پیرۆزە ئەلهۆیێن چیا پیرۆزە كوردستان
ئیحسان حەسەن
بدەستڤە ئینانا تیما یانەیا دهۆك ناسناڤێ كۆپا كەنداڤی دئێكەمین پشكدارییا خوەدا، دهێتە هژمارتن ئێك ژ دەستكەڤتێن مەزن و دیرۆكی بۆ وەرزشا ئیراقێ ب گشتی و هەرێما كوردستانێ ب تایبەتی، بێ گۆمان ئەڤ دەستكەڤتە ژڤالاتییێ نەهاتیە، بەلكو ئەنجامەكێ ڕەوا و سرۆشتیە بۆ ئەوان كار و پلان، ئارمانج و بەرنامەیێن پێشوەخت، ئەوێن یانەیێ بەری پشكداریێ دڤێ قارەمانییێ دا بخوە داناین و خەبات بۆ كری تا گەهشتینە ئارمانجا خوە، ب بۆچوونا دبینم پێنچ هۆكارێن سەرەكی هەبوون هەتا ئەلهۆیێن چیای شیاین بگەهنە ناسناڤی، یا ئێكێ باوەری و زێرەكی ووێرەكییا كادرێ راهێنانێ ب سەركێشییا مەسعۆد میرالی، ئەوێن شیاین تیمەكێ دروست بكەن، نەتنێ یابهێز بیت د لایەنێ تەكنیكی دا، بەلكو شیا فوتبۆلەكا خۆش و جوان پێشكێش بكەت، كو ببیتە جهێ حێبەتییا هەموو شارەزا و شرۆڤەكار و رەخنەگر و حەژێكەران، خالا دویێ هەلبژاتنا دروست بۆ یاریزانێن خۆمالی و یێن بیانی لدووڤ پێدڤییا تیمێ، ئەوێن نها بەرگیرییێ ژدرێس وناڤێ یانەیێ دكەن، شیاین ب سەربۆر و ئاستێ خوە یێ بلند و بجهئینانا پلانێن راهێنەرێ خوە رۆلەكێ ئێكجار مەزن دهەموو هێلێن یاریێ دا بگێرن و تیما خوە بگەهینە ناسناڤێ ڤێ قارەمانییێ، یا سێیێ كارگێریا یانەیێ ئەوا چو كێمتر خەمی نەكری د بەرهەڤكرنا هەر تشتەكێ پێدڤی بۆ سەركەڤتنا كاروانێ تیمێ هەر ژ هەلبژارتنا وان بۆ جۆرێ یاریزانان، دیسان د پشتەڤانییا وان یا مەعنەوی، هەروەسا دانانا پلانێن سەركەڤتی و بەردەوام ژبۆ گەهشتنێ ب ئارمانجا خوە یا بلند ئەوژی بەرژوەندیا یانەیێ و تیمێ بەری هەر تشتەكێ دی، یا چوارێ حەژێكەر و پشتەڤانێن تیمێ ئەوێن دخوشی و نەخوشییان دا پشتا ئەلهۆیان چ ل مەیدانێن نافخوە یان یێن دەرڤە بەرنەداین ل پشت وان راوەستیان كو براستی یاریزانێن 12 بوون، ئەوێن ب حەواری و ستران و دروشمێن خوە، ژبلی بلندكرنا مورالا یاریزانان، بۆ هەموو لایەكی دیاركرین كو شێوێ گونجای بۆ دەربرینا كەیف خوشییێ دناڤا یاریگەهاندا رەوشەنبیریا پشتەڤانیییە یا تامدای ب پێگیری و رێكخستنێ دناڤا پەلۆكێن یاریێدا دیسان ل دەرڤە، یا پێنجێ پووتەدانا دەستهەلاتا هەرێما كوردستانێ ب پشكداریا تیمێ دڤێ روودانا مەزندا، پشتەڤانییا بێ سنۆر یا سەرۆكێ حكومەتا هەرێما كوردستانێ مەسرۆر بارزانی، ئامادەبوونا وی دیاریا فینالێ وئاهەنگا خەلاتكرنا تیمێ، دیسان ئەو پیرۆزباهیێن تیمێ ژ هەر ئێك ژ جەنابێ سەرۆك بارزانی و نێجیرڤان بارزانی سەرۆكێ هەرێما كوردستانێ لدۆر ڤێ دەستكەڤتێ وەرگرتین، نیشانا پالپشتی و خەمخوری و ڤیانا وانە بۆ وەرزش و وەرزشڤانان، لدووماهییێ یا من دڤێت بێژم، ئەلهۆیێن چیا ژهەژی ناسناڤی بوون، ناڤێ خوە ب پیتێن زێرین كرە ددیرۆكا ڤێ قارەمانییێ دا، دلێ 48 ملیون كۆردان لسەرانسەری جیهانێ بڤێ دەستكەڤتا كێم وێنەخوەشكر، چونكو هێشتا چیرۆكا پشكداری و سەركەڤتنێن وێ ب داوی نەهاتینە، مافێ وێ یە لڤی وەرزی هیڤیێن وێ بلندترلێ بهێن و هزرا پتر ژ دەستكەڤتەكێ بكەت، بۆچی نە ئەگەر هەموو ساخلەتێن تیما قارەمان لدەف هەبن.
