پڕۆژەیێ قێركرنا جادەیان و سۆلینێن ئاڤڕێژ ل زاخۆ دهێتە بجهئینان
زاخۆ، دلۆڤان هالۆ:
یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر كو ب درێژاهیا سێ هزار و 700 كیلۆمەتران قێركرنا جاددەیان و ب درێژاهیا 14 هزار و 500 كیلۆمەتران سۆلینێن ئاڤڕێژ ل هەردو تاخێن هیزل و خامتیر ل ئیدارەیا سەربخوە یا زاخۆ دهێنە چێكرن.
سەرۆكێ باژێڕڤانیا زاخۆ گۆت: «ئەڤ پڕۆژە ئێكە ژ پڕۆژەیێن گرنگ و ستراتیجی یێن خزمەتگوزاری ل دەڤەرێ، ژ بۆ ڕێگریكرن ل كۆمبوونا ئاڤا بارانان و دروستكرن و نووژەنكرنا تۆڕێن بەلاڤكرنا ئاڤا ڤەخوارنێ و هێلێن كارەبێ و ژێرخانا هێلێن ئنترنێتێ».
گۆت ژی: «كۆمپانیا بجهئینەر ژی ب بلندترین ستاندەردێن ئەندازیاری دێ ڤی كاری ئەنجام دەت، ژ بۆ وێ چەندێ خزمەتەكا ژ هەژی پێشكێشی ئاكنجیێن هەردو تاخان بكەت و ئاستەنگێن هاتنوچوونا وەلاتیان بهێنە چارەسەركرن».
زێدەتر ژی گۆت: «ئەڤ پڕۆژە دێ بیتە ئەگەرێ ئاسانكاریەكا مەزن د هاتنوچوونا وەلاتیان دا، و ژێرخانا خزمەتگوزاری یا هەردو تاخان دێ ب شێوەیەكێ بەرچاڤ بەرەڤ پێشڤە بەت».
