ژ ئاخفتنا وەستیام

بلند محمد

ل بن چەترا دالەهیێن خوە
غەربیبیا ئاخێ دكر
سنوور دسۆر بوون و
مەی دجام دا فیردەوسا ئاشتبوونێ بوو
ل بەر تاڤیكێن بارانێ
تنازێن چووچكان بالۆرەیێن ئەڤینێ بوون،
لێ، ل بن بەلگەكێ باف فهێت هەر تشت دپێتیبوونێ دسەتمی
بیردانك همبانەكا سمتی بوو
ها…گوڕگوڕا هەورایە
حەزێن تێك دئالزن
هەموو گاتایێن ژینێ
ژێ درژن
ل بانێ ژۆرێ
هەر پێنگاڤەكێ ستێرەك دبەهیت
ئۆمێدەك دبیتە تۆز
باهۆز ب كەنگرپەڕا
پایزێ دئینتە لێڤێ
بهارێ دبەتە هۆڕێ‌
پیربوون ژی دووماهی هەناسەیە
من و تە بێی دەولەت
دبەتە گۆڕێ.
دلێ من رێڤینگەكێ بێ سیهوانەیە
چەوچەوا هەورایە و
دگەرما هاڤینێ دا دهلنگڤت وپایزان دكەتە بڕمیت
دگوهێن چیایی دا كەبارێ رادهێلیت
زەمین دبیتە گلۆمچكەكا نەرم
ئەڤین ما تو چەندا رەقی
نەدرەڤی
نەدشكێی
نەدكەڤی
نەدهێی
تە ژی وەكو ستێرەكا مری هلاویستیمە
تو چەند حەز ژ ئێشانێ دكەی
ماچیە وێ ئێشانێ بكەیە فڕەكا ژەهرێ
دا ژ ئێشانان هاویش ببی؟
ژ وەستیانێ داكەڤیە سەر تەختێ ئارامیێ
و گۆڕێ مە ب نفرینەكێ تەلقین بكەی.

کۆمێنتا تە