پشتی 14 سالان ژ راوەستیانێ، جادەیا هاڤینگەها سیپە دێ هێتە قێڕكرن
رەمەزان زەكەریا:
پشتی راوەستاندنا پڕۆژەیێ قێركرنا جادەیا هاڤینگەها سیپە ل بجیلێ بۆ دەمێ 14 سالان، ئیدارەیا ئاكرێ پێنگاڤێن رژد بۆ چارەسەركرنا ئاڕێشەیێ دهاڤێژیت و دەڤەردارێ ئاكرێ دبێژیت: جادەیا هاڤینگەها سیپە دێ هێتە قێركرن.
ئەڤراز سوورچی، سەرپەرشتیارێ هاڤینگەها سیپە بۆ ئەڤرۆ گۆت: «چەندین جاران مە داخوازی پێشكێش كربوون و بودجە ژی بۆ هاتبوو تەرخانكرن، بەلێ ژ بەر رەوشا دەڤەرێ و پاشی وەغەركرنا بەلێندەرێ پڕۆژەی كار هاتنە ڕاگرتن، بەری نوكە 80% كار هاتبوو تەمامكرن، بەلێ ژ بەر ڕاگرتنەكا درێژ و ب سەدەما باران و لەهییان نوكە ڕەوشا جادێ زڤڕییە قووناغا دەستپێكێ و پێدڤی ب كارەكێ نوو هەیە، بزاڤ دهێنە كرن پڕۆژە ڕادەستی بەلێندەرەكێ دی بهێتە كرن».
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «مە وەكو ئیدارەیا دەڤەرێ ب هووری كار ل سەر ئاڕێشەیا جادەیا هاڤینگەها سیپە كرییە و بۆ ڤێ مەرەمێ دەرخستەكا نوو و گشتگیر بۆ ڕێكێ هاتیە ئامادەكرن، د نوكە دا مە دەرخستە ڕەوانەی پارێزگەها دهۆكێ كرییە، دا كو بودجەیا پێدڤی بۆ پڕۆژەی بهێتە تەرخانكرن».
دەڤەردارێ ئاكرێ گۆت ژی: «ئارمانجا مە ئەوە، د داهاتیەكێ نێزیك دا پڕۆژە بكەڤیتە د بیاڤێ بجهئینانێ دا و دەست ب كارێن كۆنكریت و قێركرنا وێ بهێتە كرن، دا كو خزمەتا وەلاتی و گەشتیاران بهێتە كرن».
