پڕۆژەیێ جۆیا گوندێ گوهەرزێ هاتە بجهئینان
ئامێدیێ، مەحمود نهێلی:
د بەردەوامیا گەهاندنا پڕۆژەیێن خزمەتگوزاری دا بۆ دەڤەرێ و گرنگیدان ب كەرتێ چاندنێ و ئاڤدێریێ، پڕۆژەیێ جۆیا گوندێ گوهەرز ل چەمێ مەهیدێ ب دووماهی هات و كەفتە د خزمەتا خەلكێ دەڤەرێ دا.
رێبەر سادق، رێڤەبەرێ ناوچەدرییا دێرەلۆكێ بۆ رۆژناما ئەڤرۆ دیار كر، كابینەیا نەهێ یا حكومەتا هەرێما كوردستانێ گرنگیەكا زۆر دایە ئاڤەدانكرنا دەڤەرا وان، ب تایبەتی د بیاڤێ كەرتێ چاندنێ و ئاڤدێریێ دا و گۆت: «پار چەندین جۆیێن ئاڤدێریێ ل سنۆرێ دەڤەرا مە هاتینە چێكرن، ئێك ژ وان پڕۆژەیێ چێكرنا جۆیا چەمێ مەهیدێ یا گوندێ گوهەرز بوویە، درێژاهیا جۆیێ سێ هزار و 200 مەترن و ئێكە ژ درێژترین جۆیێن دەڤەرێ».
گۆت ژی: «پڕۆژەیێ جۆیا ئاڤدانێ یا چەمێ مەهیدێ ب گوژمێ 328 ملیۆن و 885 هزار دیناران هاتیە بجهئینان و جۆتیارێن هەردو گوندێن گوهەرز و بلاڤە دێ مفای ژێ بینن، دیسا هەر ئەڤ سالە جۆتیارێن دەڤەرێ زەڤیێن برنجی و كونجیان ل بەر چاندینە و ئەڤە ژی بوویە جهێ خوەشحالیا خەلكێ دەڤەرێ ب گشتی و جۆتیاران ب تایبەتی».
