چاڤەڕێ ڕاپۆرتا سەرپەرشتێ یاریێ نە و دێ سزایێن توند هەبن
دادڤانێ یارییا زاخۆ و نەورۆز زەید سامر ژ نەچاری یاریی ڕاوەستاندن پشتی د خولەكا 81ێ دا چەند ژ جەماوەرێن یانەیا نەورۆز هاتینە دناڤ یاریگەهێ دا و توندوتیژی دگەل یاریزان و جەماوەرێ یانەیا زاخۆ پەیداكری، ئەوا ل شەڤا سێ شەمبییا بۆری ژ چارچووڤەیێ گەڕا 29ێ یا خولا ستێرێن ئیراقێ یا فوتبۆلێ ل یاریگەها نەورۆز ل باژێرێ سلێمانیێ هاتییە كرن و یاری بێ گۆل یا وەكهەڤبوو.
دلژار عەدنان ئەندامێ كارگێرییا یانەیا زاخۆ گۆت: نێزیكی 36 ژ پشتەڤانێن یانەیا زاخۆ تووشی هنگاڤتنێن جودا بووینە، سۆپاس بۆ خودێ برینانێن وان سڤك بووینە، بۆ مە گرنگ سلامەتییا هەموو شاندێ یانەیا زاخۆ و جەماوەری بوویە، زوور دلگرانن و هیڤیدارین ژ جەماوەرێ زاخۆ ل سەر خوەبن.
دنڤێسارەكا فەرمی دا فدراسیۆنا فوتبۆلا ئیراقێ بەلاڤكرییە، ب لیبۆرین ڤە ئەو روودانێن یارییا نەورۆز و زاخۆ ل یاریگەها نەورۆز دا هاتینە پێش جهێ نە ڕازیبوونێ یە، هەرچەندە ددەمەكی دا ئەم كەیفخوەشین دناڤا یاریگەهێن كوردستان یدا جەماوەرەكێ ئێكجار مەزن دهێنە پێش یاریێن خولا ستێرێن ئیراقێ و بوویە ئەگەرەك جوانی و هەڤڕكییەكا باش دناڤا یاریگەهێ دا پەیدا بكەت.
هەروەسان دیاركر، لێ مخابن ئەوا د ناڤا یاریگەها نەورۆز دا هاتییە پێش بنپێكرنە ب نامەیا جوان یا پشتەڤانییا و گیانێ وەرزشییە ئەوا ئەم هەردەم كار بۆ دكەین، لەوما ژی ئەوا چێبوویی هیچ ڕەنگەكی نا هێتە قەبۆلكرن و دێ چاڤەڕێ ڕاپۆرتێن سەرپەرشتیارێن یاریێ و ئارامیێ و دادڤانێ یاریێ بین، زووترین كۆمبوون و بڕیارێن توند دێ هەبن، ئەوا چێبوویی دێ بیتە دربەك ب شیانێن مە یێن ڤەگەڕاندنا هێز و پێشكەفتنا وەرزشا ئیراقێ.
ل دووڤ بڕگەیێن سزایێن فدراسیۆنا فوتبۆلا ئیراقێ، هەردەكێ پشتەڤان هاتە دناڤ یاریگەهێ دا دادڤانی مافێ هەیی یاریێ ب راوەستینت بۆ سلامەتییا یاریزانێن هەردو تیمان، هەموو كادرێن یانەیان و دادڤانان، دیسان ئەو یانەیا مێڤاندارا دبیت ب3-چنە بهێتە خوسارەت كرن و هەتا سێ یارییان جەماوەرێ وێ نە هێتە پێش یارییان و سزادان دبیت دناڤبەرا 30 بۆ 60 ملیۆن دیناران بیت لێ بڕیارا دووماهیێ دێ ل دووڤ ڕاپۆرتا سەرپەرشت و دادڤانێن یاریێ بیت.
