په‌رله‌مانتاره‌ك:نابیت ب هیچ شێوه‌یه‌كی هه‌لبژارتن بهێنه پاشئێخستن
هه‌ولێر، قائید میرۆ
بڕیاره سه‌رۆكایه‌تیا هه‌رێما كوردستانێ فه‌رمانا هه‌رێمی بۆ دیاركرنا ژڤانێ ئه‌نجامدانا هه‌لبژارتنان ده‌ر بكه‌ت و په‌رله‌مانتاره‌كێ فڕاكسیۆنا پارتی ژی ئاشكراكر، پارتی یا به‌رهه‌ڤه بۆ هه‌لبژارتنان و نابیت بهێنه پاشخستن هه‌روه‌سا دبێژیت، چو به‌هانه نه‌ماینه و نابیت ئیدی ژیێ په‌رله‌مانی بهێته درێژكرن.
وه‌یسی سه‌عید، ئه‌ندامێ په‌رله‌مانێ كوردستانێ ژ فراكسیۆنا پارتی بۆ ڕۆژنامه‌یا (ئه‌ڤرۆ) گوت” پێدڤی بوو هه‌لبژارتنێن هه‌رێما كوردستانێ ل سالا بۆری د ده‌مێ خوه یێ قانوونی دا هاتبان ئه‌نجامدان، به‌لێ مخابن ڕێككنه‌كه‌فتنا ئالیێن سیاسی بۆ ئه‌گه‌رێ پاشئێخستنا وان و بۆ پاراستنا ئه‌زموونا هه‌رێما كوردستانێ و په‌یدانه‌بوونا ڤالاهیا قانوونی ژیێ ڤێ خۆلا په‌رله‌مانی هاته درێژكرن، به‌لێ نابیت ب چ شێوه‌یه‌كی دوباره ژیێ په‌رله‌مانێ بهێته درێژكرن و پرۆسه‌یا هه‌لبژارتنان بهێته پاشئێخستن”.
گوت ژی”د دوماهی په‌یامدا سه‌رۆكێ حوكمه‌تا هه‌رێما كوردستانێ بۆ ده‌ربازكرنا ڕه‌وشا نوكه هه‌رێما كوردستانێ تێدا و ب مه‌ره‌ما چاره‌سه‌ركرنا ئاریشه‌یان چه‌ندین خال وه‌كو پێشنیاز داینه ئالیێن سیاسی بتایبه‌تی ئێكه‌تی نیشتمانی كوردستان وه‌كو ئالیێ پشكدار و سه‌ره‌كی د حوكمه‌تا هه‌رێمێ دا ئێك ژوان خالێن مه‌سرور بارزانی داینه ئالیێن سیاسی ئه‌نجامدانا هه‌لبژارتنایه، له‌وڕا ژی نوكه ئالیێن سیاسی ل هه‌مبه‌ر به‌رپرسیاریه‌كا دیرۆكی نه ژبوو نه‌هێلانا ئاسته‌نگێن هه‌مبه‌ر پرۆسه‌یا هه‌لبژارتنان، ژ به‌ر كو هه‌لبژارتن مافه‌كێ بنه‌ره‌تی یێ هه‌موو وه‌لاتیانه و تنێ مافێ ئالیه‌كێ دیاركری نینه، له‌وڕا نابیت مافێ وه‌لاتیان بهێته بنپێكرن، هه‌رێما كوردستانێ ل سه‌ر بنه‌مایێ ئازادی و دیموكراسیێ هاتیه پێكئینان و به‌رده‌وامبوونا ئازادی و دیموكراسیێ دێ كیانێ هه‌رێما كوردستانێ زێده‌تر یێ پاراستی و پێشكه‌فتی بیت”.
وه‌یسی سه‌عید ئاماژه‌كر” نابیت چ ئالیه‌كێ سیاسی بۆ به‌رژه‌وه‌ندیێن خوه یان ترس هه‌بیت ژ هه‌لبژارتنان، كو ژئالیێ ده‌نگده‌رانڤه بهێنه سزادان ببیته ئه‌گه‌رێ ڕێگریێ ل ئه‌نجامدانا هه‌لبژارتنان، یان ژی ڕاستڤه‌كرنا قانوونا هه‌لبژارتنان و هنده‌ك بابه‌تێن دی بكه‌نه به‌هانه بۆ پاشئێخستنا هه‌لبژارتنان، هه‌لویستێ پارتی ل دۆر هه‌لبژارتنان نوكه و سالا بۆری ژی یێ دیاربوو كو دكه‌ل ئه‌نجامدانا هه‌لبژارتنایه و به‌رهه‌ڤی ژی نیشادان بۆ هه‌موو دانوستاندنه‌كێ لدۆر هه‌لبژارتنان تنێ هه‌لبژارتن بهێنه ئه‌نجامدان دده‌مێ خوه یێ قانوونی دا، به‌لێ مخابن چ ئالیێن سیاسی به‌رسڤا پێشنیازا پارتی نه‌دا، له‌وما ژ نه‌چاری ڤه بڕیارا درێژكرنا ژیێ ڤێ خۆلا په‌رله‌مانی هاته دان، چونكه ژبلی بڕیارا درێژكرنا ژیێ په‌رله‌مانی چ رێیێن دی نه‌بوون”.
دیاركر”پارتی هیچ ده‌مه‌كی ژ به‌رپرسیاریه‌تیێ خوه نه‌دایه پاش و ژبه‌ر تێك نه‌چوونا سه‌قامگیریا هه‌رێمێ زۆرینه‌یا په‌رله‌مانی بكار نه‌ئینا، ئه‌گه‌ر نه دشیاندابو پارتی هه‌ر بڕیاره‌كا ده‌ربكه‌ت ژ كاراكرنا كۆمسیۆنا هه‌لبژارتنان هه‌تا دگه‌هیته هه‌ر بڕیاره‌كا دی، پارتی دوماهی كۆمبووندا دووپاتی ل سه‌ر ئه‌نجامدانا هه‌لبژارتنان كریه، له‌وما پێدڤیه ئه‌ڤساله ب هه‌ر شێوه‌یه‌كێ هه‌بیت هه‌لبژارتن بهێنه ئه‌نجامدان”.
