پـاراستنا چـەكـێ پێشمەرگـەی؛ قـەلغان و شكۆیـا نـەتەوەییا مە یە
ئاشتی سالح
د ڤان رۆژێن ئالۆز دا ل ئیراقێ، پرسا كۆنترۆلكرنا چەكی و ب تایبەتی ڤەكۆلین ل دۆر رادەستكرنا چەكێ پێشمەرگەی، بۆیە بابەتەكێ گەرم و مەترسیدار. هندەك دەنگێن سیاسی ل بەغدا ب شێوەیەكێ نەحەز و بێ بنەما دڤێن پێشمەرگەی ژ چەكێ وێ یێ پاراستنێ بێ بەهر بكەن، لێ ئەڤێ چەندێ دێ مەترسیەكا مەزن ل سەر قەوارێ هەرێما كوردستانێ چێ دكەت، چنكۆ رەوشا ئەمنی یا ئیراقێ هێشتا یا نەئارامە و هەبوونا مەترسیێن وەك داعش و ئالۆزیێن حەشدا شەعبی د ناڤا ئیراقێ دا، ئەڤێ داخوازێ دكەن ب هەولدانەكا دژی قەوارەیێ هەرێمێ. پێشمەرگە ل دەستپێكێ هەتا نوكە، نە ب تنێ هێزەكا سەربازی بوویە، بەلكو شكۆ و كەرامەتا گەلێ مە بوویە. پێشمەرگە ئەو هێزە یا كو ل وەختێ هێرشا داعشێ، ل دەمەكێ هەموو دونیا دترسا، سینگێ خۆ كرە قەلغان و ئاخا كوردستانێ ژ پیساتییا تیرۆرێ پاقژكر. لەورا هەر هەولدانەك بۆ لاوازكرنا ڤێ هێزێ، بێگومان دێ بیتە هۆكارێ ڤەكرنا دەرگەهی ل بەرانبەر ڤەگەڕیانا تیرۆرێ و تێكدانا ئاسایشا ناڤخۆیا هەرێمێ.
پێدڤیە ئەم بێژین كو د ناڤا ئیراقەكێ دا كو هێشتا باوەری ب سەروەرییا قانوونێ و پاراستنا هەموو پێكهاتەیان نەهاتیە چەسپاندن، رادەستكرنا چەكێ پێشمەرگەی یەكسانە ب رادەستكرنا چارەنڤیسێ گەلێ مە ب دەستێن نە دیار. ئەڤرۆ رۆژ داعش هێشتا وەك مەترسیەكا ڤەشارتی د ناڤا ئیراقێ دا هەیە، هەروەسا هێزێن حەشدا شەعبی كو ل گەلەك جهێن ئیراقێ ب ئازادی دلڤن، بووینە فاكتەرەكێ نە ئارامیێ. د ڤێ رەوشێ دا، دا بێخستنا چەكێ پێشمەرگەی، دێ قەوارێ هەرێمێ بئێخیتە د مەترسیەكا راستەوخۆ دا و دێ دەرفەتێ دەتە دوژمنان كو ب ساناهی ل سەر هەرێمێ پەیدا ببن.
ل ڤێرێ دڤێت سەركردەیێن مە ب هەموو رەنگەكێ و ب رژدی ل دژی ڤێ داخوازێ راوەستن. قەوارەیێ هەرێما كوردستانێ، یێ كو ب خوونا هزاران شەهیدان هاتیە ب دەستڤە ئینان، ب چ رەنگەكێ نابیت ببیتە قوربانییا ململانێن سیاسی یێن بەغدا. پێشمەرگە ب تنێ هێزەكا پاراستنێ نینە، بەلكو رەمزا بوونا مە و شێوازێ ژیانا مە یێ ئازادە. هەرێمەكا بێ هێز، هەرێمەكا بێ سەروەرە و پێشمەرگەیەكێ بێ چەك، واتە ڤەكرنا دەرگەهێ ژ ناڤبرنا دستكەفتێن دەهێن سالان.
دڤێت هەموو ئالیێن سیاسی یێن كوردستانی ل سەر ڤێ پرسێ هەلوەستەكێ ئێكگرتی و توند هەبیت. نابیت هیچ سیاسیەك یان ئالیەك یاریێ ب ئاسایشا هەرێمێ بكەت. پاراستنا چەكێ پێشمەرگەی، پاراستنا ئاخێ، پاراستنا مال و مالباتێ، و پاراستنا ئاییندێ زارۆكێن مە یە. سەركردایەتیا كوردستانی دڤێت ب وێ چەندێ رازی نەبن كو پێشمەرگە بهێتە لاوازكرن، چنكۆ مێژوویا ڤی وەلاتی سەلماندیە كو ب تنێ هێزا پێشمەرگەی دشێت پارێزگەریێ ل ڤێ ئەزموونێ بكەت.
د نها دا، پێدڤیە سەركردە ب تێگەهشتنەكا بلند، وان راستیێن د سەردەست دا ل بەرامبەر گڤاشتنێن بەغدا بئێخنە د تەرازیەكێ دا و رێ نەدەن قەوارەیێ مە ب هیچ رەنگەكێ بكەڤیتە د مەترسیێ دا. بێگومان، پێشمەرگە دێ مینیت قەلغانا مە و پاراستنا چەكێ وێ، ئەركەكێ نیشتیمانی یێ پیرۆزە ل سەر ملێن هەر كوردەكێ دلسۆز.
