د. زیرەك زێباری: بەری سەرەدانا عەلی ئەلزەیدی بۆ واشنتۆنێ، پتر ژ 200 كەس ب تۆمەتا گەندەلیێ دێ هێنە دەستەسەركرن
ئەندامەكێ جڤاتا نوونەرێن ئیراقێ ، ئاماژێ ب هەوا دەستەسەركرنا گەندەلكاران ژ ئالیێ حوكمەتا ئیراقێ ڤە دكەت و راگەهاند: بڕیار ئەوە بەری عەلی ئەلزەیدی سەرۆك وەزیرێن ئیراقێ سەرەدانا ئەمریكا بكەت، گرۆپێ گەندەلكار ل ئیراقێ ب دووماهی بهێت و هەموو بهێنە دەستەسەركرن.
د. زیرەك زێباری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت» دووڤچوونا دز و گەندەلكاران دێ بەردەوام بیت و ئێك ب ئێك دێ راكێشان ل پێشبەری دەستێ دادگەهێ. هەر كەسێ دەستەسەركرن، ناڤێ چەندین كەسێن دی ل گەل خۆ دئینیت. پشتی دەستەسەركرنا عەلی ئەلجومەیلی بریكارێ وەزارەتا پەترۆلا ئیراقێ، ناڤ د لیستێ دەستەیا نەزاهەیا ئیراقێ و حوكمەتا ئیراقێ دا گەلەك بووینە، دڤێت هەتا عەلی ئەلزەیدی دچیتە ئەمریكا، ئەڤ گرۆپە ب دووماهی بهێت و هەموو بهێنە دەستەسەركرن».
زێباری گوت ژی: «لیست گەلەك درێژە، پێشبینی دكەم هەتا بەری سەرەدانا ئەمریكا، 200 كەس بهێنە دەستەسەركرن، كو ل هەموو ئاستان ناڤێ وان هەیە، ژ فەرمانبەران هەتا وەزیران. ئەڤە قۆناغا ئێكێ یە، قۆناغا داهاتی دێ گەلەك هەستیار و ب نهێنی بیت، ژبەركو بەرپرسێن سەربازی یێن مەزن ژی د ناڤ دا هەنە. پارەیێن دزی و زێڕی ژی دێ دەستەسەر كەن، پێشبینی دهێتە كرن كو هزاران كێلۆ زێڕ ب پارەیێ دزیێ هاتبیتە كرین».
ناڤبری زێدەتر گۆت: «هەتا نوكە 11 پەرلەمانتار هاتینە دەستەسەركرن و هەژمارا وان دێ بیتە دوجاركی، پشكەك ژ وان ب مەرەما وێ چەندێ خو كرینە پەرلەمانتار دا پارێزبەندی هەبیت و نەهێنە دەستەسەركرن. پێزانین هەنە كو چەندین پەرلەمانتارێن خولا بۆری د ناڤ دا هەنە و كورد ژی د ناڤ دا هەنە. ژبلی وێ ژی، گەندەلییەكا مەزن د دەزگەهان دا هاتیە كرن، ژ سەرۆكاتییا كۆماری هەتا دەزگەهێن دی».
