چار پانزینخانه ل دهۆكێ هاتنه دائێخستن
دهۆك، له‌زگین جوقی:
پشتی هنده‌ك شۆفێران نه‌رازیبوونا خوه ل سه‌ر كوالیتیا پانزینێ دیاركری، ل پارێزگه‌ها دهۆكێ لژنه‌ك بۆ دووڤچوونا كوالیتیا پانزینێ هاته پێكئینان، د دووڤچوونا لژنێ دا دوهی چار پانزینخانه ژ به‌ر خرابیا كوالیتیا پانزینێ هاتنه دائێخستن.
محسن ته‌ها، رێڤه‌به‌رێ نه‌فت و كانزایان ل پارێزگه‌ها دهۆكێ بۆ رۆژناما ئه‌ڤرۆ گۆت: “رێڤه‌به‌ریا نه‌فت و كانزایان دووڤچوونا كوالیتیا پانزینێ دكه‌ت، پشتی مه دووڤچوونا كوالیتیا پانزینێ كری، دیاربوو هنده‌ك پانزینخانان ده‌ستكاری د كوالیتیا پانزینێ دا كریه و ئه‌و پانزینخانه هاتنه سزادان و هاتنه دائێخستن”.
گۆتژی: “ئه‌و پانزینخانه‌یێن هاتینه دائێخستن ژبه‌ر خرابیا كوالیتیا پانزینێ ب گوژمێن پاره‌ی ژی دێ هێنه سزادان، دیسا هنده‌ك ویستگه‌ه ژی یێن هاتینه ئاگه‌هداركرن هه‌كه پانزینا كوالیتیا وێ خراب بده‌نه شۆفێران دێ هێنه سزادان”.
