کوردان ب ئیرادەیا خوە بڕیارا ئاشتیێ دایە
پەرلەمانتارەکێ بەرێ یێ تورکیا دیار دکەت، ئاشتی بریارەکا وێرەکانە یە و دێ بیتە ئەگەرێ بهێزبوونا تورکیا، کوردان ب ئیرادەیا خوە بریارا ئاشتیێ داینە و بلا کەس هزر نەکەت ژ بەر لاوازیێ یان ژی ژ نەچاریێ بریارا ئاشتیێ هاتیە دان.
محەمەد مەتینەر ئەندامێ بەرێ یێ پەرلەمانێ تورکیا سەر ب فراکسیۆنا ئاکپارتیێ دیار کر، بریارا ئاشتیێ و راگرتنا شەڕی گەلەک گرنگ و دیرۆکی یە، بێگومان هەر کەس دزانیت کو ب ئیرادەیا دەولەت باخچەلی و ئەردۆغانی و هەروەسا ئۆجەلانی بریارەکا وەسا گرنگ و دیرۆکی هاتە دان، نها هندەک کەس بەحسێ ڤێ یەکێ دکەن کو ئالیێ کوردی لاواز بوو و ژ نەچاریێ بریارەک وەسا دا، ئەو یەک گەلەک شاشە، چونکی کەسێن لاواز نەشێن بریارێن وەسا گرنگ و دیرۆکی بدەن و گۆت: (کورد هەردەم بهێزن، بریارا ئاشتیێ ژ بۆ کوردان و تورکان گەلەک گرنگ و دیرۆکی یە، دەمەکە شەڕ ل تورکیا هاتیە راگرتن و ئەو یەک ژی بوویە جهێ دلخوەشیا هەموو وەلاتیێن تورکیا، ئانکۆ ب کورتی ئەز دشێم بێژم ل تورکیا کەسێ شەڕ نەڤێت و هەموویان ئاشتی و برایەتی و پێکڤەژیان دڤێت، ژ بەر ڤێ یەکێ ژی نها هەموو وەلاتیێن تورکیا پشتەڤانیێ ل ئاشتیێ و راگرتنا شەڕی دکەن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، پێدڤیا تورکیا ب ئاشتیێ هەیە، ئێدی دڤێت پرسا کوردی ژی بهێتە چارەسەرکرن، بابەت تنێ راگرتنا شەڕی نینە، دڤێت کارەک وەسا بهێتە کرن کو جارەکا دی شەڕ و ئالۆزی ل تورکیا روو نەدەن، گرنگە هەموو هێز و ئالیێن سیاسی ل تورکیا ژی هەست ب بەرپرسیاریا خوە یا دیرۆکی بکەن، کارێ نها دهێتە کرن بۆ پاشەرۆژا تورکیا گەلەک گرنگە، ژ بەر ڤێ یەکێ ژی بابەت لاوازی و بهێزبوون نینە و گۆت: (ب سالانە هەر کەس دبێژیت پرسا سەرەکی و مەزن ل تورکیا پرسا کوردی یە، گەلەک بەرپرسێن تورکیا ژی دبێژن هەتا پرسا کوردی نەهێتە چارەسەرکرن پرسێن دی ژی ناهێنە چارەسەرکرن، وی دەمی دڤێت هەر کەس یا پێدڤی بۆ راگرتنا شەڕی و چارەسەرکرنا پرسا کوردی بکەت و یا نها بەرێزان ئەردۆغان و باخچەلی و ئۆجەلان دکەن گەلەک گرنگە و جهێ دەستخوەشیێ یە).
ئەندامێ بەرێ یێ پەرلەمانێ تورکیا سەر ب ئاکپارتیێ ئەو یەک ژی دیار کر، قووناغا نها رامانا هندێ نادەت کو ئالیەک دێ سەرکەڤیت و ئالیێ دی ژی تووشی شکەستنێ بیت، نابیت کەس وەسا هزر بکەت، قووناغا ئاشتیێ و کارێ نها دهێتە کرن ئێک رامانا خوە هەیە و ئەو یەک ئاشتی و چارەسەری یە، هەکە هندەک کەس وەسا هزر بکەن قووناغا نها دێ بیتە ئەگەرێ لاوازیا ئالیەکێ ئەو هزر گەلەک شاشە، چونکی بابەت وەسا نینە و گۆت: (هەر شەڕەکێ و ئالۆزیەکێ دووماهیا خوە هەیە، شەڕێن جیهانی ژی هاتنە کرن لێ هەر دیسان ب ئاشتیێ ب دووماهی هاتن، د ناڤبەرا دو وەلاتان دا دەمێ شەڕەک روو ددەت و ب هزاران کەس دبنە قوربانی دیسان ب ئاشتیێ ب دووماهی دهێت، ژ بەر ڤێ یەکێ ژی ب ئاشتیێ مە دڤێت شەڕێ چەندین سالان ل تورکیا ب دووماهی بهێت و ژ بلی ئاشتیێ مە چو رێکێن دی نینن).
ناڤهاتی ئاماژە ب بزاڤێن نها یێن پەرلەمانێ تورکیا ژی کر و دیار کر، راستە نها گەلەک بەحسێ دەرئێخستنا یاسایا ئاشتیێ دهێتە کرن، لێ وەسا دیارە کو کارێ وان گیرۆ بوویە و پێدڤی بوو بەری نها ئەو یاسا هاتبا دەرئێخستن، چونکی قووناغا نها گەلەک گرنگە و نابیت هندەک تشت بهێنە گیرۆ کرن، کورد و تورک و هەروەسا هەموو وەلاتیێن تورکیا چاڤەرێنە کو ل پەرلەمانێ تورکیا یاسایا ئاشتیێ دەرکەڤیت دا قووناغا ئاشتیێ بگەهیتە وێ ئارمانجا کو مە هەموویان دڤێت و گۆت: (داخواز ژ هەموو سەرکردەیێن سیاسی ل تورکیا دکەم کو یا پێدڤی بۆ سەرکەفتنا قووناغا ئاشتیێ ئەنجام بدەن، هەموو گەلێ تورکیا پشتەڤانە، گوهۆڕینێن گەلەک مەزن ل دەڤەرێ روو ددەن و د هەمان دەمی دا مەترسی ژی ل سەر تورکیا هەنە، دڤێت ئەم پرسێن خوە چارەسەر بکەین و گرنگە ژ بۆ ئاشتیێ و برایەتیێ ئەم هەموو پێکڤە کار بکەین).
محەمەد مەتینەر د دووماهیا ئاخڤتنا خوە دا ئەو یەک ژی نەڤەشارت کو، گەلەک هێز هەنە ناخوازن شەڕ و ئالۆزیێن ل تورکیا ب دووماهی بهێن، دڤێت ئەم رێ نەدەین کو جارەکا دی تورکیا ببیتە مەیدانا شەڕی، دڤێت ئەم ڤێ دەلیڤەیا گرنگ و دیرۆکی ژ دەست نەدەین و پێکڤە کار بکەین دا پرسا کوردی و هەموو پرسێن دی بهێنە چارەسەرکرن.
