کارگەھێن حەسۆ و رەملێ مەترسی ل سەر ژیانا وەلاتیا دروستکریە
ئه‌ڤرۆ:
رووبارێ خازر دکەڤیتە سنورێ ناحیا قەسروکێ و کۆمەلگەھا خەلێلکان و گوندێ گورگوران و گوندێ خراب سەعدون و ھزار جوترا دبوریت ھەتا دگەھیتە سنورێ ناحیا کەلەکچی، ھژمارەکا مەزن یا گوندان ل نێزیک ڤی رووباری نە، ژ بەر لێڤین ڤی رووباری ھژمارەکا مەزن یا کارگەھێن چێکرنا حەسو و رەمڵێ ھاتینە دانان ژ لایێ وان وەلاتیێن ل نێزیک رووباری دژین و بوویە جھێ مەترسیێ ل سەر ژیانا وان و دبێژن: دەمێ کارگەھێن خوە ڤەدگوھێزن پاشماو کوورکێن کوور ل دووڤ خوە دا دھێلن و پر ئاڤ دبنو زارۆیێن وان تووشی خەندقینێ دبن.
فەرمان حسێن وەلاتیەکێ کۆمەلگەھا خەلیلکان بۆ ئەڤرۆ دیار کر، ھەر چەندە خەلکێ ڤێ دەڤەرێ مفا ژێ وەردگرن، لێ ل گەل ھندێ گەلەک زیان ژی ل دووڤ خوە ھێلاینە، وەکو تێکدانا کنارێن رووباری و ھێلانا ھندەک جھێن دەڤێن حەفاران گەلەک د کوورن، ئەڤ چەندە بوویە جھێ مەترسیێ ل سەر گیانێ زارۆیێن ڤێ دەڤەرێ، ھەر کەسەکێ نە مەلەڤان بیت بکەڤیتە د ڤان چالان دا، بێگومان دێ خەندقیت.
زێدەتر گۆت: دیسا دبیتە ئەگەرێ مەترسیێ ل سەر ماسیان ژی، چونکو دەمێ ماسی دمینیتە تێدا، ئێدی نەشێت وەکو بەرێ بگەریت و خوارنێ بۆ خوە پەیدا کەن، دڤیابا پشتی کارێ خودانێن کارگەھان ب دووماھی ھاتبا، ئەو چال و خەندەکە خراب کربان، دا کو ژیانا زارۆیێن ڤێ دەڤەرێ د مەترسیێ دا نەبا، لێ نزا بۆچی جھێن پەیوەندیدار خوە لێ ناکەنە خودان و ئاگەە ژێ نینە، ب راستی دڤیابا حوکمەتێ لژنەیەک پێکئینابا و ھەموو دەما دووڤچوون ل سەر ڤان کارگەھان کربا و یاسایەک بۆ وان ھاتبا دانان و ل دووڤ ڤێ یاسایێ سەرەدەری ل گەل وان کربا ژ بۆ نەھێلانا ڤان چالێن کوور، کو پشتی کارێن وان ب دووماھی دھێت ئەو جە وەکی بەرێ زفراندبا، چونکو ل دەمێ کاری گەلەک بێ سەروبەردکەن و جوانی و دیمەنێ رووباری گەلەک یێ کرێت دکەن، ھیڤدارین لژنەکا تایبەت ب کارگەھێن حەسو و رەملا ڤە بھێتە دامەزراندن ل دەڤەرا شێخان، دا ئەڤ ئاریشێن ب ڤی رەنگی بھێنە چارەکرن و ژیانا وان ئاکنجیێن ل نێزیک ڤان کارگەھان و رووبارا ژ مەترسیێ دوویربکەڤیت.
شێردل سمۆ، رێڤەبەرێ ناحیا قەسروک بۆ رۆژناما ئەڤرۆ دیار کر، ئەڤ روودانێن ب ڤی جۆری یێن رووداین بەردەوام ئەم ھەموو خودان کارگەھا ئاگەھدار دکەین کۆ دەمێ کارگەھێن خوە بۆ جھەکی دی ڤەدگوھێزن پاشماو کوورکێن کوور دکەن جارەکا دی پر ئاخ بکەنەڤە.
ناڤبری دیار کر، ژ لایێ خوەڤە ھندەک پێرابوونان ل دگەل خودان کارگەھان رادبین کو ڤان کوویرکا پربکەنەڤە، بەلێ ئەم پێدڤی لیژنەکا تایبەتین کۆ ژ لایێ وەزارەتا سامانێن سروشتی یان لژنا کارگەھا و خیزا و رەملا ل پارێزگەھا دھۆک رێنمایێن گشتی بھێتە دان دا کو خودانێن ڤان کارگەھان ھندەک مەرجێن تایبەت بدانە بەر کو ڤان کوورکا نەھێلن.
بشار محەمەد رێڤەبەرێ ناحیا کەلەکچی بۆ ئەڤرۆ دیار کر، ل سنورێ ناحیا کەلەکچی ٢٠ کارگەھێن حەسۆ رەملێ ھەنە و زێدەگاڤیا ل سەر ١٤٠ دونەمێن ئەردێ ماستەرپلانا کەلەکچێ یا کری، ژ بەر زێدەگاڤیێن کارگەھا ب کێر ب ماستەرپلانێ ناھێت، چونکو ئەو ئەرد یێ ھاتیە مژین و حەسۆ و رەمل ھەمو یێن ژێ ھاتینە کێشان و گۆت: ھەکە ئەڤ کارگەھە کار بکەن ل سەر ڤی ئەردێ ماستەرپلانێ، بێ گومان سەنتەرێ کەلەکچێ دکەڤیتە د مەترسیێ دا، ب تایبەت ل وەرزێ زڤستانێ، چونکوی ئەو ئەرد ھەموو یێ ھاتیە ژناڤبرن، ژ برنا حەسو و رەملا.
ناڤبری دیار کر، یێن ھاتینە ئاگەھدار کرن کۆ ژ بەر زێدەگاڤیا وان کری بۆ دادگەھێ دھێنە رەوانەکرن، ل گەل وان کەسێن ھاریکار ل گەل وان و گۆت: مولەتا کاری دایە وان کۆ ل وی جھێ مە بۆ وان دەستنیشان کری کارگەھێن خوە داننە وی جھی، لێ وان بۆ جھەکێ دی یێ ڤەگوھاستی بێ کو مە ئاگەھدار بکەن.
