ڤەگەڕاندنا قستێن سندۆقا ئاکنجیبوونێ دێ ھێتە درێژکرن
ئەڤرۆ، ئەمیر ئەترووشی:
رێڤەبەرێ گشتیێ بانکان ل وەزارەتا دارایی یا حوکمەتا ھەرێما کوردستانێ راگەھاند، وان ژ جڤاتا وەزیران خواستیە ماوێ قستێن سندۆقا ئاکنجیبوونێ ئەوێن ل سەر وەلاتیان بھێتە درێژکرن، چونکو گەلەک ژ وەلاتیان شیان نینە سالانە قستێ خوە کو ملیۆن دینارن بۆ حوکمەتێ ب ڤەگەڕینن و ئەڤ داخوازیە ب شێوەکێ فەرمی ھاتیە کرن.
عەبدولقادر ئوسمان، رێڤەبەرێ گشتیێ بانکان ل وەزارەتا دارایی بۆ ئەڤرۆ دیار کر، د ماوێ چەند سالان دا، حوکمەتا ھەرێما کوردستانێ ھاریکاریا چەندین وەلاتیان کریە ب کڕینا یەکێن ئاکنجیبوونێ، ب ئاوایەکی کو حوکمەتێ نیڤا وی پارەی دایە و نیڤا دی ژی کەسێن مفادار داینە، بەلێ ئەو پارێ حوکمەتێ ژ پێشڤە دای ژی وەکو قەر ل سەر وەلاتیان ھاتیە تۆمارکرن، ب تنێ ئەو قست ژ فەرمانبەران ناھێتە وەرگرتن، بەلێ بۆ وەلاتیێن نەفەرمانبەر دێ ھێتە وەرگرتن و دڤێت ئەو وی پارەی ھەموویێ وەکو قست ب ڤەگەڕیننە گەنجینا حوکمەتێ، ئەو قستە یێ یەکا ئاکنجیبوونێ بیت یان ژی خانی.
ئاشکرا ژی کر کو ھەر وەلاتیەک دڤێت سالانە ملیۆن دیناران بۆ حوکمەتێ ڤەگەڕینیت، ھەکە ھەر سالەکێ ئەو پارە نەھێتە ڤەگەڕاندن، دێ ب کۆژمێ ٣٥٠ ھزار دیناران سالانە ھێتە سزادان و گۆت: حوکمەتا ھەرێما کوردستانێ نێزیکی ١٠ ھزار یەکێن ئاکنجیبوونێ ب رێیا کەرتێ تایبەت ئاڤاکرینە.
