چاڤدێره‌كێ سیاسی: قۆناغه‌كا نوو ل ئیرانێ ده‌ستپێكریه و دێ گه‌له‌ك گوهۆڕین روو ده‌ن
ئه‌ڤرۆ، هۆشه‌نگ:
چاڤدێره‌كێ سیاسی یێ رۆژهه‌لاتێ كوردستانێ راگه‌هاند كو ئێدی قۆناغه‌كا نوو ل ئیرانێ ده‌ستپێكریه و شورشا گه‌لێن ئیرانێ ب پێشه‌نگیا كوردان رۆژ ب رۆژێ به‌رفره‌هتر لێ دهێت و ئێدی ئیران ڤه‌ناگه‌ریته قۆناغا به‌ری شورشا ژینایێ.
ئیره‌ج ئه‌مینی چاڤدێرێ سیاسی د داخۆیانیه‌كێ دا بۆ ئه‌ڤرۆ دیار كر كو شورشا گه‌لێن ئیرانێ ب پێشه‌نگیا كوردان كه‌فتیه قۆناغه‌كا نوو، به‌ری دو رۆژان مه‌زنێ ئایینی یێ به‌لوچیان ب ناڤێ مولانا عه‌بدولحه‌مید داخواز ژ به‌رپرسێن ئیرانێ كر كو ئێدی ده‌ستان ژ توندوتیژیێ و كوشتنا خه‌لكی به‌رده‌ن، ناڤهاتی د ئاخڤتنه‌كا جه‌ماوه‌ری دا ب ره‌نگه‌كێ ئاشكرا دیار كر كو ئێدی قۆناغه‌كا نوو ل ئیرانێ ده‌ستپێكریه و دڤێت ریفراندۆم ل ئیرانێ بهێته كرن، چونكی خه‌لك ده‌ستهه‌لاتا نها قه‌بوول ناكه‌ن و گۆت: (پشتی ئاخڤتنا مولانا عه‌بدولحه‌مید خوه‌نیشادانان ل پارێزگه‌ها سیستان و به‌لوچستان ده‌ستپێكر و هێزێن ئێمناهیێ ژی ئێرشی خوه‌نیشاده‌ران كرن كو د ئه‌نجام دا نێزیكی بیست كه‌سان هاتنه كوشتن، د ده‌مێن سێ حه‌فتیێن بۆری دا تنێ ل ده‌ڤه‌را به‌لوچیان پتر ژ ١٣٠ كه‌سان هاتنه كوشتن و ژ به‌ر هندێ ژی نها ره‌وشا ناڤخوه‌یی یا ئیرانێ گه‌له‌ك ئالۆز بوویه).
چاڤدێرێ سیاسی ئه‌و یه‌ك ژی دیار كر كو نها ل گه‌له‌ك باژێرێن مه‌زن یێن ئیرانێ خوه‌نیشادان به‌رفره‌هتر لێ هاتینه و ب تایبه‌تی ل باژێرێ كه‌ره‌ج خه‌لكی ئێرشی هێزێن ئێمناهیێ كرن و چه‌ندین پۆلیس و هێزێن دی هاتنه كوشتن و ئه‌و یه‌ك ژی نیشا دده‌ت كو ئێدی خه‌لك ژ ده‌ستهه‌لاتێ ناترسن، ره‌وشا نها نیشا دده‌ت كو هه‌موو گه‌لێن ئیرانێ ژ ده‌ستهه‌لاتێ بێزار بووینه و گۆت: (ژ به‌ر هندێ ژی ئه‌ز دبێژم كو قۆناغه‌كا نوو ل ئیرانێ ده‌ستپێكریه و ئێدی ئیران ب چو ره‌نگه‌كێ ڤه‌ناگه‌ریته قۆناغا به‌ری شورشا ژینایێ و هه‌لوه‌ستێ سه‌رۆكێ ئه‌مریكا و به‌رپرسێن ئێكه‌تیا ئۆرۆپا ژی نیشا دده‌ت كو وان هه‌ست ب هندێ كرینه دێ گوهۆرین ل ئیرانێ روو ده‌ن، ژ به‌ر هندێ ژی به‌رپرسێن ئیرانێ جاره‌كا دی دخوازن ب سه‌ركوتكرنێ خه‌لكی بێده‌نگ بكه‌ن لێ ٥٠ رۆژ بۆرین و خوه‌نیشادان ژی به‌رفره‌هتر لێ هاتینه و ئاگرێ شورشێ ل هه‌موو ئیرانێ به‌لاڤ بوویه).
ل ئالیێ دی وه‌زاره‌تا ده‌رڤه یا ئه‌مریكا ژی دوهی راگه‌هاند كو وان دانوستاندن بۆ به‌رنامێ ئه‌تۆمی ل گه‌ل ئیرانێ داینه راگرتن، چونكی ئه‌و یه‌ك د رۆژه‌ڤا ئه‌مریكا دا نینه و ئه‌مریكا پشته‌ڤانیێ ل خوه‌نیشادانێن نها ل ئیرانێ دكه‌ت.
ل ئالیێ دی هه‌ر دو وه‌لاتێن ئه‌لمانیا و بریتانیا ژی دوهی ب توندی هۆشداری دانه ئیرانێ كو نابیت ب چو ره‌نگه‌كێ مۆشه‌كێن بالیستی بده‌ته رۆسیا، هه‌كه ئیران ده‌ست ب كاره‌كێ وه‌سا بكه‌ت ئه‌و یه‌ك دێ ئه‌نجامێن خوه یێن گه‌له‌ك خراب بۆ ئیرانێ هه‌بیت.
