چاڤلێكرنا كۆرە و كارتێكرنا وێ ل سەر جڤاكێ
حاجی بێسكی
چاڤلێكرنا كوورە نە تەنێ رەفتارەكا تاكەكەسییە، بەلكو «نەخۆشیەكا جڤاكی یە» كو ب شێوەیەكێ راستەوخۆ كار دكەتە سەر بنەمایێن خێزانێ و پەیوەندیێن مرۆڤایەتی. هەر جۆرەكێ چاڤلێكرنێ باجەكا تایبەت یا هەی كو جڤاك ژ سەقامگیری و تەباییا خۆ ددەت.
ئەڤە ژی هندەك ژ وان كارتێكرنانە ب ڤان جۆران:
١. چاڤلێكرنا ماددی و هەڤڕكییا جڤاكی:
ئەڤ جۆرە دبیتە ئەگەرێ دروستبوونا «هەڤبەڕكرنەكا بەردەوام» د ناڤبەرا خزم و هەڤالان دا.
كارتێكرن: روینشتنێن جڤاكی ژ جهێ حەزژێكرنێ دگوهۆرن بۆ جهێ «نیشادانا» تشتێن گرانبها (وەك ترۆمبێل، مۆبایل، یان دیكۆرێن مالێ).
ئەنجاما وێ پەیدابوونا حەسویدیێ و چاڤبەریێ، و لاوازبوونا پەیوەندیێن دلپاك، چونكی پەیوەندی ل سەر «دیاركرنێ» دهێتە ئ
اڤاكرن نەك ل سەر بهایێن مرۆڤایەتی.
٢. چاڤلێكرنا شێوازێ ژیانێ یێ بیانی:
دەمێ خێزان هندەك تشتان دكەن كو نە ل گەل مەژی و نەریتێن وان دگونجن تەنێ ژبەر كو یێن دی دكەن، «كەلێنەكا مەزن» د ناڤبەرا نەوەیان دا دروست دبیت.
كارتێكرن: گەنج ژ رەوشت و تیتالێن باب و كالان دویر دكەڤن، نە ژبەر قەناعەتێ، بەلكو تەنێ بۆ هندێ كو وەكی «ترێندێن» سۆشیال میدیایێ دیار ببن.
ئەنجام ژ دەستدانا لێكگەهشتنێ د ناڤبەرا دایك و باب و زارۆكان دا، و لاوازبوونا شیرازێ خێزانێ.
٣. چاڤلێكرن د هەلكەفت و ئەركێن جڤاكی دا.. گوهۆرینا هەلكەفتان (وەك هەڤژینی، جەژن، یان تازیان) بۆ رێورەسمێن گران و ب زەحمەت تەنێ بۆ هندێ كو بێژن «فلان كەسی وەكر».
كارتێكرن: ئەركێن جڤاكی دبنە «بارەكێ گران» ل سەر ملێن مرۆڤی ل شوینا كو ببنە دەلیڤەیەك بۆ پێكڤەژیانێ.
ئەنجام ژێ خەلك هێدی هێدی ژ جڤاكی دویر دكەڤن یان پشكداریێ د چو تشتان دا ناكەن دا كو تووشی تێچوویێن زێدە نەبن، ئەڤە ژی دبیتە ئەگەرێ «تەنیابوونا جڤاكی».
٤. چاڤلێكرنا هزری و ژ دەستدانا كەسایەتیێ.
دەمێ مرۆڤ رایا خەلكێ دی بێی هزركرن وەردگریت، ئەو «دەنگێ خۆ یێ تایبەت» ژ دەست ددەت.
كارتێكرن: پەیوەندی دبنە تشتەكێ سەرپێیی (سطحی)، هەمی هەمان ئاخفتن و درۆشمان دووبارە دكەن.
ئەنجام: مرۆڤاتی و داهێنان كێم دبیت، و جڤاك دبیتە كۆمەكا خەلكێ كو بێی ئارمانج ب دو ئێلەكێ دكەڤن، ئەڤە ژی برینداركرنا ناسنامەیا مە یا رەوشەنبیری یە.
ب كورتی دبێژین هشیاربوون ل سەر ڤان كارتێكرنان گاڤا ئێكێ یە بۆ پاراستنا جڤاكی، گرتنا تشتێن باش ژ یێن دی نیشانا پێشكەفتنێ یە، بەلێ «چاڤلێكرنا كوورە» یا كو مێشك و بارودۆخێ مرۆڤی ل بەر چاڤ وەرناگریت، ئەو تشتە یێ كو بنیاتێ جڤاكێ مە دهەلوەشینیت.
