پرۆژەیێ مەزنبوونا تورکیا
هۆشەنگ تاجر
هەتا نها ژی بەرپرسێن تورکیا نەگۆتینە قووناغا ئاشتیێ، ئەو هەردەم دبێژن قووناغا تورکیا بێ تیرۆر، ئانکۆ ب کورتی ئەو دبێژن هێزەکا تیرۆرستی شەڕێ مە دکر و دێ تورکیا ژ وێ هێزێ پاقژ کەین و مخابن ب رەنگەکێ راستەوخوە بیت یان ژی نە ئالیێ دی ئەو یەک قەبوول کریە و ژ بەر ڤێ یەکێ ژی نها بەرپرسێن تورکیا شێوەیێ ئاخڤتنێن خوە گوهۆڕینە و بەحسێ تشتەکێ دی دکەن.
ئەردۆغان و هەڤالێن وی هەر بەحسێ پرسا کوردی ناکەن، ئانکۆ ئەو نابێژن دێ پرسا کوردی چارەسەرژی کەن، بەلکو دەم پارتی و قەندیل تشتەک وەسا دبێژن و ل ئالیێ دی چەند رۆژن ئەردۆغان بەحسێ ڤێ یەکێ دکەت کو چو ئاستەنگی ل هەمبەر پێشڤەچوونا تورکیا نەماینە و دێ گەلێ تورک بیتە پێشەنگێ دەڤەرێ و دێ گەلەک بهێز کەڤیت، ئەو یەک ژ قەستان نینە و دڤێت تێبگەهین کا بۆچی نها ئەردۆغان تشتەک وەسا دبێژیت و ئارمانجا وی چیە؟.
ئەردۆغان و باخچەلی ل گەل دا پرۆژەیێ ئۆجەلانی ژی هەموو کەفتیە د خزمەتا مەزن بوون و بهێزبوونا تورکیا، ئارمانجا تورکیا تنێ کوردێن باکورێ کوردستانێ نینە، ل رۆژئاڤایێ کوردستانێ یا وان دخواست جارێ بدستڤە ئیناینە و نها وان دڤێت ل رۆژهەلاتێ کوردستانێ و هەرێما کوردستانێ ژی بگەهنە ئارمانجا خوە، ئانکۆ ب رێیا پرۆژەیێ ئۆجەلانی نەتەوا کورد ببیتە پشکەک ژ کۆمارا مەزن یا تورکیا، بەری نها ژی ئۆجەلانی چەندین جاران دیار کریە کو هەولێر و بارزانی ئاستەنگن ل هەمبەر پرۆژەیا وی و نها جارەکا دی دڤێت ل ژێر ناڤێ پرۆژەیەکێ جودا تورکیا مەزن بکەت و کوردان ژی بێخیتە ژێر خزمەتا کۆمارا تورکیا.
ل هەرێما کوردستانێ هێزەکا نەتەوەیی یا مەزن هەیە کو ب سالانە خەباتێ بۆ بدەستڤەئینانا مافێن نەتەوەیی یێن خەلکێ کوردستانێ دکەت و ئەو ژی پارتی دیموکراتی کوردستانە و ب چو رەنگەکێ رێ نادەت پرۆژەیێ ئۆجەلانی سەر بگریت و ل رۆژهەلاتێ کوردستانێ ژی نها خەلک گەلەک ب توندی ل دژی وی پرۆژەیی هەلوەستێ خوە نیشا ددەن، براستی ژی سەرگرتنا وی پرۆژەیێ گەلەک ژ پیلانێن کو بەری نها ل دژی گەلێ مە هاتینە گێران مەترسیدارترە و دڤێت هەموو تاکێن کورد ل دژی وی پرۆژەیی دەرکەڤن، چونکی پرسا کوردی دێ دەمەکێ هێتە چارەسەرن کو کورد ژی وەکو هەموو نەتەوەیێن دی خوەدان دەولەتا خوە بن.
