ژ بەر نزمبوونا ئاستێ ئاڤا دیجلە پرۆژێ ئاڤا خانكێ هاتیە راوەستاندن
ئەڤرۆ
سێمێل، سالار دۆسكی:
رێڤەبەرێ فەرمانگەها ئاڤا سێمێلێ ئاشكراكر، ژ بەر نزمبوونا ئاستێ ئاڤێ ل رووبارێ دیجلە ماوەیەكە پرۆژێ ئاڤا ناحیا خانكێ هاتیە راوەستاندن و نەچار بووینە ئاڤا سێمێلێ بۆ بهێتە كێشان، دیاركر ژی، ل سالا بوری شیاینە ئاڤێ بگەهیننە 80% ژ تاخێن نوو ل قەزا ناڤبری.
ئەندازیار ئەحمەد سلێمان زاهر، رێڤەبەرێ فەرمانگەها ئاڤا سێمێلێ بۆ رۆژناما ئەڤرۆ دیار كر، دو ژێدەر بۆ ئاڤا سێمێل هەنە، ئاڤا ژێدەر ئەرد دو پرۆژە نە (پرۆژێ ئاڤا دهۆكێ یێ سەرەكی و ئاڤا خانكێ) پرۆژێ دهۆك 500 مەتر چارگوشا ل دەمژمێرەكێ بۆ سەنتەرێ سێمێلێ و كۆمەلگەهێن (مسریك، تەناهی، حەوشك، كێڤلا، خراب دێمی، شق ئەڤرۆ ستی) دهێتە ڤەگوهاستن، پرۆژێ ئاڤا خانكێ یا سەر ئەرد هاتیە راوستاندن و گەلەك ئەگەر هەنە، رووبارێ دیجلە گەلەك كێم بوویە و بوویە ئەگەر ئاستێ بەنداڤا مووسل گەلەك نزم بوویە و ئێدی نەشێین ئاڤێ بكێشێن، نوكە ژ سێمێل ئاڤێ دگەهینینە خانكێ، ژێدەرێ بن ئەرد ئانكو بیرێن ئاڤێ ل سنورێ مە 175 بیر هەنە و ل پتریا جهان بەلاڤەكرینە و ل دووڤ پێدڤیان هاتینە كولان، سێ سالێن هشكەسالیێ كارتێكرن ل سەر نەكریە، بەلێ ئەگەر هشكە سالی بەردەوام بوو دێ كارتێكرن ل ڤان بیران هێتەكرن.
رێڤەبەرێ فەرمانگەها سێمێل ئەو ژی گۆت: سێ پلان هاتینە دانان ل گەل ئاڤا دهۆكێ كو پرۆژێ ئاڤا دهۆكێ یێ كەڤن (چەم بەرەكات) بهێتە نووژەنكرن و بكەڤیتە كاری، ژێدەرێ ئاڤا دهۆك و سێمێل بهێتە زێدەكرن و بزاڤ دهێتەكرن ئەڤ پرۆژە بهێتە بجهئینان، پلان هەیە هێلا كێشانا ئاڤا خانكێ ژ بەنداڤا مووسل بهێتە نووژەنكرن، پرۆژەكێ نوو هەیە ب ناڤێ پرۆژێ ئاڤا بەغلوجە و دابینكرنا ئاڤێ یە ژ رووبارێ دیجلە ل باتێل كو بۆ گەلەك كومەلگەه و گوندان بهێتە دابینكرن.
رێڤەبەرێ فەرمانگەها ئاڤا سێمێلێ سەر ب رێڤەبەریا ئاڤا دەوروبەرێن دهۆكێ ڤەیە، سنورێ فەرمانگەها ئاڤا سێمێلێ سەنتەرێ قەزا سێمێلێ ل گەل ناحیێن (باتێل، خانكێ، كومەلگەها تەناهی و كێڤێل و مسیریكی) و چەندین كومەلگەهێن سەر ب ناحیا باتێل و قەزا سێمێلێ ڤە و نێزیكی 70 گوندێن ئاڤاكری دەسپێكێ دكەت ژ كێڤلا هەتا زالگەها ئالوكا و هەتا دگەهیتە تونێلا زاخۆ و هەتا دێرەبوونێ یە.
ناڤبری گۆت: فەرمانگەها ئاڤا سێمێلێ رۆژانە ئاڤێ دابین دكەت بۆ 2030 كەسان و پشكدارێن ئاڤێ گەهشتینە 27 هزار پشكدارێن فەرمی و نێزیكی 95% ژ پشكدارێن ئاڤێ خودان پیڤەرن و هاتینە گرێدان.
هێشتا گۆت: گەلەك پرۆژە هاتینە بجهئینان و گەلەك پرۆژە ل سالا 2022 بووینە و هێشتا بەردەوامن و گەلەكا رازیبوون ل سەر هاتیەكرن، كوژمێ پرۆژان نێزیكی دو ملیار و 200 ملیون دینارانە ل سەر بودجا پەرەپێدانا پارێزگەها دهۆكێ و هندەك ژ رێكخراوێن بیانی و زێدەباری كومپانیەكا دەرئینانا پەترولێ ل ناحیا باتێل ل گەل هندەك پرۆژێن بچووك ل سەر بودجا 17% یا داهاتێ فەرمانگەها ئاڤا سێمێلێ هاتینە بجهئینان، ژ پرۆژێن هاتینە بجهئینان دانانا تۆرێن ئاڤێ و كێشانا هێلێن ئاڤێ بۆ تاخێن نوو هاتینە دروستكرن و ب تایبەت ل گوندان و ئەو هێلێن ئاڤێ ئەوێن هاتینە دانان كوژمێ وان نێزیكی 55 هزار هێلان ل سنورێ فەرمانگەها ئاڤا سێمێلێ هاتینە دروستكرن.
زێدەتر گۆت: دانانا تۆرێن ئاڤێ ل تاخێن نوو وەك كێڤلا ب درێژاهی یا 10 هزار مەتران و نێزیكی حەفت هزار هێلێن ئاڤێ بۆ تاخێن زێرین و گلاڤێژ و نێرگز ل حەوشكێ و گەهاندنا ئاڤێ نێزیكی حەفت هزار مەتران بۆ گوندێ دارێ، پرۆژەكێ نوو هەیە بۆ تاخێ شەهیدا نوو كو دانانا تۆرەكا نوو یا ئاڤێ یە نێزیكی 16 هزار مەترن ل گەل گەهاندنا ئاڤێ بۆ گوندێ كولێ سێ هزار مەترن و دانانا تورێن ئاڤێ بۆ گوندێ بوسریان ئەو ژی سێ هزار مەترن و كوژمە نێزیكی 55هزار هێلێن ئاڤێ وەك گەهاندن و دانانا تۆران هندەك هاتینە بجهئینان و هندەك كار ل سەر دهێتەكرن.
ناڤبری گۆت: ل سالا بوری حەفت بیر هاتینە كولان ل گەل نووژەنكرنا نەه بیران، ئاڤاكرنا ئومبارێن ئاڤێن كونكریتی و ئاسنی ل ڤان دەڤەران (مەرینا، خراب دێمی، گرێسمانی، تركژا، باجد میری، بوسریان) زێدەباری ئاڤاكرنا وێستگەهێن پالدانا ئاڤێ ل سالا 2022 هاتینە راگەهاندن هەردو پرۆژە نوكە ل وارێ بجهئینانێ دانە (مسریك و سێمێل)، زێدەباری گوهۆرینا 20 ماتورێن بیران و چاكرن و گوهۆرینا ب سەدان شكەستن و چاكرنا قوفلان و ئەڤە یا بەردەوامە رۆژانە.
رێڤەبەرێ هەمان فەرمانگەه گۆت: مە ئاریشە ل ژێدەرێن ئاڤێ دا هەیە و رێژا ئاڤا دهۆك بۆ مە تەرخانكری و هێشتا یا سالا 2010 یە، وێ سالێ هەتا نوكە گەلەك تاخ هاتینە زێدەكرن و گەلەك ئاوارە هاتینە قەزا و ئەو رێژە تێرا مە ناكەت و گرنگ بوو رێژا مە هاتبا زێدەكرن یان پرۆژەكێ ستراتیجی بۆ قەزا مە هاتبا دروستكرن، هەتا نوكە فەرمانگە و سنورەكێ مەزن مەهەیە و دەست هەلاتا مە یا سنورداركریە و میلاكێ گەلەك كێمە و ب تنێ 34 فەرمانبەران مە هەنە و ئاستەنگا رۆژانە یا فەرمانگەهێ كێماسیا ئالیاتان، نوكە مە حەفارە نینە و پێشینەیا هەیڤانە گەلەك یا كێمە و تێرا هەمی پێدڤیان ناكەت.
هێشتا گۆت: ب ئەنجامدانا پرۆژێن ئاڤێ ل سالا بوری شیاین ئاڤێ بگەهینە تاخێن نوو ب رێژا 80% و هێشتا هندەك تاخ ماینە و كار ل سەر بەردەوامە.
