پێنج كچێن دهۆكێ هەڤڕكیێ بۆ ناڤ رێزێن هەلبژارتیێ ئیراقێ دێ كەن
شاهۆ فەرید:
چاڤەڕێ دهێتە كرن ئەڤرۆ هەولێرا پایتەخت مێڤاندارییا قارەمانییا ئیراقێ یا یارییا تێنسا ل سەر ئەردی بكەت ئەوا بڕیارە ب پشكدارییا11 یاریزانێن كچ ژ وانا پێنج یاریزانێن پارێزگەها دهۆكێ نە و رژدن بۆ دەستڤەئینانا رێزێن پێشیێ.
ل دۆر ڤێ یەكێ سەعید خەلیل سەرۆكێ فدراسیۆنا تێنسا ئەردی ل پارێزگەهێ بۆ رۆژنامەیا ئەڤرۆ گۆت: هەرچەندە ئەو بۆ ماوەیەكێ مەهەكێ بوو وەكو پارێزگەها دهۆكێ مە بەرهەڤیێن خوە بۆ مێڤانداریكرنا قارەمانیێ كربوو، لێ ژبەر چەندە ئەگەران ئەو قارەمانی بۆ هەولێرا پایتەخت هاتە ڤەگۆهاستن، هەرچەوا بیت یاریزانێن پارێزگەهێ و یانەیا دهۆك كو هژمارا وان پێنج كەسن ژ سەرجەمێ 11 یاریزانێن پشكدار دێ هەڤڕكیێ بۆ دەستڤە ئینانا رێزێن هەلبژارتیێ ئیراقێ كەن، ئەڤ قارەمانییە وەكو پێنگاڤا ئێكێ یا هەڤڕكیێ نە بۆ هەموو یاریزانێن پشكدار و دهێتە پێشبینیكرن یاریێن بهێز و ئاگرین بهێنە كرن ژبەركو هەموو یاریزان دێ شەڕی بۆ پلێنێن پێشیێ كەن ژبۆ ب دەستڤەئینانا ناڤ رێزێن هەلبژارتیێ ئیراقێ ئەڤچەندە ژی ژبەر هەبوونا بەرهەڤییان بۆ ڤاڤارتنێن كێشوەرێ ئاسیا بۆ قارەمانییا جیهانی ئەوا بڕیارە هەڤڕكیێن وێ ل وەلاتێ بەحرەینێ بهێتە ئەنجامدان.
ژلایەكێ دووڤە ناڤهاتی ئەوچەندە ژی دیار كر ل سەر ئاستێ كوڕان ژی دێ قارەمانیەك هێتە كرن هەر دێ ل هەولێرا پایتەخت بیت ل 20ێ ڤێ مەهێ و دێ چاڤەڕێ بین چەند یاریزانێن پارێزگەها دهۆكێ پشكداربن و گۆت: ل سەر ئاستێ كچان ئەوا دێ ئەڤرۆ هێتە ئەنجامدان مە باوەری ب شیانێن یاریزانێن خوە هەنە و دشێن بگەهنە ئەنجام و ئاستێن بلند ژبەركو خودان شیانین و راهێنەرێ وان ئاڤدەل حەسەن شارەزاهییەكا باش هەیە و دشێت بگەهنە ئارمانجا خوە و سەرفەرازی ڤەگەڕینە پارێزگەها دهۆكێ.
