ژبەر ناكۆكیان هەلبژارتنێن دو یانەیێن وەرزشی هاتینە پاشئێخستن
ئەڤرۆ
بۆ جارا دویێ ل دووڤ ئێك پرۆسەیا هەلبژارتنێن دەستەكا كارگێریا یانەیا شێلادزێ و تەناهی دهێنە پاشئێخستن پشتی ناكۆكی ل سەر ناڤێن لیستەیا دەستەكا گشتی یا ئەندامان و مافێ خوە بەربژاركرنێ پەیدابوویی.
بڕیار بوو ل دەستپێكا ئادارا بۆری و بەری جەژنا نەورۆزێ هەلبژارتنێن یانەیێن شێلادزێ و تەناهی هاتبانە ئەنجامدان لدووڤ خشتەیێ رێڤەبەریا وەرزشی ل پارێزگەها دهۆكێ بۆ پێنچ یانەیێن نوو داناین ئەوێن هەلبژارتنیێن خوە نەكرین كو د ماوەیێ حەفتیەكێ دا ئەنجامبدەن و هەموو لایەن بەری وێ ب 10رۆژان هاتبوونە ئاگەهداركرن ل دووڤ رێنما و یاسایا ئیراقێ یا 1976ێ، سێ یانەیان پابەندبوون د هەلبژارتن ئەنجامدابوون ئەوژی، دینارتە، باتیفا و پیرس لێ ژبەر نە رێكخستنا لیستەیا ناڤێن خوە بەربژاركرنێ و ئەندامێن مافێ دەنگدانێ و دیسان نەرازیبوونا هندەك لایەنێن نێزك ژ هەردو یانەیان بوو ئەگەر ناكۆكی پەیدابن و بوو جارا دویێ ل دووڤ ئێك ب نەچاری رێڤەبەریا وەرزشی ل پارێزگەهێ هەلبژارتنێن وان پاشئێخستن.
ل دووڤ ژێدەرێن نێزیك ژ هەردو یانەیان ئەوە كو هندەك ئەندام و كەسێن نوو ب لیستەیێن جودا یێن كارگێریێن یانەیا نەرازیبوونا خوە دیاركرینە ل سەر شێوازێ لیستەیا دەستەكا ئەوا ژلایێ كارگێریێن نوكە دروستكرین و داخوازن هندەك ناڤێن دی ژی بهێنە زێدەكرن، دیسان ناكۆكی ل سەر پۆستێن سەرۆك یانە و جێگر و سكرتێرێ یانێ هەنە و مایتكرنا دەرڤەیی یانێ و دەستەكا گشتی ئەگەرەكێ دی یە.
ل دووڤ پێشبینیان د ڤێ حەفتیێ دا دبیت رێڤەبەریا وەرزشی ل دهۆكێ ژڤانەكێ نوو و دووماهیێ بۆ هەلبژارتنێن هەردو یانەیان دیاربكەت.
