چار سالێن به‌رخوه‌دانێ پێدڤى ب چار سالێن بهێنڤه‌دانێ یه‌!

نوورى محه‌مه‌د سالح بریفكانى
پشتى بۆرینا چار سالێن سه‌خت و نه‌خۆش ب هه‌ر چار قه‌یرانێن خوه‌ یێن مه‌زن و نه‌چاڤه‌رێكرى كو ب سه‌ر گه‌لێ كوردستانێ ب گشتى و حوكمه‌تا هه‌رێمێ و فه‌رمانبه‌رێن وێ ب تایبه‌تى دا هاتین و ئه‌و كاریگه‌ریێن نه‌رێنى د هه‌موو وارێن ژیان و ژیارا خه‌لكێ كوردستانێ دا په‌یداكرین، به‌لێ خۆراگرى و به‌رخودانا خه‌لكێ كوردستانێ ژ ئه‌وان قه‌یرانان مه‌زنتر بووینه‌ هه‌ر چه‌نده‌ چار قه‌یرانێن مه‌زن ژى بوون و ل ده‌مه‌كێ به‌روه‌خت و ل دووڤ ئێك و نه‌چاڤه‌رێكرى دا هاتن وه‌كى (برینا بۆدجه‌ و مووچێن فه‌رمانبه‌ران ژ لایێ حوكمه‌تا ب ناڤى فیدرال و هاتنا ژماره‌كا زۆرا ئاوارا و په‌نابه‌را و داكه‌فتنا به‌هایێ گازێ كو ب مخابنى ڤه‌ ژ داهاتێ سه‌ره‌كیێ حوكمه‌تا هه‌رێمێ یه‌ و هه‌روه‌سا په‌یدابوونا شه‌ڕێ دژى تیرۆرستێن داعش) كو ب راستى نڤیسین و خواندنا ئه‌ڤى بابه‌تى یا نه‌خۆش و دلئێشه‌ لێ یا نه‌ خوه‌شتر ئه‌وه‌ كو ئه‌م هه‌موو د ناڤ دا ژیاینه‌ و ب چاڤێ خوه‌ دیتینه‌! ل سه‌ر ده‌مه‌كێ بێ هێز و ئالۆز! به‌لێ هیزا پاراستن و به‌رگریا كوردستانێ و كیانێ وێ ژ هه‌ر قه‌یران و مه‌ترسیه‌كێ مه‌زنتر بوویه‌، له‌وما خه‌لكێ كوردستانێ ب گشتى و پێشمه‌رگێن قه‌هره‌مان و هێزێن ئێمناهیا ناڤخوه‌ى و ته‌ڤایا فه‌رمانبه‌رێن كوردستانێ ل به‌ر سه‌رمایێ و گه‌رمایێ و ب به‌ریكه‌كا ڤالا و سه‌رێ هه‌یڤه‌كا بێ مووچه‌ به‌ره‌ڤانى ژخاك و ده‌ستكه‌فتێن وێ و خوینا شه‌هیدان كرینه‌ و ئه‌و ئه‌رك و مافێن ل سه‌ر ملێن وان ب هه‌موو دلسۆزى و شیانێن خوه‌ بجهئیناینه‌ حه‌تا پشكدارى كرن بوویه‌ د هه‌لبژارتنین 30 ئه‌یلۆنا سالا 2018 ئه‌ركێ ل سه‌ر ملێ وان ب باشترین شێوه‌ ئه‌دا كریه‌ و پتریا خه‌لكێ كوردستانێ كوردستانه‌كا ب هێز هه‌لبژارتى یه‌ له‌وما پێدڤى یه‌ لایه‌نێن سیاسى و ب تایبه‌تى لایه‌نێ سه‌ركه‌فتى هه‌موو هه‌ولێن خوه‌ بده‌ت بۆ كوردستانه‌كا ب هێز كو هێزا وێ ژ هێزا تاكێ كورد وه‌ربگریت نه‌ك لایه‌نه‌كێ سیاسى ب تنێ! و رێز ل ماندیبوونا خه‌لكێ كوردستانێ بگریت و هزر ل بهێنڤه‌دانا گه‌لێ خوه‌ بكه‌ت و ب پاراستن و به‌رڤانیكرنێ ژ به‌رژه‌وه‌ندیێن وان و پلانێن خوه‌ یێن پێشده‌م هه‌بن بۆ هه‌ر روودان و كاره‌ساته‌كا نه‌ چاڤه‌رێكرى ب ستافه‌كێ نوو و ب خوین و هێزه‌كا نوو، ژ به‌ر كو چ ملله‌تان هندى ملله‌تێ كورد پێدڤى ب ژیانه‌كا خۆش و ئاڤه‌دان و ئارامیێ نینه‌ پشتى ئه‌وان هه‌موو كاره‌سات و نه‌خۆشى و به‌رته‌نگاڤیێن ب چاڤێن خوه‌ دیتیین!

کۆمێنتا تە