پیخه‌مه‌ت راستڤه‌كرنا شاشیه‌كی (به‌ره) و (گرۆپ)!
ل پێناڤى ڕاستڤه‌كرنا شاشیه‌كێ
(به‌ره) و (گرۆپ) !..
د ناڤ وان به‌حس و په‌یڤین و گۆتارێن د گه‌ل و یێن نه د گه‌ل پرسا ریفراندۆمێ و سه‌ربه‌خۆیا كوردستانێ كو د میدیا كوردی دا برێڤه دچیت, كۆمه‌كا شاشیێن زانستی، قانوونی، كلتۆری و هه‌تا یێن زمانی ژی هه‌نه كو مرۆڤ نكاریت خوه لێ بێ ده‌نگ بكه‌ت، جارێ به‌ری كو به‌حسێ وان شاشیان بكه‌ین، پێدڤیه پرسیارا هۆكار و ئه‌گه‌رێن وان بكه‌ین كو ب هزرا مه خوه د ڤان(3) خالان دا دبینیت:
1ـ سیاسه‌ت د نێڤبه‌را زانست و بێ فه‌همیێ دا “وه‌ك هه‌ر بیاڤه‌كێ دی یێ ژیانێ، سیاسه‌ت زانسته و كاركرن و ئاخفتن ل سه‌ر سیاسه‌تێ پێدڤی یه ب مه‌عریفه‌ت و تێگه‌هشتنێ هه‌یه، وه‌ك چاوا ناچێبیت بێ شه‌هره‌زایی كار و ئاخفتن ل سه‌ر كاره‌ب، كشتوكال و ئه‌ده‌بیات بهێته كرن، بۆ سیاسه‌تێ ژی هه‌ر وه‌سایه ئه‌گه‌ر نه زێده‌تر ژی بیت، لێ د ڤی وه‌لاتێ مه دا هه‌ر كه‌س و ب كه‌یفا خوه ل سه‌ر هه‌ستارترین بوار دئاخڤیت كو ئیك ژ وان ژی سیاسه‌ته، له‌وما دبینین خه‌لك هند بێزار و ماندیه ژ میدیا كوردی و هه‌ق وه‌سایه به‌رپرسیارێن میدیایێ ئه‌ڤێ پرسیارێ (پرسیارا بێزاریا خه‌لكێ ژ میدیا كوردی) ژ خوه بكه‌ن و پاشی خوه بێخنه به‌رده‌ف به‌رپرسیاریا ویژدانی و جڤاكی و بزانن ئه‌و و ئه‌وێن كو پشت وانن پیخمه‌ت چی وا دكه‌ن و دخوازن به‌رێ ڤی وه‌لاتی بده‌نه كیڤه!.. ڤێجا ئێك ژ وان هۆكارێن كو مرۆڤی تووشی شاشیێ دكه‌ت ئه‌ڤ بێ فه‌همى یه كو هنده‌كا هه‌یه و د كه‌ڤندا مه‌زنا یا گۆتی: به‌ره‌ك كو نه‌زانه‌كێ هاڤێتبیت ب سه‌د زانا ناهێیت ڤه‌دیتن!..
2ـ حزباتیا نێگه‌تیڤ:
مه‌به‌ستا من ژ كارئینانا تێگه‌هێ (حزباتیا نێگه‌تیڤ) ئه‌وه داكو بێژم حزباتییا پۆزه‌تیڤ ژی هه‌یه، ئه‌و حزباتیا ده‌ستێ ته دگریت بۆ نیشتمان و سه‌ربه‌خۆیێ.
حزباتیا نێگه‌تیڤ ئێكه ژ وان هۆكارێن كو وه ل مرۆڤی دكه‌ت تێ د كوژیه‌كێ دا وێنه‌یێن مه‌زن ببینیت و د ئه‌نجامدا بكه‌فیته شاشیان دا و ل گه‌ل خوه ئه‌ندامێن حزبا خوه ژی ببه‌ته رێكه‌كا خه‌له‌ت، نێ كه‌نگی چێدبیت و هه‌ر وه‌ك (پیره‌مێرد) ی شاعیر دبێژیت: هه‌تا ئێستا رووی نه‌داوه له تاریخی میلله‌تان، میلله‌ته‌ك هه‌بیت و دژی ئازادی و سه‌ربه‌خۆییا خوه بیت و بن ده‌ستی پێ باشتر بت ژ سه‌ربه‌ستیێ!
ئه‌ڤ حزباتیا نێگه‌تیڤ ژ ئالیێ كه‌ره‌بوكینان ڤه دهێته برێڤه‌برن ل جهێ عه‌قلی، هه‌ر له‌وما دبینین ل كوردستانێ كار ژ بۆ سه‌ربه‌خۆیێ گه‌رمه و خه‌لكه‌ك هه‌یه ب ده‌ستێ خوه رۆله‌كێ نیگه‌تیڤ دبینیت و خوه بچویك نیشان دده‌ت!..
3ـ جاشایه‌تی:
هه‌ر وه‌كی چاوا جارا چاش هه‌بوو، نها ژی جاش هه‌نه و لۆژیك دبێژیته‌مه ژیان وه‌هایه و شه‌ڕێ باش و خرابیان ژی به‌رده‌وامه.
جاشایه‌تی د بنه‌ره‌تدا مه‌زنترین شاشی یه و شاشیێن مه‌زنتر ل دووڤ شاشیێن مه‌زن دهێن، ئه‌ڤه یا ل پێش چاڤێن مه و ئه‌م هه‌می دبینین كو هنده‌ك خه‌لك ب ماراسۆن بۆ به‌عدا دچن و وه‌لاتێ خوه بۆ به‌غدا شیعه چ لێ دكه‌ن!..
ئه‌ڤ سێ هۆكارێن سه‌ره‌كی وه‌دكه‌ت شاشی به‌رده‌وام بن و د پرسه‌كا وه‌ها چاره‌نڤیسساز دا وه‌ك ریفراندۆم و سه‌ربه‌خۆیێ، حزب و گرۆپ و خه‌لكه‌ك بكه‌ڤنه د ناڤ هه‌له و شاشی و شه‌همزاریێ دا.
پشتى ئه‌وێ ئێكێ كو سه‌ره‌كیترین هۆكارێن شاشیێن سیاسیێن مه هاتینه ده‌ستنیشانكرن، نها ده‌مێ هندێ یه به‌حسێ شاشیه‌كا رابرى بكه‌ین ل ناڤبه‌را پرسا گه‌لێ سه‌ربه‌خۆیی دا، كو پشتراستم ئه‌وێن ڤێ شاشیێ دكه‌ن دو پشكن، پشكه‌ك ژ وان بێ ئاگه‌ه و پشكه‌كا دیتر ژى ب ئاگه‌هى و مه‌به‌ستدار دخوازن شاشی به‌رده‌وام ببیت!..
شاشی چییه؟!.. شاشى پێكدهێت ژ كارئێنانا دو ده‌سته‌واژه‌یان، كو رامان و مه‌غزا و ده‌لاله‌تا زمانێ سیاسیان و ب ئارمانجا سیاسی بكاردئێنن، دو ده‌سته‌واژى پێكدئێن ژ: (به‌ره‌یێ سه‌ربه‌خۆیێ) و (به‌ره‌یێ دژه‌سه‌ربه‌خۆیی)!.. دیاره ل ڤێره په‌یڤینا مه ده‌رباره‌یى ده‌سته‌واژه‌یا ئێكێ: (به‌ریێ سه‌ربه‌خوه‌یێ) نینه، به‌لكو په‌یڤینا مه سه‌باره‌ت ده‌سته‌واژه‌یا دوویێ: (به‌ره‌یێ دژه‌سه‌ربه‌خۆیێ).
ب باِوه‌ریا به‌نده گه‌ل تێكڕا سه‌ربه‌خۆیێ دخوازیت، ل دووڤ ئه‌وا ئه‌م تێدگه‌هین: به‌ره‌یێ گه‌ل به‌ره‌یێ سه‌ربه‌خۆیێ یه، ب رامانه‌كا دیتر گه‌ل د ئێك به‌ره‌دایه، لێ ئه‌وێن سه‌ربه‌خۆیی نه‌ڤێت (به‌ره) نینن، به‌لكو (گرۆپ)ـه‌كن، ئه‌ڤجا ژماره و ڕێژا وى گرۆپى هه‌ر چه‌ند بیت و ل هه‌ر كیڤه و ئاست و كایه و وار و بیاڤه‌كى دا كار دكه‌ن.
دا كو مه‌به‌ستێ باشتر ڕۆهن بكه‌ین، ئه‌وێن ل دژی سه‌ربه‌خوه‌یێ بچووكترن ژ به‌ره‌ى، هه‌ر بۆ نموونه گرۆپا سیاسییا بچووك، كو به‌رژه‌وه‌ندیا وان گرێدایه ب بێ ئیراده‌یا سیاسی ڤه، یان هندی ده‌نگێ میدیا سیاسی، كو ئه‌و ژى هه‌ر د بێ ئیراده‌نه و خه‌لكێ دیتر بێزار دكه‌ت، یانژی پشكه‌ك ژ ئه‌ندامێن حزبه‌كا سیاسی، كو ڕق به‌رێ چاڤێ وان گرتیه و ژ به‌ر ناكۆكیا سیاسی وێنێ مه‌زنێ سه‌ربه‌خۆیا ملله‌تێ خوه نه‌ڤێن ببینن،.. هه‌موو ئه‌وێن ب سه‌رئێكڤه گرۆپن و به‌رژه‌وه‌ندیا نێگه‌تیڤ هه‌تا ئاستێ زه‌لیلیێ ڤه دبه‌ت، هه‌كه نه‌بایه و نه‌هاتبایه دیتن و مامه‌ندی نینه د دیرۆكێ دا زیندانیه‌ك حه‌ز نه‌كه‌ت ئازاد ببێت و زنجیر ب ده‌ست و پێیان ڤه بیت…
دووماهی په‌یڤ ئه‌ڤه‌یه: تشته‌ك نینه ب ناڤێ به‌ره‌یێ دژه‌سه‌ربه‌خۆیێ، به‌لێ ئه‌و تشتێ هه‌ی گرۆپه و گرۆپ ژى دبچووكن و نه‌شێن پڕۆژێ مه‌زن ب چه‌وته‌ڕێ دا ببه‌ن، واته گه‌ل و ڕاستی، گه‌ل و ڕیفراندۆم، گه‌ل و سه‌ربه‌خوه‌یی ئێك به‌ره‌نه و بپێكه‌ڤنه، ئه‌و گرۆپانه ژى دبچووكن، هه‌ر ڕۆژ و ڕه‌نگه‌ك دگرن و ئاوازان بۆ به‌رژه‌وه‌ندیه‌كا بچووك دژه‌نن!…
