کوردستان و کارتێکرنا کاودانێن دەڤەرێ
ئیدریس زۆزانی
دەمەکی درێژە هەڤرکیا د ناڤبەرا هێزێن سیاسی یێن وەلاتێن دەستهەلاتدار ل سەرانسەری جیهانێ و ئەو رژێمێن ب چاڤسۆریی دانوستانێ ل گەل وەلاتێن رەخ ورویێن خۆ دکەن دەستپێکریە و ئەڤێ چەندێ ژی رەوشا دەڤەرا رۆژهەلاتا ناڤین بەر ب تێکچوونەکا خراب و وێرانکار ڤە بریە و پڕانیا وەلاتین کەنداڤێ کەڤتینە د مەترسیەکا دژوار دا و نەئارامیەکا مەزن د ناخێ تەڤایا گەلێن دەڤەرێ دا ب گشتی پەیدابوویە ژ ئەگەرێ ئەوان کاودانێن هاتینە پێش.
بێ گومان ئەگەرێن ئەوێ زۆرداریا ل سەر پڕانیا گەلێن دەڤەرێ ژ بێپویتەیی و پاشگوهـ ڤەهاڤێتنا سیاسەتا رژێم و دەستهەلاتدارێن وەلاتێن وان ب خۆ بوویە، ژبەر کو سەرەرایی رەوشا سیاسی یا ئالۆز و ئەو گوهۆرینا سیاسی و کاودانێن بلەز ل جیهانێ رویددەن، رێگریەکا مەزن ل بنەمایێن ئازادیا جڤاکی د هندورێ ئەوان وەلاتان دا ژی کریە و ئەڤ چەندە ژی بوویە رێخۆشکرنەکا ئاسان و ئەگەرەکی سەرەکی بۆ دەستێوەردانا وەلاتێن بیانی د کاروبارێن وەلاتێن دەڤەرێ دا و رەوشا جڤاکێن وان بەر ب ئالۆزی و ئاستەنگیەکا خراب ڤە بریە، لەوا وەکو دیار ل ئەڤێ قووناغێ دا رۆژهەلاتا ناڤەراست بوویە مەیدانا هەڤڕکی و شەر و پێکدادانەکا وێرانکەر، و زەرەرمەندێن سەرەکی یێن ئەڤێ جەندێ ژی ئەو گەلێن ئارام و ئاشتیخواز و جڤاکێن بێ گونەه بووینە.
هەر دیسا مایتێکرنا وەلاتێن دەستهەلاتدار و خۆدان هێزین لەشکری و شیانێن مەزن ژی گەلەک جاران ئالۆزی د ناڤبەرا گەلێن دەڤەرێ دا دروستکرینە و سیاسەتەکا دژوار ب سەر وان دا سەپاندینە و دانوستاندنەکا خراب دگەل وان کرینە و هەولێن ب سەردابرنا وان داینە ب رێکا دروستکرنا ئاریشەیێن مەزن ل وەلاتێن وان دا، هەروسا بووینە ئەگەرێ لێککەڤتن و هەڤڕکیەکا سیاسی د ناڤبەرا گەلێن دەڤەرێ دا، ئەڤ چەندە ژی ژ پێخەمەت پاراستنا بەرژەوەندیێن گشتی یێن گەل و وەلاتێن وان ل دەڤەرێ بوویە و رویدانا کاودانێن ل سەر وەلاتێ ئیرانێ نموونەکا دیار و بەرچاڤ یا ئەڤێ راستیێ بوویە.
هەروەسا کوردستان ژی ئێک ژ ئەوان وەلاتێن دەڤەرێ بوویە، کو زیان پێکەڤتی و گەلێ وێ کەڤتیە مەترسیێ ژ ئەگەرێ دروستبوونا ئاریشەیێن سیاسی و مایتێکرنا لەشکری د ناڤبەرا ئەمریکا و ئیسرائیلێ ل گەل کۆمارا ئیسلامی یا ئیرانێ یا کو بوویە مەیدانا جەنگەکی دژوار و هەموو سازیی و دەزگەهێن وێ یێن گرنگ هاتینە هەلوەشاندن و چەندین سەرکردەیێن وێ هاتینە ژ ناڤبرن و سیستەمێ وێ یێ ئەتۆمی هاتیە تێکدان و مەترسیا ل سەر گەلێ وێ هەر یا بەردەوامە، لەوا رژێنا وێ ژی زۆربەیا وەلاتێن کەنداڤێ و دەڤەرێ کرینە ئارمانج و هەولێن تێکدانا رەوشا گەلێن وان ددەتن.
ئیران وەلاتەکی هەڤسنوورە ل گەل کوردستانێ ب درێژیا سنوورێ رۆژهەلات و هەر دەم پەیوەندیێن هەردو وەلاتان ل سەر بنەمایێ رێزگرتنەکا هەڤپشک بووینە د وارێ سیاسی و ئابووری و بازرگانی دا، بەلێ پشتی ئەڤان رویدانان، ئێکسەر رژێما ئیرانێ وەکو پڕانیا وەلاتێن کەنداڤێ کوردستان ژی کریە ئارمانج و گەلێ وێ ئێخستیە د مەترسیێ دا و گەفێن ب سەرداکرتنێ لێ کرینە و دیسا ب مۆشەکان وەلاتێ وان گوللەبارانکریە، ئەڤە ل دەمەکی دا کو ب هیچ رەنگەکی کوردستان نەبوویە بەشەک د ئەڤێ هەڤڕکیێ دا و زیان ب هیچ وەلاتەکی نەگەهاندیەو هەموو جاران خۆ ژ ململانا د ناڤبەرا هەردوک ئالیان دا دویرکریە و هەول دایە ئارامیا گەل و وەلاتێ خۆ بپارێزیت، بەلێ هەر وەکو کینەکا کەڤنار د دلێ داگیرکەرێن گەلێ کوردستانێ دا هەردەم ب چاڤەکی دوژمنکاری بەرێ خۆ داینە ئەڤی گەلێ ئاشتیخواز و هەولێن تێگدانا ئارامیا وی کرینە، ئەڤ چەندە ژی ژ ئەگەرێ ئەوێ زۆرداریا ل درێژیا دیرۆکێ ل سەر مللەتێ کورد دهاتە کرن و چاوا ب زۆری مافێ وی یێ رەوا پویچەل دکرن و چاڤ ب ئازادی و ئێمناهیا وی رانەدبوو، و ئەڤ چەندە ژی بوویە جهێ دلگرانیا تەڤایا مللەتێ کورد ل هەرچار پارچان و بێ ئۆمێدیەک د ناخێ وی دا پەیداکریە.
لێ بەلێ هەر چەند ب هێز دوژمنێن کوردستانێ ب ئەڤان جۆرە کریارێن خۆ یێن خرابکار هەول بدەن ببنە ئاستەنگ و رێگریێ ل پێشڤەچوونا شارستانیەت و خەبات و بەرخۆدانا ژ بۆ ئازادیا وەلاتێ خۆ کرین ب شانازی بکەن، ل ئەوی دەمی وڕەیا گەلێ کوردستانێ پێخەمەت گەهشتنا ئارمانجێن وی یێن سەرەکی ب هێزتر دبیت و ب هیچ رەنگەکی دەستان ژ رێبازا خۆ یا پیرۆز بەرنادەت، هەتا کو ب مافێ خۆ یێ رەوا شاد و بەختەور نەبیت و کوردستانەکا سەربخۆ و ب ئاڤەدان ل ژێر ئالایێ پیرۆز نەبیت و دەمێ ئازادیێ نێزیک بوویە.
