پەیکەرەک بۆ پارێزگارێ دهۆکێ هاتە چێکرن
سندس سالح سلێڤانەیی
رێزلێنان و قەدرگرتن ژ کار و خزمەتێن کەسایەتیێن دڵسۆز، ئێکە ژ دابونەریتێن جوان و ڕەسەن یێن کۆمەلگەهێ مە، ب تایبەتی دەمێ کو هونەر دبیتە زمانێ ڕاستەقینە یێ ڤێ سوپاسگوزاریێ. د ڤی چارچۆوەیێ داهێنانێ دا، پەیکەرسازێ ناڤدار و بەرنیاس “وەلید یەزەن دەروێش” کارەکێ هونەری یێ نایاب و ناوازە ئەنجام دایە، کو ئەو ژی چێکرنا پەیکەرەکێ تایبەت بوو بۆ بەڕێز د. عەلی تەتەر. ئەڤ پێشکێشکرنە وەک ڕێزلێنانەکێ تێت ل هەمبەر وێ پشتەڤانیا بەردەوام و خەمخۆرانە یا کو جەنابێ وی بۆ بزاڤا هونەری و رەوشەنبیری ل دەڤەرێ دکەت، ب تایبەتی دیتنا وی یا جوان و پشتەڤانیکرنا وی یا بەرچاڤ بۆ چالاکی و پڕۆژەیێن جۆراوجۆر یێن قوتابخانە و ناڤەندێن پەروەردەیی.
پەیکەرسازێ ناڤبری د داخویانیەکێ دا بەشەک ژ هەست و پێنگاڤێن کارێ خۆ دیار کر و گۆت: “بۆ ماوێ هەیڤەکێ ب بەردەوامی و دڵسۆزی من کار د چێکرنا ڤی پەیکەری دا کریە. بۆ من جهێ شانازی و دلخۆشیەکا گەلەک مەزنە کو من ئەڤ کارێ هونەری پێشکێشی جەنابێ وی کری، چونکی کار، ماندیبوون و خزمەتا وی یا دڵسۆزانە د چەندین سالێن دەربازبووی دا د بوارێن جودا جودا دا یا دیار و بەرچاڤە و هەژی هەمی پێزانینەکێ یە.” ئەڤ جۆرە پێشوازی و کاران، دبنە پالدەرەکێ بهێز بۆ پێشڤەبرنا رەوشا رەوشەنبیری و هونەری ل کوردستانێ.
