پتر ژ 700 جۆرێن جگاران و 100 قالكێن شخارتان د مالا خوه دا پاراستینه
دهۆك، شاكر ئه‌تروشی:
كه‌سێ دوێنه‌ی دا دیار بۆ ده‌مێ پتر ژچل و پێنج سالانه ئاره‌زویا كۆمكرنا پاكیتێن جگاران، هه‌روه‌سا قالكێن شخارتان هه‌یه و ژۆره‌كا مالا خوه بۆ پاراستنا وان ته‌رخانكریه و تشتێ سه‌یر ئه‌وه هه‌تا نوكه وی بخو جگاره نه‌كێشاینه و ناهێلیت كه‌س دمالا وی ڤه بكێشیت ژی.
حه‌جی محه‌مه‌د سالح، كو ب حه‌جی دێرگژنیكی یێ به‌رنیاسه، د دیداره‌كێ دا بۆ رۆژناما ئه‌ڤرۆ گۆت: ل سالا 1977 ئاره‌زویا ئه‌ڤ حه‌زه ل ده‌ف من هه‌بوو، له‌ورا چه‌ند ئه‌ز چوو بامه بازاری دا چمه دوكانێن وان و هه‌ر جۆره‌كێ نوو هاتبا دا پاكیته‌كێ ژێ كڕم و ئینامه مال پارێزم، هه‌تا به‌ری ئه‌نفالان ئه‌ز شیام هژماره‌كا زۆرا پاكیتان خرڤه‌كه‌م، لێ ل ئه‌نفالێ خانیێن مه خراب كرن ئه‌و پاكیته هه‌موو مانه دبن ئاڤاهی ڤه و ژ ناڤچوون، لێ پشتی سه‌رهلدانێ جاره‌كادی من ده‌ستپێكر و هنده‌ك ب كڕین و هنده‌ك ژی ب دیاری من كۆمكرن و نوكه ژی ده‌مێ هنده‌ك هه‌ڤالێن من ژ ده‌رڤه‌ی وه‌لاتی دهێن چه‌ند جۆرێن پاكیتێن جگاران بۆ من دئیینن و ئه‌ز دشێم بێژم من جگارێن پتریا وه‌لاتان دمالا خوه دا هه‌نه و نوكه هژمارا وان دگه‌هیته پتر ژ 700 جۆرێن جگاران و 100 قالكێن شخارتان من هه‌نه، بۆ زانین ژی ئه‌ز بخوه نه‌جگاركێشم و ناهێلم كه‌س دمالا من دا جگارا بكێشیت، هه‌روه‌سا جگاره و شخارتێن خوه نه ب فرۆتن نه ب دیاری ناده‌مه كه‌سێ.
