پرتووكخانەیا 16ی تەباخێ ل زاخۆ هاتە ڤەكرن
زاخۆ، دلۆڤان هالۆ:
د. نازدار عارف، بەرپرسا پشكا ڕەوشەنبیری و ڕاگەهاندن و پێگەهاندنا لقێ هەشت یێ پارتی ل زاخۆ بۆ ڕۆژناما ئەڤرۆ دیاركر، ب ئامادەبوونا عومەر ئۆرەی، بەرپرسێ لقێ هەشت یێ پارتی ل زاخۆ، پرتووكخانەك بناڤێ 16ی تەباخێ ل بارەگایێ لقێ هاتە ڤەكرن.
ناڤهاتیێ ئاماژە ب وێ چەندێ ژی كر كو نێزیكی چار هزار و 500 پرتووكێن هەمەجۆر ل ڤێ پرتووكخانەیێ هاتینە دانان و گۆت: «ئارمانج ژ ڤەكرنا ڤێ پرتووكخانێ ئەوە، كادرێن مە مفای ژ خواندنا ڤان پرتووكان وەربگرن، دەمەكێ تایبەت ژ بۆ خواندنا پرتووكان تەرخان بكەن، چونكی پرتووك نێزیكترین هەڤالە بۆ مرۆڤی».
گۆت ژی: «زێدەباری ستاف و كادرێن لقێ هەشت، دەرگەهێ ڤێ پرتووكخانێ بۆ كادر و ڕێكخستیێن مە ل سەر ئاستێ هەر 12 لیژنەیان و قوتابیێن زانكۆ و پەیمانگەهان ژی دێ یێ ڤەكری بیت، ئەم سوپاسیا پەرپرسێ لقێ هەشت دكەین، كو گەلەك هاریكار و پشتەڤان بوو، بۆ ڤەكرنا ڤێ پەرتووكخانێ و پتر ژ 250 پرتووك ژ پرتووكخانەیا خوە یا تایبەت وەكو دیاری پێشكێشی ڤێ پرتووكخانێ كرینە».
زێدەتر گۆت:»پرتووكێن دیجیتالی ژی ب شێوەیێ پی دی ئێف ل ڤێ پرتووكخانێ دێ هێنە زێدەكرن، دیسا د پلانا مە دایە، ڕوونشتنێن تایبەت ل دۆر پرتووكان ل ڤێ پرتووكخانەیێ بهێنە ئەنجامدان، وەكو گەنگەشەكرن ل سەر ناڤەڕۆك و كورتكرنا پرتووكان».
