پەرلەمانتارەك: هەتا نوكە چو ئاستەنگ ل هەمبەر هنارتنا مووچەی نینن
هەولێر، قائید میرۆ:
پەرلەمانتارەكا فراكسیۆنا پارتی ل بەغدا ئاشكراكر، هەتا نوكە چو ئاستەنگ ل هەمبەر هنارتنا مووچەیێ فەرمانبەرێن هەرێما كوردستانێ نینن و دبێژیت: بەغدا دیاركریە ل گەل مەزاختنا مووچەیێ فەرمانبەرێن ئیراقێ مووچەیێ هەرێمێ ژی دێ هێتە مەزاختن.
دكتۆر چیمەن بارزانی، پەرلەمانتارا فراكسیۆنا پارتی ل پەرمانێ ئیراقێ بۆ رۆژناما ئەڤرۆ دیاركر، حەفتیا بۆری پەرلەمانتارێن وان سەرەدانا وەزیرێ دارایی یێ ئیراقێ كربوو، ل گورەی دیتنا وان ل گەل وەزیرێ دارایی، هەتا نوكە چو ئاریشە و ئاستەنگ ل هەمبەر مووچەیێ فەرمانبەرێن هەرێما كوردستانێ نینن و گۆت: «بەغدا ئاشكراكریە ل گەل بەلاڤكرنا مووچەیەیێ فەرمانبەرێن ئیراقێ، مووچەیێ فەرمانبەرێن هەرێمێ ژی دێ هێتە مەزاختن، راستە هندەك جارا گوهۆڕین بسەر هەلویستێ وان دا دهێن، بەلێ ئەم گەشبینین ب هەلویستێ نوكە یێ حكومەتا فیدرال هەی».
دكتۆر چیمەن بارزانی گۆت ژی: «سەرەدانا مەسرور بارزانی بۆ بەغدا و هەڤدیتنا جەنابێ وی ل گەل لایەنێن ئیراقێ كاریگەری هەبوویە و ئەم گەشبینین دێ پەیوەندیێن د ناڤبەرا هەرێم و بەغدایێ دا باشتر لێ هێن، چونكی تێگەهشتن د ناڤبەرا هەردولایان دا هەیە، هیڤیدارین ئاریشەیێن هەلاویستی بهێنە چارەسەركرن و ماف و شایستەیێن وەلاتیێن كوردستانێ بێی چو ئاستەنگ بهێنە مەزاختن».
