ژبەر گۆتنا سترانێن كوردی پێنج سالان هاتە زیندانكرن
شاكر ئەتروشی
سترانبێژ (دجلە رۆژهەلاتی) د دیدارەكێ دا بۆ رۆژنامەیا ئەڤرۆ گۆت: ئەگەرێن بێدەنگیا من بۆ دەمێ چەند سالان ئەو بوو، كو ل رۆژهەلاتێ كوردستانێ من چەند ئاهەنگ گێڕان و ستران ب كوردی گۆتن و پتریا سترانێن من شۆڕەشگێڕی و نەتەوی بوون، لەورا دەستهەلاتا ئیرانێ ئەز گرتم و پێنج سالان كرمە د زیندانا باژێرێ ئۆرمیێ دا و پشتی ئەز دەركەفتیم نەچار بووم بچمە ئۆرۆپا و نوكە ل وەلاتێ (ئەلمانیا) دژیم ول ڤێرە بەردەوام دچمە ئاهەنگ و شەهیانان، ب تایبەت ژی ل هەردو وەلاتێن (سویسرا و دانیمارك) هەروەسا دووماهی كارێ من یێ هونەری كو نوكە ئەز ل سەر كاردكەم چێكرنا دو كلیپانە، یا ئێكێ ئەڤینی یە و یا دویێ ل دۆر ئەڤینا وەلاتی یە، كو ژ هەلبەستێن (ڕزگار كێستەیی) یە و من ل بەرە پشتی دو حەفتیێن دی بهێمە دهۆكێ.
هەروەسا گۆت: ئەز حەزدكەم بۆ نەورۆزا بهێت پشكداریێ د ئاهەنگا ئاكرێ یان زاخۆ دا بكەم، هەروەسا هەكە دەلیڤە هەبیت و پشتەڤانیا من بكەن دێ كونسێرتەكێ ل دهۆكێ ژی گێڕم، بۆ زانین ئەز گەلەك ل باژێر و وەلاتێن ئورۆپی گەڕیایمە، لێ پتری هەموویان بهێنا من ل دهۆكێ دهێت و هەكە رۆژەك بهێت ئەز ئورۆپا بجه بهێلم چو پێ نەڤێت دێ هەلبژارتنا من پارێزگەها دهۆكێ بیت و دێ هێم ژیێ خۆ یێ مای ل گەل خویشك و برایێن خۆ یێن دهۆكێ بۆرینم و من دڤێت بێژم ئەز كچەكا كوردستانی مە، ئانكو نەبەس كچا رۆژهەلاتی یان یان رۆژئاڤایی، یانژی باكوری یان باشوری مە، بەلكو ئەز كــــــــــوردستانێ مە كچا هەرچار پارچەیێـــــــــــــــــــن كوردستانێ مە.
