پێدڤیه ره‌وشا ده‌روونی یا نه‌خۆشێن قولۆنێ به‌رچاڤ بهێته وه‌رگرتن
دهۆك، شڤان لقمان:
د. شه‌هرام عزیز میرخان، تایبه‌تمه‌ندێ نه‌خۆشیێن دل و هناڤا و سینگی دیاركر قولۆن دووماهیك وێستگه‌ها هه‌رسكرنا خوارنێیه و ئه‌ندامه‌كێ گرنگێ له‌شێ مڕۆڤی یه، كاردكه‌ت سه‌ر هه‌لمژینا ئاڤێ و خوێ و ئه‌و وزەیا دناڤ خوارنا مرۆڤیدا، گه‌له‌ك كه‌سان گازندا قۆلۆنێ یا هه‌ی ئه‌وژی ژ ئه‌نجامێ گرژبوونا ماسولكێن سه‌ر دیوارێ ستوور هه‌ین.
د. شه‌هرام عزیز میرخان دازانین ل ده‌ڤ نه‌خوشی هنده‌ك نیشان دیار دبن و ل ده‌ڤ نۆشداری هنده‌ك نیشانێن دی دیار دبن، ئه‌و نیشانێن سه‌ره‌كی ل ده‌ڤ نه‌خۆشی دیاردبن وه‌رمینا زكی و ئێشانا زكی ئه‌گه‌ر گڕژی ل سه‌ر ماسولكێن نه‌خوشی زێده‌ببیتن، زكچۆن ل ده‌ڤ نه‌خۆشی په‌یدادبیتن، یانژی خاڤبوون دناڤ ماسولكان دا هه‌بیت دێ قه‌بزبوون ل ده‌ڤ ڤان كه‌سان په‌یدابیت، و گۆت: ده‌مێ ئه‌ڤ كه‌سه سه‌ره‌دانا نۆشداری دكه‌ت هنده‌ك پشكنینێن تایبه‌ت بوو دهێنه ئه‌نجامدان، پشكنینا خوینێ و پشكنینا ده‌ستاڤا زراڤ و ستوور و گه‌له‌ك جاران نه‌خوش پێدڤی نازوورێ دبیت بو بهێته ئه‌نجامدان، هه‌روه‌سا پشكنینێن تیشكێ بو دهێنه ئه‌نجامدان، دگه‌ل ڤان پشكنینان نۆشدار پشكنینێن ده‌ستی بو نه‌خۆشی ئه‌نجام دده‌ت كا رێژا وه‌رمینا زكێ نه‌خوشی چه‌نده ، دگه‌ل ڤان پشكنینان هنده‌ك نیشانێن دی هه‌نه د مه‌ترسیدارن ئه‌گه‌ر دیاربوون د پشكنینێن نۆشداریدا ژوانژی ئاگه‌ر نه‌خوشی گه‌له‌ك كێشا خوه ژده‌ستدا، یان خوارنا وی نه یا باشبیت و دلڕابوون و عێلنجی هاتنێ و نه‌شیا خوارنێ بخۆتن، هه‌روه‌سا ئه‌گه‌ر كێمخوینی ل ده‌ڤ په‌یدابوو، ئه‌ڤ نیشانه د مه‌ترسیدارن و دبیت نیشان بن بو هنده‌ك نه‌خۆشیێن مه‌ترسیدار وه‌كی گه‌له‌ك جۆرێن په‌نجه‌شێرێ كو هه‌مان نیشانێن قولونێ هه‌نه ، ژبه‌ر ڤان ئه‌گه‌ران نیشانێن ل ده‌ڤ نه‌خۆشی و پشكنینێن نۆشداری د جیاوازن.
تایبه‌تمه‌ندێ نه‌خۆشیێن دل و هناڤا و سینگی خویاكر هوكارێن ڤێ نه‌خوشیێ كێمبوونا به‌كتریا ب مفایه دناڤا رووڤیكێن مروڤیدا یان قولونێدا، هه‌روه‌سا هه‌ودانێن دژوار یێن دومدرێژ و هنده‌ك خوارن هه‌نه ڤێ نه‌خوشیێ ل ده‌ڤ مروڤی زێده‌دكه‌ن، وه‌كی باقله‌مه‌نیان كو به‌كتریا دشێت زوو گه‌شێ بكه‌ت دناڤدا و زێده‌ببیت، هه‌روه‌سا شیر و ماست وه‌دكه‌ن غازات ل ده‌ڤ نه‌خوشی په‌یداببن، هه‌روه‌سا نان و سه‌مونه تایبه‌ت ئه‌گه‌ر ژ بازاری بكریت، چونكی رێژه‌كا زور یا هه‌ڤیرترشی ناڤدایه دبنه ئه‌گه‌رێ وه‌رمتنا زكی .
هه‌روه‌سا ئه‌وژی گۆت: چاره‌سه‌ریا ڤێ نه‌خوشیێ ل جیهانێ هه‌موویێ هاتیه گوهرین و ب تنێ ده‌رمان به‌س نینن بوو چاره‌سه‌ریێ، ژ خاڵێن گرنگ بوو چاره‌سه‌ریا ڤێ نه‌خوشیێ گوهۆرینا ستایلێ ژیانا نه‌خوشیه وه‌كو وه‌رزشكرن دحه‌فتیێدا بو ده‌مێ پێنج روژا و هه‌ر روژه‌كێ بو بیست ده‌قیقا، هه‌روه‌سا ڤه‌خوارنا مه‌ی و جگاره‌كێشان هوكارن بو گه‌له‌ك نه‌خۆشیا و دبیت ببنه ئه‌گه‌رێ نه‌خۆشیێن دومدرێژ، هه‌روه‌سا رێكخستنا ده‌مێن خوارنێ و خوه دووركرن ژ خوارنا شه‌ڤێ و ئه‌و خوارنێن گه‌له‌ك دوهن دناڤدا، هه‌روه‌سا چاره‌سه‌ریا گرنگ پێدڤیه نه‌خۆش بزانیت بوارێ وی یێ ده‌روونی كو نه‌خۆش هزردكه‌ت نه‌خوشیه‌كا مه‌ترسیدار یا هه‌ی، پێدڤیه بوارێ ده‌روونی یێ نه‌خۆشی بهێته كۆنترولكرن و بۆ نه‌خۆشی بهێته شروڤه‌كرن كو چ نه‌خوشیێن مه‌ترسیدار نینن و چه‌ند رێنمایان وه‌رگریتن ل سه‌ر ڤێ نه‌خوشیێ.
