ژ ئه‌گه‌رێ جینۆسایدێ 2700 زارۆیێن ئێزدی بێ دایكوباب دژین
ئه‌ڤرۆ، ئه‌میر ئه‌ترووشی:
رێڤه‌به‌رێ پێكڤه ژیانێ ل وه‌زاره‌تا ئه‌وقافا هه‌رێما كوردستانێ راگه‌هاند، پشتی هێرشا رێكخراوا تیرۆری یا داعش ل سالا 2014، هژماره‌كا زۆر یا قوربانیان ل هه‌رێما كوردستانێ هاتنه دان و دڤێ هێرشێ دا 1293 كوردێن ئێزدی بوونه قوربانی و ئه‌ڤه ژی بوو ئه‌گه‌ر كو هه‌تا نوكه ژی ژ ئه‌گه‌رێ وێ هێرشێ، 2700 زارۆیێن ئێزدی ماینه بێ دایكوباب و وه‌كو زارۆیێن ئێتیم و سێوی دژین و هێشتا ژی رۆفاتێن 763 كوردێن ئێزدی نه‌هاتینه دیتن و د به‌رزه‌نه.
ئه‌میر ئوسمان، رێڤه‌به‌رێ پێكڤه ژیانێ ل وه‌زاره‌تا ئه‌وقافا هه‌رێما كوردستانێ بۆ ئه‌ڤرۆ دیار كر، ل هه‌رێما كوردستانێ پتریا ئاكنجیان موسلمانن و ل دووڤ را پێكهاتا ئێزدی نه كو ل پلا دوویێ دهێن ل دووڤ رێژا ئاكنجیان، چونكو هه‌تا به‌ری شه‌رێ داعش ژی ل هه‌رێما كوردستانێ نێزیكی 550 هزار كه‌سان بوون، به‌لێ پشتی شه‌رێ داعش، ئێزدیان هژماره‌كا زۆر یا قوربانیان دا و نها هژمارا وان دگه‌هیته 360 هزار كه‌سان.
زێده‌تر گۆت: ل سالا 2014 رێكخراوا تیرۆری یا داعش نێزیكی شه‌ش هزار و 417 كه‌س ره‌ڤاندن و هه‌تا نوكه شیاینه سێ هزار و 550 كه‌سان رزگاربكه‌ن و ئه‌وێن ب ده‌ستێ داعشێ هاتینه كۆشتن و هێشتا رۆفاتێن وان نه‌هاتینه دیتن نێزیكی 2763 كه‌سانه و ژ وان ژی 1293 ژ ره‌گه‌زێ مێ نه.
ئه‌میر ئوسمان خویاژی كر كو هه‌تا نوكه 82 گۆرێن ب كۆمی ل شنگال هاتینه دتن و 68 مه‌زارگه‌هێن ئێزدیان ژی ب ده‌ستێن تیرۆرستێن داعش هاتینه ژناڤبرن و نێزیكی 100 هزار ئێزدیان ژی بۆ ده‌رڤه‌ی وه‌لاتی كۆچكرینه و گۆت: نوكه 335 هزار كوردێن ئێزدی دناڤا كه‌مپان دا دژین و 150 هزار ژی ڤه‌گه‌ریاینه سه‌ر مال و مولكێم خوه ل شنگال.
میر جه‌هوه‌ر عه‌لی به‌گ، وه‌كیلێ میرێ ئێزدیان بۆ كارۆبارێن په‌یوه‌ندیان دیار كر، گه‌له‌ك كارتێكرن ل سه‌ر ره‌وشا خه‌لكێ شنگال بوویه، چونكو خه‌لك دوو دل بووینه و نه‌شێن بزڤرنه شنگال، نوكه ژی خه‌لكێ شنگال چاڤه‌رێ بجهئینانا رێكه‌فتنی دكه‌ن و هه‌رده‌مێ رێكه‌فتن بجه هات، دێ باوه‌ری بۆ خه‌لكێ شنگال دروست بیت و دێ زڤرنه سه‌ر جهێن خۆ، چونكو دێ ئاڤه‌دانی و ته‌ناهی ل شنگال په‌یدابیت، له‌ورا ژی داخوازێ ژ حكومه‌تا هه‌رێما كوردستانێ و عێراقی دكه‌ین ده‌مێ پێكئینانا حكومه‌تا نوی یا عیراقَی كار بهێته كرن بۆ زڤرینا ئاواران.
ئاشكه‌را كر، ل دووڤ زانیاریان هه‌تا 400 ره‌ڤاندیێن ئێزدی دناڤ كه‌مپا هولێ دا د ناڤ خێزانێن تیرۆرستێن داعش دا هه‌نه، مه هیڤیه حكومه‌تا عیراقَی ل سه‌ر ڤی بابه‌تی بێده‌نگ نه‌بیت و هنده‌ك لیژنا دروست بكه‌ت بچنه دناڤ كه‌مپا هولێ دا بۆ رزگاركرنا ره‌ڤاندیێن ئێزدی، مه زانیاری هه‌نه ئێزدی دناڤ كه‌مپا هولێ دا هه‌نه و هاتینه ڤه‌شارتن دناڤ خێزانێن داعشێ دا، هه‌تا ئه‌و ره‌ڤاندیێن دناڤ كه‌مپێ دا نه‌وێرن بێژن ئه‌م ئێزدی نه، چونكو گه‌له‌ك فشارا خێزانێن داعش ل سه‌ر ره‌ڤاندیان هه‌یه هه‌تا نوكه ژی حوكمی داعش ناڤ كه‌مپا هولێ دا هه‌یه”.
ناڤهاتی ئه‌و ژی خویا كر، 84 هزار دونه‌مێن ئه‌ردی چاندنێ یێن ئێزدی یێن هاتینه داگیركرن ل شنگال ژلایێ عه‌ره‌بێن ده‌ڤه‌رێ ڤه ئه‌ڤه ڤه‌دگه‌ریت بۆ سالا 1974 ئه‌ڤ ئه‌رده هه‌موو یێ خه‌لكێ مه هوزا سمۆقیا، قه‌یرانا یه هه‌تا ئه‌ڤرۆكه ژی هێشتا چاره‌سه‌رنه‌بوویه و ئه‌م هیڤیدارین ئه‌ڤ ئاریشه چاره‌سه‌رببیت”.
