چ ساسنۆر ل سه‌ر بازارێ ئونلاین نینن
هه‌ولێر، سولین سلێمان:
نها ل هه‌موو جیهانێ كار ب بازارێ ئونلاین دهێته كرن ژ بو ئاسان كرنا ژیانا خه‌لكی یا روژانه، بێگومان پێشكه‌فتنا ته‌كنولوژیایێ پێشڤه‌چونێن باش ل گه‌ل خوه ئیناینه، لێ هنده‌ك ده‌ما كڕینا كه‌لوپه‌لێن ئونلاین ب تایبه‌تی ل كوردستانێ ئاریشه ژ سه‌خته‌یا كوالێتیا وان چێدبن.
شیلان حوسێن ڤه‌كوله‌ر د بیاڤێ جڤاكی سه‌باره‌ت سه‌خته‌كاریا كڕینا كه‌لوپه‌لان ب شێوازێ ئونلاین بۆ رۆژناما ئه‌ڤرۆ دیار كر كو به‌لاڤبونا كرین و فروتنێ ب رێیا ئونلاین مێژویا وێ ڤه‌دگه‌ریت ژ بۆ چه‌ند ساله‌كا به‌ری نۆكه و گۆت: ب دیتنا من هیچ سانسوره‌ك ل سه‌ر بازارێ ئونلاینا په‌یچێن كوردی نینه، چونكی هه‌ر كه‌سه‌ك ل دووڤ حه‌زا خوه كڕین و فروتنێ دكه‌ت ئه‌ف چه‌نده ژی ئاریشا ژ بو كڕیارا دروست دكه‌ن، ژبه‌ر خرابیا كوالێتیا وان. بو نموونه وێنه‌ك ل په‌یجه‌كێ دهێته دانان ئه‌و كه‌س ژی دبینیت تشته‌كێ جانه، لێ نزانیت كو وێنی وی تشتی ب كامیره‌یێن پێشكه‌فتی دهێته گرتن گه‌له‌ك یا جیاوازه ژ وێنی وێ یێ راستی ب ڤی شێوه‌ی پتریا په‌یچێن كوردی خه‌لكی سه‌ردا دبه‌ن.
شیلانێ به‌حس ل چاره‌سه‌ریا ڤێ چه‌ندێ كر و گۆت: هنده‌ك رێك یێن هه‌ین ژبو كێمكرنا ڤان ئاریشان ل سه‌ر بازارێ ئونلاین ئه‌و ژی پێدڤیه حوكمه‌ت ب جدی كار ل سه‌ر قانوونه‌كێ بكه‌ت تایبه‌ت بیت ب ڤێ چه‌ندێ سه‌ر ئه‌و په‌یجێن خه‌لكی ب كه‌لوپه‌لێن سه‌خته سه‌ردا دبه‌ن پارێن وان ژی ب هه‌روه دبه‌ن هه‌روه‌سا به‌لاڤكرنا هشیاریا د ده‌زگه‌هێن راگه‌هاندنێ دا كو تووشی كڕینا كه‌لوپه‌لێن سه‌خته نه‌بن ژ په‌یجێن سه‌خته.
پارێزه‌ر زێبار هه‌ركی ده‌ربارێ ئه‌و كه‌لوپه‌لێن ب رێیا ئونلاین دهێنه فروتن ب شێوازه‌كێ سه‌خته دیار كر كو هه‌تا نۆكه هیچ قانوون و ده‌قه‌ك تایبه‌ت ب كالایێن ئونلاین ناهاتیه دانان كو خه‌لك بشێت داخوازا ماف و قه‌ره‌بویا خوه بكه‌ت و گۆت: هه‌تا نۆكه ل په‌رله‌مانی قانوونه‌كا تایبه‌ت ب ڤێ چه‌ندێ نینه و چه‌ندین جارا ژی ل خولێن په‌رله‌مانی ئه‌و بزاڤ هاتینه كرن كو قانوونه‌ك تایبه‌ت ژ بۆ ڤێ چه‌ندێ بهێته دانان هه‌تا زۆر ئیمزا ژی ژ بۆ هاتینه كومكرن لێ وه‌كی دیار ب ده‌یهن و هزاران خه‌لك ب رێیا كڕینا كه‌لوپه‌لێن ئونلاین زه‌ره‌رمه‌ند بوینه.
پارێزه‌ری د به‌رده‌وامیا ئاخفتنێن خوه دا گۆت: (لێ چاره‌سه‌ریه‌كا دی هه‌یه كو خه‌لك دشێت ب ڤێ رێیی داخوازا ماف و قه‌ره‌بویا خوه ژی بكه‌ت ئه‌و ژی ماددێ 456 ب رێیا ڤی ماده‌ی هه‌ر كه‌سه‌ك دشێت سكالایێ ل سه‌ر وی لایه‌نی تومار بكه‌ت كو زه‌ره‌رمه‌ند بویه چ كالا كری بیت ب رێیا ئونلاین سه‌خته ده‌رچبیت یان هه‌ر تشته‌كێ دی دشێت قه‌ره‌بویا خوه وه‌ربگریت.
