پڕانیا وەلاتیێن ئیرانێ گرنگیێ نادەنە هەلبژارتنێن سەرۆک کۆماری
چاڤدێرێن سیاسی دیار دکەن، هەلبژارتنێن سەرۆک کۆماریێ ل ئیرانێ چو کاریگەریا خوە ل سەر ژیانا وەلاتیان نابیت، ژ بەر ڤێ یەکێ ژی پڕانیا وەلاتیێن ئیرانێ چو گرنگیەکێ نادەنە هەلبژارتنێن سەرۆک کۆماریێ، چونکی کی ببیتە سەرۆک کۆمار ژی دێ رەوشا خراب یا ئابووری بەردەوام بیت.
د. خەلیل فەرهادی مامۆستایێ زانکۆیێ و چاڤدێرێ سیاسی دیار کر، ئیران د رەوشەکا گەلەک خراب دایە، دەستهەلاتا بەری نوکە نەشیا رەوشا ئابووریێ باش بکەت، ب مرنا سەرۆک کۆمارێ بەرێ یێ ئیرانێ ژی نها دێ سەرۆک کۆمارەک نوو هێتە هەلبژارتن، لێ بۆ هەر کەسەکێ ئاشکرایە کو سەرۆک کۆمار ل ئیرانێ خوەدان دەستهەلاتەک وەسا مەزن نینە کو بشێت گوهۆڕینان بکەت یان ژی بریارێن چارەنڤیساز بدەت، بەلکو سەرۆک کۆمار فەرمانێن رێبەرێ شۆرەشا ئیسلامی یا ئیرانێ بجه دئینیت، ژ بەر ڤێ یەکێ ژی ئێدی بۆ خەلکی ئاشکرا بوویە هەر کەسەک ببیتە سەرۆک کۆمار ژی دێ رەوشا ژیانا وان هەر وەکو خوە بیت و چو گوهۆڕین روو نادەن.
عەبدوللا محەمەدی چاڤدێرێ سیاسی یێ رۆژهەلاتێ کوردستانێ ژی دیار کر، ژ بۆ خەلکێ گرنگ نینە کا کی دێ بیتە سەرۆک کۆمار، بەلکو یا گرنگ ئەوە کا دێ رەوشا ئیرانێ بەر ب کیڤە چیت، خەلکی دڤێت بزانن کا دێ سەرۆک کۆمارێ نوو شێت قەیرانا ئابووری چارەسەر کەت، رێژەیا هەژاریێ و بێکاریێ ل ئیرانێ گەلەک زێدە بوویە، ب تایبەتی ژی گەنجێن نوکە ژ پاشەرۆژا خوە گەلەک بێ هێڤی نە، ئەو باوەر دکەن دێ رەوش خرابتر ژی لێ هێت، ژ بەر ڤێ یەکێ ژی رەنگە رێژەیا پشکداریا وەلاتیان د هەلبژارتنێن سەرۆک کۆماریێ دا گەلەک کێم بیت و گۆت: (رێژەیا پشکداریا وەلاتیان د هەلبژارتنێن ئەڤسالە یێن پەرلەمانی دا ژی گەلەک کێم بوو، دیارە دێ د هەلبژارتنێن سەرۆک کۆماریێ دا گەلەک کێمتر ژی بیت، رەنگە ژ بلی فەرمانبەر و هێزێن ئێمناهیێ کو نەچارن دەنگێ خوە بدەن، وەکو دی گەلەک کەس پشکداریێ د هەلبژارتنان دا ناکەن).
ل ئالیێ دی پڕانیا چاڤدێرێن سیاسی ل ئیرانێ وەسا دبینن، هەلبژارتنێن ڤێجارێ یێ سەرۆک کۆماریێ ل ئیرانێ وەکو چو هەلبژارتنێن بۆری نابن، چونکی باوەریا خەلکی ب دەستهەلاتا نها گەلەک یا لاواز بوویی، خەلکی چو هێڤی ب پاشەرۆژێ نەماینە و وەسا دبینن کی ببیتە سەرۆک کۆمار ژی دێ قەیرانا ئابووری یا بەردەوام بیت و دێ رەوش گەلەک خرابتر لێ هێت، ژ بەر ڤێ یەکێ ژی دهێتە چاڤەرێکرن کو رێژەیەکا بەرچاڤ ژ گەنجان نەچنە سەر سندۆقێن دەنگدانێ، لێ هەر چاوا بیت دێ ئێک ژ شەش بەربژارێن نها بیتە سەرۆک کۆمارێ ئیرانێ کو ل گۆر راپرسیان ژی شانسێ سەعید جەلیلی ژ یێن دی زێدەترە.
