پێگەهێ هەرێما كوردستانێ د نەخشێ دیپلۆماسیێ جیهانی دا
دلۆڤان ئاكرەیی
پشكداریا نێچیرڤان بارزانی، سەرۆكێ هەرێما كوردستانێ، د كۆربەندێ دیپلۆماسیێ ئنتالیا (ADF) دا، نەك هەر چالاكییەكا پرۆتۆكۆلی یا ئاسایی یە، بەلكو بەرجەستەكرنا ستراتیژییەتەكا نوی یا لێك نێزیككرنێ یە و ئەڤ ئامادەبوونا سیاسی، هەولەكا هووربینە بۆ گرێدانا بەرژەوەندیێن بلند یێن هەرێمێ دگەل تێگەهێ گوهۆرینێن جیۆپۆلیتیكی یێن بلەز د ئاستێ جیهانی دا.
ئەڤ كۆربەندە وەك پرەكا دیپلۆماسی یا ستراتیژی دهێتە هەژمارتن، كو هەرێما كوردستانێ دشێت پەیاما ئارامی و پێكڤەژیانێ بگەهینتە زێدەتر ژ 150 دەولەتان. ژ لایەكێ دی ڤە، سەرۆكێ هەرێمێ ب رێكا مۆدێلا «هێزا نەرم» (Soft Power)، پێگەیێ قەوارەیێ سیاسی یێ كوردستانێ وەك ئەكتەرەكێ ئاشتیخواز بهێز دكەت؛ ب ڤێ یەكێ سەلماندی یە كو هەرێم د شیان دایە ب رێكا دیالۆگ و دانوستاندنان، كێشەیێن ئالۆز یێن هەرێمی چارەسەر بكەت، نەك ب بكارئینانا هێز و ململانێیان. ئەڤ كۆربەندە دەرفەتەكا زێرین بوو بۆ پتر توكمەكرنا پەیوەندیێن سیاسی، ئابۆری و ئەولەهی دگەل كۆمارا توركیا. ب تایبەت د بیاڤێن وزە و بازرگانییا سنووری دا، كو ئەڤ دوو تەوەرە ب ستوونێن سەرەكی یێن ڤەژاندنا ژێرخانا هەرێما كوردستانێ دهێنە نیاسین.
ئەوا ڤێ پشكداریێ دكەتە بابەتەكێ هەڤپشك ل گەل ئەجێندایێن جیهانی، ئەو دیدارێن پەراوێزی (Side Meetings) نە كو دگەل نوونەرێن بلند یێن ئێكەتییا ئەوروپا و وەلاتێن عەرەبی دهێنە ئەنجامدان. د ڤان كۆمبوونێن ئاستبلند دا، سەرۆكێ هەرێمێ ب زیرەكی دۆسەیێن هەستیار یێن وەك:
مافێن دەستووری یێن گەلێ كوردستانێ؛
ڕاكێشانا سەرمایە و وەبەرهێنانێن بیانی؛
سەقامگیرییا سیاسی و ئەولەهی.
وەك تەوەرێن سەرەكی بەحس كرینە، دا كو هەرێم نە وەك بارگرانییەكا ئەمنی، بەلكو وەك فاكتەرێ سەقامگیرییێ د رۆژهەلاتا ناڤین دا بهێتە پێناسین.
ب كورتی، ئامادەبوونا سەرۆكێ هەرێمێ د ڤی كۆربەندێ جیهانی دا، هەڤسەنگییەكا لێكدای و هوورە د ناڤبەرا پاراستنا كیانێ سیاسی یێ ناڤخۆ و ڤەكرنا ئاسۆیێن نوو ل سەر ئاستێ نێڤدەولەتی. ئەڤە بزاڤەكە دا كو دۆسەیا كوردستانێ هەردەم د ناڤ بازنەیا بڕیارێن جیهانی و نەخشێ دیپلۆماسیێ نێڤدەولەتی دا ب زیندوویی و كاریگەری بمینیت.
