پشتەڤانیا جەماوەری هێزا منە
هیڤی كەریم
سترانبێژ و مۆزیكژەن (ئامەد خالد سەلیم) كو ژیێ وی (26) سالن و ئەڤە (5) سالن دبۆارێ هونەری دا كاردكەت، د دیدارەكێ دا بۆ رۆژنامەیا ئەڤرۆ گۆت: مۆزیك پشكەكا مەزنە دژیانا مندا و د (5) سالێن بۆری دگەل هەر پەیڤ و ئاوازەكێ ئەز شیایمە خەم و خۆشیێن خۆ دەرببڕم و هونەر زمانێ من یێ نهێنی یە كو دشێم بێدەنگترین هەستێن مرۆڤاتیێ بگەهینم و ئەڤرۆ پتر ژ هەردەمەكی ئیرادەیا من یا بهێزە كو یێ بەردەوامبم.
هەروەسا گۆت: د پلانا مندایە ل دەمەكێ نێزیك ب بەرهەمێن جودا بهێمە خزمەتا جەماوەرێ خۆ، ئەڤ بەرهەمە دێ بیتە پێنگاڤەكا نوو بەرەف هونەرەكێ جیاواز و كارەكێ باش كو ب دلێ هەموویان بیت و هەردەم ئەز دبێژم هونەر بتنێ ناژیت، بەلكو پێدڤی ب پشتەڤانیا هەوەیە كو بشێم یێ بەردەوامبم و نامەیا خۆ ب شێوەیەكێ باش بگەهینم و پشتەڤانیا جەماوەری هێزا منە و مۆزیك پرا لێكگۆهاڕتنا هەستانە و ئەز هیڤی دارم هوون ل سەر پرێ ل گەل من بن، دا پێكڤە جوانترین ئاوازان ب نەخشینین.
