(ڤەژین) بۆ نڤیسەر و خواندەڤانێن كورد ل باژێری ئۆرمییێ وەكو قۆتابخانەكێیە
ئەڤرۆ
رەسۆل گلەبان سەرنڤیسەرێ گۆڤارا ڤەژین، د دیدارەكێ دا بۆ رۆژناما ئەڤرۆ دیار كر: ژمارا ئێكێ یا گۆڤارا ڤەژین ل پاییزا سالا 2021 ێ ل باژێرێ ئۆرمییێ ل رۆژهەلاتێ كوردستانێ ب هەردو زمانێن كوردی و فارسی دەركەفتییە و خودانێ گۆڤارێ ژ داهاتێ خوە وێ گۆڤارێ چاپ دكەت، هەروەسا وی ناڤێ گۆڤارێ كرە ڤەژین، چونكی ژ ڤەژاندنێ دهێت، بەری ڤەژین، چو گۆڤار ل باژێرێ ئۆرمییێ نەبووینە، كو خەلكێ ئۆرمییێ بەرپرسێ وێ بیت، د هەمان دەم دا بەری 120 سالان مە گۆڤارەك لێ هەبوویە ب ناڤێ كوردستان، پشتێ وێ مە وەكو خەلكێ ئۆرمییێ چو گۆڤار نەبووینە، پشتی چەندین بزاڤان ئەم شییان گۆڤارا ڤەژین بێخینە بەردەستێ خواندەڤانان ل ئۆرمییێ، هەر چەندە بەری نوكە دەستویری ل پارێزگەهێ دهاتەدان، د وی دەمی دا كارێ مە ب زەحمەت دكەفت، بەلێ ئەڤە دەمێ سێ سالانە وەرگرتنا دەستویرییێ ل پایتەختێ ئیرانێ یە، پشتی مە ئیمێل بۆ ڤرێكری و مە سێ ناڤ داینێ، ناڤێ ئێكێ (ڤەژین) بوو، یێ دووێ نووژین بوو و یێ سێیێ رۆژا نوو بوو، وان ناڤێ ئێكێ قەبوول كر، مە دڤێت ئەو شتلێ نوو یێ مە چاندی بپارێزین و بەرهەمەكێ باش بدت.
ناڤهاتی ئەو ژی گۆت: ئەو بابەتێن ل گۆڤارا ڤەژین بەلاڤ دبن، سییاسی و جڤاكینە، دیسان ئەم پتر گرنگییێ ب فەرهەنگا كوردی ددەین، هەتا نوكە حەفت ژمارە ژێ بەلاڤ بووینە و شەش ژمارە ژ وان ب شێوازێ رۆژنامە بووینە، ژمارا حەفتێ ب شێوازێ گۆڤار بوویە، هەروەسا بەرهەمێن نڤیسەران ژ هەر چار پارچەیێن كوردستانێ د گۆڤارا ڤەژین دا بەلاڤ دبن، باژێرێ ئۆرمییێ ب شێوەزارێ كرمانجییا سەری د ئاخڤن، بەلێ بابەت ب شێوزارێ كەلهۆری و سۆرانی و زمانێ فارسی دناڤا ڤەژینێ دا بەلاڤ دبن، پرانییا بابەتێن ڤەژینێ ب زمانێ فارسینە، ئەز ڤێ چەندێ ب مخابنی ڤە دبێژم، چونكی گەلەك گڤاشتن ژ ئالیێ حكومەتێ ڤە ل سەر مە هەنە، دیسان ئەڤە نێزیكی 10 سالانە ژ نوو نڤیسەرێن ب زمانێ كوردی بابەتان دنڤیسن، هەتا نوكە خواندن و نڤێسینا ب كوردی یا لاوازە، دیسان قوتابخانەیێن كوردی ل ئۆرمییێ نینن، لەوما ئەو نڤیسەرێن ب كوردی دنڤێسن گەلەك دكێمن، هەروەسا حكومەتا ئیرانێ ناهێلیت نڤیسەرێن مە ب پیتێن لاتینی بنڤێسن و ئەو رێنڤیسە هاتییە قەدەغە كرن.
سەرنڤیسەرێ گۆڤارا ڤەژین دبێژیت: خواندەڤانێ كورد ل ئۆرمییێ یێ كێمە، ئەوێن هەین ژی حەز دكەن ب زمانێ فارسی بخوینن و بنڤێسن، هەروەسا هەر ژمارەكا گۆڤارێ یا ب شێوازێ رۆژنامە وان 500 دانە چاپ دكرن، بەلێ یا دووماهییێ وان 100 دانە ژێ چاپكرینە، بەلاڤكرنا گۆڤارێ ژی یا ب زەحمەتە، گەلەك جاران ب شێوێ دیاری مە گۆڤار دایە خواندەڤانان، ژ پێخەمەت گۆڤارا ڤەژین بهێتە خواندن، هەروەسا ڤەژین ئێكەمین گۆڤارە ل ئۆرمییێ كو خودانێ وێ خەلكێ ئۆرمییێ یە، بەری ڤەژین ژی چەندین گۆڤار ل ئۆرمییێ هەبوون، لێ خودانێن وان گۆڤاران نە خەلكێ ئۆرمییێ بوون، هەروەسا ژبەركو خەلكێ مە پتر ل گوندان بووینە، ڤێ چەندێ وەكرییە، كو شێوەزارێ كرمانجییا سەری ل رۆژهەلاتێ كوردستانێ هند پێشكەفتنێ ب خوە ڤە نەبینیت، بەلێ ل ڤان 20 سالێن دووماهییێ خەلكێ مە پتر قەستا باژێران كرییە، لەوما هەتا رادەیەكێ مرۆڤ دشێت بێژیت رەوش باشترە، دیسان پرتووكخانە ژی هەنە، بەلێ پرتووك و بابەتێن كوردی دناڤ دا نینن و هەموو فارسی و ئازەرینە، هەر چەندە نوكە ڤەژین وەكو قوتابخانەكێیە بۆ نڤیسەر و خواندەڤانێن كورد ل باژێری ئۆرمییێ، هەروەسا ڤەژینێ دەلیڤە دایە گەلەك نڤیسەرێن گەنج كو بەرهەمێن خوە ل ڤەژینێ بەلاڤ بكەن، هەموو داخوازا مە ئەوە، ئەم رۆژنامەڤانییا كوردی ل ئۆرمییێ پێشبێخین.
رەسۆل گلەبان هێشتا دبێژیت: من چەندین جاران سەرەدانا باژێرێ دهۆكێ كری یە، گەلەك جۆداهی دناڤبەرا دهۆكێ و ئۆرمییێ دا هەنە، ئەو تشتێن ل دهۆكێ هەین ل ئۆرمییێ نینن، د بیاڤێن تەلەڤزیۆنێ و راگەهاندنێ دا، دیسان مە رادیۆ و تیڤی یێن سەربەخوە نینن، ئەوێن هەین ژی یێن حكومەتێ نە، دەستهەلاتدارێن حكومەتا ئیرانێ ژی حەز ناكەن بەرنامەیێن كوردی ل وی باژێری هەبن، نوكە نێزیكی ملیۆن كەسان ل باژێرێ ئۆرمییێ دژین، ب تنێ ڤەژین وەكو گۆڤارەكا كوردی ل وی باژێری هەیە، بەلێ نێزیكی 50 رۆژنامە و گۆڤارێن فارسی ل وی باژێری هەنە، د هەمان دەم دا ل رۆژهەلاتێ كوردستانێ ( 150- 200) رۆژنامە و گۆڤارێن كوردی هەنە، بەلێ دناڤا وان دا ب تنێ ڤەژین ب كرمانجییا سەری دهێتە نڤێسین و یێن دیتر هەموو فارسی و سۆرانینە، نوكە هەردو هەیڤان جارەكێ ڤەژین دەردكەڤیت، هەموو بزاڤێن مە ئەون، كو ئەو نڤێسینێن ل گۆڤارا ڤەژین بەلاڤ دبن، هەموو ب زمانێ كوردی بن، چونكی نوكە نێزیكی 45% ێ، ژ وان بابەتێن د ڤەژین دا بەلاڤ دبن ب زمانێ كوردینە، هەروەسا ئەز دخوازم مە ل گەل دهۆكێ پەیوەندییەكا باش هەبیت، ل سەر مژارێن جڤاكی و چاندا كوردی و دیسان ب رێیا ڤەژینێ مە پەیوەندی و نڤیسەر ل هەر چار پارچەیێن كوردستانێ هەنە، هندی ئاستەنگ بۆ من چێببن، ئەز پتر د كاری دا دلگەرمتر لێ دهێم، ئەز یێ گەشبینم و دێ شێین كارەكێ باش بۆ خەلكێ خوە بكەین.
