پڕۆژەیێن خزمەتگۆزاری دێ بهایێ پارچەیێن ئەردی و خانیان گرانتر لێ كەت
زاخۆ، دلۆڤان هالۆ:
خودانێ نڤیسینگەها بەللی یا كڕین و فرۆتنا ئەرد و خانیان ل زاخۆ بۆ ڕۆژناما ئەڤرۆ دیار كر، ئەڤ پڕۆژەیێن خزمەتگوزاری و ئاڤەدانیێ ب تایبەت قێركرنا جاددەیان و دروستكرنا سۆلینێن ئاڤرێژ ل تاخێ ئەردەوان و دەوروبەرێن وێ ل ئیدارەیا سەربخوە یا زاخۆ، دێ كارتێكرنەكا ڕاستەوخۆ و بهێز ل سەر بلندبوونا بهایێ پارچەیێن ئەردی و خانیان ل دەڤەرێ كەن.
مەتین عیسا، خودانێ نڤیسینگەها بەللی یا كڕین و فرۆتنا ئەرد و خانیان ل زاخۆ بۆ ڕۆژناما ئەڤرۆ ئاماژە ب وێ چەندێ ژی كر، بەری قێركرنا جاددەیان ڕێیێن تەقن و نەخوەش هاتنوچوونا وەلاتیان ب زەحمەت دئێخن ب تایبەت د وەرزێ زڤستانێ دا، قێركرنا ١٠ جاددەیان دێ ڤی تاخی ب جادەیێن سەرەكی یێن زاخۆ ڤە گرێدەت، ئەڤە ژی دێ كڕیار و وەبەرهێنەران پتر هاندەت كو ل ڤی تاخی پارچەیێن ئەردی بكڕن، چونكی گەهشتن پێ ب ساناهی دبیت.
گۆت ژی:»دروستكرنا سۆلینێن ئاڤرێژ ئێكە ژ كارێن گرنگ چونكی دێ ڤی تاخی ژ مەترسیا كۆمبوونا ئاڤێ و لەهییان پارێزیت، و هەر پارچەیەكا ئەردی كو بنیاتێ وێ یێ خزمەتگۆزاری ئاڤ و كارەب و قیركرنا جاددەیان و سۆلینێن ئاڤرێژ لێ هەبن، دێ بهایێ وێ ب شێوەیەكێ بەرچاڤ د بازاری دا بلند بیت».
زێدەتر ژی گۆت:»دابینكرنا ڤان جۆرە خزمەتگوزاریان دێ دیمەنێ گشتی یێ تاخێ ئەردەوان جوانتر و شارستانیتر لێ كەت، ئەڤە ژی دێ بیتە ئەگەرێ وێ چەندێ كو خەلك پتر حەز بكەت ل ڤی تاخی ئاكنجی ببیت، و ل گۆرەی بنەمایێ داخواز و پێشكێشكرنێ ل دەمێ كو داخوازی ل سەر تاخەكێ زێدە بوو، بهایێ پارچەیێن ئەردی و خانیان ژی دێ بلند بیت ب ڕێژەیەكێ كو ڕەنگە ژ ٢٠٪ بۆ ٤٠٪ بلند ببیت یان ژی ب بورینا دەمی ئەڤ ڕێژە بلندتر ببیت».
