پشتی 13 سالان ئارێشەیا كۆمەلگەهەكا زاخۆ دێ هێتە چارەكرن
زاخۆ، دلۆڤان هالۆ:
پشتی بوورینا 13 سالان ل سەر ئاریشەیا ڕاوەستاندنا پڕۆژەیێ دروستكرن و قێركرنا جاددە و سۆلینێن ئاڤڕێژ ل كۆمەلگەها هیزاوا یا سەر ب ناحیا دەركارێ ڤە ل ئیدارەیا سەربخوە یا زاخۆ، ژلایێ كابینا نەهێ یا حكۆمەتا هەرێما كوردستانێ ڤە دێ هێتە چارەكرن.
ئاراس حەمید، وەلاتیەكێ كۆمەلگەها هیزاوایە بۆ ڕۆژناما ئەڤرۆ دیاركر، ل سالا 2013 دەست ب پڕۆژەیێ دروستكرن و قێركرنا جاددەیان و دروستكرنا سۆلینێن ئاڤڕێژ ل كۆمەلگەها مە یا هیزاوا هاتبووكرن و هەتا نوكە ب دووماهی نە هاتبوون، بجهئینانا پڕۆژەیی ب كۆمپانیەكا توركی هاتبوو ڕاسپاردن و ژ لایێ وان ڤە كارێ كولان و دوستكرنا سۆلینێن ئاڤڕێژ هاتبوو ئەنجامدان، لێ ژبەر ئاریشەیێن دارایی ل سالا 2014 كار هاتە ڕاوەستاندن و ئەڤ ئاریشە ما هەلاویستی، لێ پشتی بوورینا 13 سالان ئەڤ ئاریشە ژلایێ كابینا نەهێ یا حكۆمەتا هەرێما كوردستانێ ڤە دێ هێتە چارەكرن، بۆ ڤێ مەرەمێ كۆمپانیەكا دی ب ڤی پڕۆژەیی ڕابوویە.
سەگڤان تەها، وەلاتیەكێ دی یێ كۆمەلگەها هیزاوایە دبێژیت:»تاخێن مە ل وەرزێ زڤستانێ تەقن بوون و ل وەرزێ هاڤینێ ژی تۆز بوون، زاڕۆكێن مە نەدشیان بچنە قوتابخانێ، لێ پشتی مە ئەڤ ئاریشە گەهاندیە گوهدار شێخۆ سەرپەرشتێ ئیدارەیا سەربخوە یا زاخۆ هاتە سەر خەت و ئاریشەیا مە دێ هێتە چارەسەركرن، لەوما ئەم سۆپاسیا مەسرور بارزانی سەرۆكێ حكۆمەتا هەرێما كوردستانێ و گوهدار شێخۆ سەرپەرشتێ ئیدارەیا سەربخوە یا زاخۆ دكەین».
جەهوەر محەمەد، ڕێڤەبەرێ ناحیا دەركارێ گۆت:»ل دەمەكێ نێزیك دێ ئەڤ ئاریشەیا تاخێن كۆمەلگەها هیزاوا هێتە چارەكرن و ب دووماهی هێت، وەلاتیێن ڤێ كۆمەلگەهێ دێ ژ تەقن و تۆزێ و بێهنا نەخوەش ڕزگاربن، كو ب درێژاهیا نێزیكی 2 كیلۆمەتران قێركرنا جاددە و دروستكرنا سۆلینێن ئاڤڕێژ دێ هێنە دروستكرن، زێدەباری كێشانا هێلێن ئاڤێ و كارەبێ».
