ژ به‌ر ڤى ئه‌گه‌رى خودانێن پرۆژێن مریشكان يێ له‌زێ ل فروتنا وان دكه‌ن
ئه‌ڤرۆ نیوز ، نه‌وزاد هلورى:
نها هه‌رێما كوردستانێ به‌ر ب وه‌رزێ سه‌رمایێ دچیت و ئه‌ڤ یه‌ك ژى بویه سه‌ده‌م كو نه‌خوشى دناڤ مریشكان دا بهێنه ڤه‌گوهاستن و ڤێ یه‌كێ ژى ترس لده‌ف خودانێن پرۆژێن مریشكان درۆستكریه و دخوازن ب زوترین ده‌م مریشكێن خوه بفروشن.
جیهاد موسته‌فا ئێكه ژ خودانێن پرۆژێن مریشكان ل سنوورێ قه‌زا ئامێدیێ بۆ ئه‌ڤرۆ نیوز گۆت: ( دنهادا ئه‌م وه‌كو خودانێن مریشكان ژ ترسا به‌لاڤبوونا نه‌خوشیان و مرنا مریشكان نه‌چارین هه‌موو مریشكێن خوه بفروشین ، دنهادا بهایێ مریشكان ژى 700 بو 850 دیناران دهێته فروت نكو ئه‌ڤ یه‌ك ژى كێمترین بهایه د دوو سالێن بورى دا ).
زێده‌تر گۆت: ( ل گوره‌ى رێنمایێن وه‌زاره‌تێ هه‌رده‌ما نه‌خوشى گه‌هشته مریشكان نابیت بهێنه فروتن ژ به‌رڤێ به‌رى كو نه‌خوشى بهێت ئه‌م د فروشین ژ به‌ركو سالانه ل ده‌ستپێكا وه‌رزێ سه‌رمایێ نه‌خوشى دهێت ).
حه‌جى بازى ئه‌و ژى ئێكه‌ژ خودانێن پرۆژێن مریشكان ل ده‌ڤه‌را بارزان بو ئه‌ڤرۆ نیوز گۆت: ( كار و كه‌سابه‌تا مه لسه‌ر ب خودانكرنا پرۆژێن مریشكایه و چو ژبلى ئه‌وان چوو كارێن دن ناكه‌ین ، و سالانه ژ به‌ر نه‌ساخیا مریشكان گه‌له‌ك زیان ب مه دكه‌ڤن ، ژبه‌رڤى َداكو گه‌له‌ك زیان لسه‌ر مه نه‌بیت نه‌چارن مریشكێن خوه بفروشین كو ئه‌ڤ یه‌ك ژى ژ ترسا به‌لاڤبوونا نه‌ساخیێ یه ، به‌لێ ئه‌گه‌ر حكومه‌ت هاریكاریێن پێدڤى بو رێگریكرن ل به‌لاڤبوونا نه‌خوشیان بده‌تن مه ئه‌م نه دنه‌چارین كو مریشكێن خوه زویكا بفروشین).
زێده‌تر گۆت: ( پرانیا جاران ژى مریشكێن مه ل بازارێن نافخو دهێنه فروتن و دیاره ژى كو ل هه‌رێما كوردستانێ ژ به‌ر قه‌یرانا دارایى و گیروبوچنا موچه‌یان گه‌له‌ك داخوازى لسه‌ر كرینا مریشكان نه‌مایه ، به‌رى نها مریشكێن مه دچنه موسل و به‌سرا و باشوورێ عیراقێ به‌لێ نها ژبه‌ر شه‌رێ حه‌شدا شه‌عبى رێگا هه‌ولێر بو كه‌ركوك بو باشوورێ عیراقێ لبه‌ر مه‌ترسیێ یه ).