە دیار كرن كو هەر كەسێ تاوانەكا ئەلكترونی ئەنجام ددەت چ گەفكرن بیت یان بەلاڤكرنا وێنە و دەنگ و ڤیدیو و پێزانینێن تایبەت یێن كەسەكی بن دێ هێتە دادگەه كرن و سزادان ب گرتن كو ژ شەش هەیڤا كێمتر نەبیت و ژ پێنج سالا زێدەتر نەبیت و غرامە كرن كو ژ ملیونەكێ كێمتر نەبیت و ژ پێنج ملیونا زێدەتر نەبیت یان ژی ئێك ژ ڤان هەردو سزایان كو لدووڤ جورێ تاوانێ دهێتە دەست نیشانكرن).
د. ئاوازێ دیار كر ژی دەمێ كچ تووشی ئاریشەكا هوسا دبیت بێگومان كارتێكرن ل دەروونێ وێ دبیت و ژبەر ترسا جڤاكی و خێزانێ و دەوروربەرا نەوێریت باخڤیت و هزرا خوە كوشتنێ دكەت و ئەڤە نە چارەسەریە و گۆت: (هەكە كچ تووشی ئاریشەكا ب ڤی رەنگی بو باشترە خێزانا خوە ئاگەهدار بكەت و ب رێكێن یاسایی سەرەدەریێ ل گەل بكەن دا ئەڤ جورە كەسە ب گەهنە سزایێ خوە).
ژلایەكێ دیڤە مقەدم شڤان عسمان رێڤەبەرێ رێڤەبەریا بەرهنگاربونا توندوتیژیێ دژی ئافرەتان ل زاخۆ دیار كر كو رەشهنێریا ئەلكترونی دیاردەكا بەربەلاڤە ل هەموو جیهانێ و ل ڤێ دووماهیێ جڤاكێ مە ژی ڤەگرتیە و رێژەكا زور ژ رەگەزێ مێ ب رێژا زورینە تووشی ڤان ئاریشان دبن و گۆت: (ل دەمێ كور سوزا ئەڤینیا بەردەوام و هەڤژینیێ ددەتە كچێ حەتا هندەك وێنە و ڤیدیویێن بێ ستارە بو دهنێریت و بو وی دبیتە دەلیڤە گەفا ل ڤێ كچێ بكەت و داخازا كوژمێن پارەی یان ژی دەركەفتن و بابەتێن سكسی ژێ بكەت و كچێ بێخیتە د رەوشەكا دەروونی یا خراب دا و كچێ نەچار بكەت داخازیێن وی بجه بینیت یان دێ وێنێت وێ بەلاڤ كەت و شەرمزار كەت).
مقەدمی گوتژی: (جاران هندەك تاوانێت دی ژ ڤی حالەتی و ژ ڤێ گەفكرنێ چێدبن، دەمێ كچ بزاڤێ دكەت خوە ژ گەفێن ڤی كوری خلاس بكەت دێ رابیت پارەی یان زێرا ژ مال دزیت و وێ گاڤێ كچ دهێتە گونەهباركرن ب تاوانا دزیێ ژی ).
د. ئاوازێ ئەو چەندە ژی گۆت: (دڤێت كچ یا ب عاقل بیت و باوەریا خوە ب هەموو كەسان نەئینیت و حەتا دناڤا تورێن جڤاكی دا هەڤالینیا چ كەسا نەكەت هەكە یێ باوەریێ نەبیت و بزانیت كور وێ كچێ بوخوە نا خوازیت ئەوا ل گەل دەركەڤیت و دەمێ خوە ل گەل ببورینیت).
