ڤه‌كۆله‌ره‌ك: رۆسیا و ئه‌مریكا ل دۆر پاشه‌رۆژا سووریێ رێككه‌فتینه
ئه‌ڤرۆ:
ڤه‌كۆله‌ره‌كێ ناڤدار یێ توركیا راگه‌هاند كو ئه‌مریكا و رۆسیا ل دۆر پاشه‌رۆژا سووریێ رێككه‌فتینه و هه‌ر دو وه‌لاتێن ئیران و توركیا ژی د پاشه‌رۆژا سووریێ دا چو رۆل نابن و دێ توركیا ژی نه‌چار بیت كو هێزێن خوه ژ سووریێ ڤه‌كێشیت.
حه‌سه‌ن جه‌مال نڤیسه‌ر و ڤه‌كۆله‌رێ ناڤدار یێ توركیا راگه‌هاند كو سه‌ره‌دانا ڤێ دووماهیێ یا ئه‌ردۆغانی بۆ رۆسیا چو ئه‌نجامێن خوه نه‌بوون و ئه‌ردۆغان ب دله‌كێ شكه‌ستی ژ رۆسیا ڤه‌گه‌ری، چونكو به‌رپرسێن رۆسیا بۆ ئه‌ردۆغانی دیار كرینه كو دڤێت توركیا هه‌موو هێزێن خوه ژ سووریێ ڤه‌كێشیت و د پێنگاڤا ئێكێ دا ژی پوتینی داخواز ژ ئه‌ردۆغانی كریه كو هێزێن خوه ژ ئدلبێ ڤه‌كێشن و پشته‌ڤانیێ ل گرۆپێن تیرۆرستی ژی نه‌كه‌ن، ئه‌ردۆغانی هنده‌ك مه‌رج دیار كرینه لێ پوتینی دیار كریه كو ده‌م یێ هاتی ره‌وشا سووریێ ئارام بیت و ده‌مێ ره‌وشا سووریێ ئارام بیت چو مه‌ترسی ل سه‌ر توركیا ژی نامینن و بابه‌تێ ئێمناهیا سنۆرێن توركیا ل گه‌ل سووریێ ژی دێ هێته چاره‌سه‌ركرن.
ناڤهاتی دیار دكه‌ت كو رۆسیا ژی وه‌كو به‌رێ دژبه‌راتیا مافێن كوردان ناكه‌ت، به‌ری نها شانده‌ك ژ كوردێن سووریێ سه‌ره‌دانا رۆسیا كرن و ل گه‌ل به‌رپرسێن وه‌زاره‌تا ده‌رڤه كۆمبوون و شاندێ كوردی دیار كریه ئه‌و به‌رهه‌ڤن ل گه‌ل شامێ هه‌موو پرسێن هه‌ی ب رێیا دانوستاندنان چاره‌سه‌ر بكه‌ن لێ دڤێت شام ژی دانپێدانێ ب رێڤه‌به‌ریا خوه‌سه‌ر بكه‌ت و ده‌ستان ژ سیاسه‌تا خوه یا به‌رێ ل هه‌مبه‌ر كوردان به‌رده‌ت، هه‌روه‌سا كوردێن سووریێ دیار كرینه كو چو به‌رنامێ وان بۆ هندێ نینن كو ژ سووریێ جودا بن، به‌لكو وان دڤێت د چارچۆڤێ سووریایه‌ك نوو و دیموكرات دا بژین و رۆسیا ژی پشته‌ڤانیێ ل داخوازیێن كوردان دكه‌ت و ئه‌و یه‌ك ژی بوویه ئه‌گه‌رێ هندێ كو به‌رپرسێن توركیا ل هه‌مبه‌ر هه‌لوه‌ستێ رۆسیا نه‌رازیبوونا خوه دیار بكه‌ن.
حه‌سه‌ن جه‌مال دیار دكه‌ت كو ئه‌ردۆغان ژی نها گه‌هشتیه ڤێ باوه‌ریێ كو ل سووریێ چو كارتێن بهێز د ده‌ستێ وی دا نه‌ماینه و ژ به‌ر هندێ ژی نه‌چاره داخوازیێن رۆسیا قه‌بوول بكه‌ت، چونكو رێككه‌فتنه‌ك د ناڤبه‌را ئه‌مریكا و رۆسیا دا ل دۆر پاشه‌رۆژا سووریێ هاتیه كرن، ئه‌مریكا دڤێت ره‌وشا سووریێ ئارام بیت و ئه‌مریكا ژی ل دژی مانا هێزێن توركیا یه، هه‌رچه‌نده به‌رپرسێن رۆسیا دبێژن دڤێت ئه‌مریكا ژی هێزێن خوه ژ سووریێ ڤه‌كێشن لێ رۆسیا ژی باش دزانیت ئه‌مریكا جارێ به‌رهه‌ڤ نینه هێزێن خوه ژ سووریێ ڤه‌كێشیت و ژ به‌ر هندێ ژی نها رۆسیا بابه‌تێ مانا هێزێن ئه‌مریكا ناكه‌ته ئاریشه‌كا مه‌زن و رێككه‌فتنه‌كا نهێنی د ناڤبه‌را ئه‌مریكا و رۆسیا دا هه‌یه و ئه‌و یه‌ك ژی ل دژی توركیا و ئیرانێ یه.
ناڤهاتی د دووماهیا ئاخڤتنا خوه دا دیار كر كو ئه‌مریكا ئێدی چو گرنگیێ ناده‌ته ده‌ستهه‌لاتا نها یا توركیا و بایدن به‌رهه‌ڤ نه‌بوو ل گه‌ل ئه‌ردۆغانی كۆمبیت و ئه‌ردۆغان ل دژی ئه‌مریكا خواست جاره‌كا دی كارتا رۆسیا بكار بینیت لێ تشتێ دیار دبیت ڤێجارێ رۆسیا ژی به‌رهه‌ڤ نه‌بوو داخوازیێن توركیا ل دۆر سووریێ قه‌بوول بكه‌ت، چونكو توركیا جارێ نه‌ڤێت قه‌یرانا سووریێ بهێته چاره‌سه‌ركرن، ئاشكرایه توركیا ب تایبه‌تی ژی ده‌ستهه‌لاتا ئاكپارتیێ شیایه مفای ژ ره‌وشا ئالۆز یا سووریێ وه‌ربگریت، لێ ئێدی رۆسیا و ئه‌مریكا بریارا خوه داینه كو دڤێت پرسا سووریێ ب رێیێن سیاسی بهێته چاره‌سه‌ركرن و دیاره ئه‌و یه‌ك ب دلێ توركیا ب تایبه‌تی ژی ئه‌ردۆغانی نینه.
