پێشەوا هەورامانی: د ڕەشنڤیسێ پڕۆژەیاسایا بودجەیا گشتی یا ئیراقێ دا، مافێن دەستووری یێن هەرێمێ هاتینە بنپێكرن
د نووترین داخۆیانییا خوە یا تایبەت دا دەربارەی داڕشتنا پڕۆژەیاسایا بودجەیا گشتی یا ئیراقێ، پێشەوا هەورامانی، پەیڤدارێ حوكمەتا هەرێما كوردستانێ ئاشكرا كر كو د ڕەشنڤیسێ نوكە یێ پڕۆژەیاسایا بودجەی دا مافێن دەستووری یێن هەرێمێ هاتینە بنپێكرن ب شێوەیەكی د دەمەكی دا كو دڤیا ل دووڤ ئەنجامێن سەرژمێرییا گشتییا ئاكنجییان ڕێژەیا 14،4% ژ پشكا بودجەی بۆ هەرێمێ بهێتە دیاركرن، لێ ئەڤ ڕێژەیە هاتییە كێمكرن بۆ 12% و هەتاكو ژ وێ ژی كێمتر هاتییە دانان.
هەورامانی ڕۆهن كر كو ئەڤ پڕۆژەیاسایە هەتا نوكە نەچوویە د ناڤ جڤاتا نوونەران دا و بتنێ د جڤاتا وەزیران دا گەنگەشە ل سەر دهێتە كرن. ژ بەر هندێ ژی كو ناڤەڕۆكا وێ جهێ ڕازیبوونا حوكمەتا هەرێمێ نینە، دێ تیمێ دانوستاندكارێ هەرێمێ ڕووبڕوو ل گەل حوكمەتا فیدڕال دەست ب دانوستاندنان كەت دا كو مافێن دەستووری بچەسپینیت.
هەڤدەم دەربارەی ڕەوشا مووچەیێ مووچەخۆران، پەیڤدارێ حوكمەتا هەرێمێ پشتڕاسییا تمام دا كو مووچە ب تەمامی هاتیە مسۆگەركرن و چ مەترسی ل سەر نینە، ژ بەر كو سەرۆكوەزیران و وەزیرێ دارایی یێ ئیراقێ دوپاتی ل سەر هنارتنا وی كریە و هەرێما كوردستانێ ژی هەموو پێگیرییێن دارایی و تەكنیكی یێن خوە بجهئیناینە، ژ وان ژی دۆسێیا پەترۆلێ و دەستڤەبەردانا 120 ملیار دیناران ژ داهاتێن نەنەفتی. لەوما ناكۆكیێن د ناڤبەرا هەولێرێ و بەغدایێ دا بتنێ ل سەر پشكا گشتی یا بودجەی نە د ڕەشنڤیسێ دا، نە ل سەر مووچەی.
د دووماهیێ ژی دا پێشەوا هەورامانی هۆشداری دا كو دانوستاندنێن د ناڤ جڤاتا نوونەران دا هەردەم ئالۆز و ب زەحمەت بووینە، ژ بەر هندێ داخواز ژ هەموو فراكسیۆن و نوونەرێن كورد د جڤاتا نوونەرێن ئیراقێ دا كر كو ئێكدەست و ئێكهەلوەست بن دا كو ڕێگریێ ل دووبارەبوونا ئەزموونێن نەخوەش یێن سالێن بۆری بكەن و پێكڤە بەرەڤانیێ ژ شایستە و مافێن خەلكێ كوردستانێ بكەن.
