پتری سێ سالانه مه‌زنترین پاركا زاخۆ ب تنێ به‌رێ بنیاتی یه
ئه‌ڤرۆ، ئه‌میر ئه‌ترووشی:
پتری پێنچ سالانه، به‌رێ بنیاتی بۆ مه‌زنترین چێكرنا مه‌زنترین پارك ل زاخۆ هاتیه دانان، به‌لێ ژ به‌ر نه‌بوونا پارێ پێدڤی هه‌تا نوكه پارك نه‌هاتیه چێكرن و جهێ پاركێ ژی ژ ئالیێ خه‌لكێ ده‌ڤه‌رێ ڤه بوویه جهێ هاڤێتنا گلێشی و باژێرڤانیا زاخۆ ژی دبێژیت: چێكرنا پاركێ د پلانێ دایه، به‌لێ پاره بۆ جێبه‌جێكرنا پرۆژه‌ی نه‌هاتیه ته‌رخانكرن.
پتری پێنچ سالانه، بۆ جارا ئێكێ به‌رێ بنیاتی بۆ دانانا پرۆژه‌یه‌كێ مه‌زن ب ناڤێ پاركا زاخۆ هاتیه دانان، به‌لێ ژ به‌ر نه‌بوونا پارێ پێدڤی هه‌تا نوكه پارك نه‌هاتیه چێكرن، خه‌لكێ ده‌ڤه‌رێ گله‌یا نه‌بوون و كێمیا پاركا ل قه‌زا زاخۆ دكه‌ن، باژێرڤانی ژی نها زێده‌تر گرنگیێ دده‌ته چێكرنا جاده و كۆلانا و پرۆژه‌یێن خزمه‌تگۆزاری.
ئه‌ندازیار وه‌لات سه‌عدی، سه‌رۆكێ باژێرڤانیا زاخۆ بۆ رۆژناما ئه‌ڤرۆ دیار كر، ئه‌و پاركه بریار بوو ل تلكه‌به‌رێ ل سه‌ر پێشینه‌یا هه‌یڤانه بهێته چێكرن و پێدڤی ب كۆژمێ نێزیكی هه‌شت ملیار دینارابوو، به‌لێ ژ به‌ر تێكچوونا ره‌وشا ئابووری ل هه‌رێما كوردستانێ و گرنگیدان ب چێكرنا جاده‌یێن ناڤخۆ یێن ده‌ڤه‌رێ و پرۆژه‌یێن خزمه‌تگۆزاری، ئه‌و پرۆژه هاتیه راگرتن.
خویاژی كر، ئه‌نجامدانا پرۆژه‌یێن چێكرنا جاده‌یێن ناڤخۆ یێن ده‌ڤه‌رێ و پرۆژه‌یێن خزمه‌تگۆزاری، نها پتر گرنگی پێ دهێته دان، چونكو نه‌یا به‌رئاقله به‌رده‌روكێن خه‌لكی ئاخ و تۆز و ته‌قن بن و پارك بهێنه چێكرن، نها حۆكمه‌تا هه‌رێمێ ژی ژ به‌ر قه‌یرانا دارایی، شیانێن مه‌زاختنا پاره‌یه‌كێ مه‌زن ب ڤی كۆژمێ هه‌شت ملیار دیناران نینه بۆ چێكرنا پاركه‌كێ، له‌وما مه كریه د پلانێ دا و دێ هه‌ر هێته جێبه‌جێكرن.
ئه‌ندازیار وه‌لات سه‌عدی، سه‌رۆكێ باژێرڤانیا زاخۆ بۆ رۆژناما ئه‌ڤرۆ دیار كر، خه‌لكی نها به‌رمایكێن خوه دهاڤێژنه جهێ وێ پاركێ و مه چه‌ندین جاران ژی پاقژكریه و پێدڤی ناكه‌ت خه‌لكی ڤێ كریارا شاش بكه‌ن و جهێن تایبه‌ت بۆ هاڤێتنا گلێشی هه‌نه.
