چالاكڤانه‌كێ زاخۆ: مه‌ترسیه‌كا مه‌زن ل سه‌ر پاشه‌ڕۆژا ئاڤا زاخۆ هه‌یه
زاخۆ، دلۆڤان هالۆ:
چالاكڤانه‌كێ باژێڕێ زاخۆ بۆ ڕۆژناما ئه‌ڤرۆ دیار كر كو د ده‌مێ بۆری دا پتر ژ 130 بیرێن ئاڤێ د ناڤ مه‌زره‌عێن باژێڕی و گوندێن سه‌ر ب زاخۆ ڤه هاتینه كۆلان بێی كۆنتڕۆل و پلانا حكومه‌تێ، ئه‌ڤێ چه‌ندێ ژی مه‌ترسیه‌كا مه‌زن ل سه‌ر پاشه‌ڕۆژا ئاڤا زاخۆ دروست كریه.
عادل خێركی، چالاكڤانێ باژێڕێ زاخۆ گۆت: “كۆلانا ڤان بیران دێ بیته ئێك ژ ئه‌گه‌رێن هشكبوونا ئه‌ردێ زاخۆ و كێمبوونا ئاڤا سه‌ر ئه‌رد ژی د نوكه و پاشه‌ڕۆژێ دا، له‌وما یا گرنگه ئه‌و 130 بیرێن ئاڤێ بكه‌ڤنه ژێر كۆنتڕۆل و پلانه‌كا بله‌ز یا حكومه‌تا هه‌رێما كوردستانێ”.
گۆتژی: “د پاشه‌ڕۆژێ دا ڕێژه‌یا مرۆڤان دێ زێده‌تر بیت و دێ پتر گرنگی ب كه‌رتێ گه‌شتیاری ل ده‌ڤه‌رێ هێته دان، ل وی ده‌می دێ مه پتر پێدڤی ب ئاڤێ هه‌بیت، له‌ورا كۆلانا بیرێن ئاڤێ و بكارئینانا وان یا نه‌دروست دێ بیته ئه‌گه‌ر ئاڤا ژێر ئه‌رد كێم و هشك ببیت و مه‌ترسی ب ڕێژه‌یا 50% ل سه‌ر كێمبوونا ئاڤا سه‌ر ئه‌ردی ژی ل زاخۆ په‌یدا بكه‌ت”.
عادل خێركی زێده‌تر گۆت: “پێدڤیه بێ گیرۆبوون حكومه‌تا هه‌رێما كوردستانێ ڕێگریێ ل ڤێ مه‌ترسیێ بكه‌ت و پلانه‌كێ بۆ كۆنتڕۆلكرنا بكارئینانا بیرته‌وازیێن مه‌زره‌عان دانیت، هه‌ر بیرته‌وازیه‌كا هه‌بوونا وێ ب پێدڤی نه‌هێته دیتن، بهێته داخستن و ئێدی مۆهله‌تێن به‌ڕه‌لایی بۆ كۆلانا بیرته‌وازیان نه‌هێنه‌دان، به‌لكو گرنگه مفا ژ ئاڤا سه‌ر ئه‌رد یا ڕووبارێ خابیری و هیزلی بهێته وه‌رگرتن”.
