پرا چه‌مه‌ی هاته ڤه‌كرن
ئه‌ڤرۆ:
پرا جۆتساید یا چه‌مه‌ی كو ب درێژترین پر ل سه‌ر ئاستێ هه‌رێما كوردستانێ دهێته هه‌ژمارتن و هه‌ردو پارێزگه‌هێن دهۆك و هه‌ولێرێ پێكڤه گرێ دده‌ت، ب ره‌نگه‌كێ فه‌رمی هاته ڤه‌كرن و وه‌زیرێ ئاڤه‌دانكرنێ ژی د رێوره‌سمێن ڤه‌كرنا وێ دا گۆت: مه‌ره‌ما حوكمه‌تا هه‌رێما كوردستانێ و وه‌زاره‌تا ئاڤه‌دانكرنێ ئه‌وه كو رێیێن سلامه‌ت بۆ وه‌لاتیان دابین بكه‌ن.
دوهی 16/11/2021 ب به‌رهه‌ڤبوونا دانا عه‌بدولكه‌ریم، وه‌زیرێ ئاڤه‌دانكرن و ئاكنجیكرنێ ل حوكمه‌تا هه‌رێما كوردستانتێ و پارێزگارێ هه‌ولێرێ و جێگرێ پارێزگارێ دهۆكێ، ب ره‌نگه‌كێ فه‌رمی پرا جۆتساید یا چه‌مه‌ی هاته ڤه‌كرن.
عه‌بدولكه‌ریم، وه‌زیرێ ئاڤه‌دانكرن و ئاكنجیكرنێ د رێوره‌سمێن ڤه‌كرنا وێ دا په‌یڤه‌ك پێشكێش كر و گۆت: “رێ و رێبار گرنگترین ژێرخانا ئابووری نه، له‌و مه‌ره‌ما حوكمه‌تا هه‌رێما كوردستانێ و وه‌زاره‌تا ئاڤه‌دانكرنێ ئه‌وه كو رێیێن سلامه‌ت بۆ وه‌لاتیان دابین بكه‌ن، ئه‌ڤ پرۆژه‌یه ئێك ژ پرۆژێن ستراتیژی یێن وه‌زاره‌تا ئاڤه‌دانكرنێ نه و دێ ره‌نگڤه‌دانه‌كا ئه‌رێنی ژ لایێ ئابووری و هاتنوچوونا سلامه‌ت و بازرگانی و ڤه‌گوهاستنا كه‌لوپه‌لان بۆ هه‌رێما كوردستانێ ب گشتی هه‌بیت”.
درێژاهیا پرا جۆتساید یا چه‌مه‌ی 928 مه‌ترن و فره‌هیا هه‌ر سایده‌كی 15 مه‌ترن و ب گوژمێ 43 ملیار دیناران هاتیه دانان.
