‹‹کـوردسـتانیبوونا شنگالـێ››
ئیدریس زۆزانی
بێگومان ئاخا پیرۆزا شنگالێ هەموو دەما نیشانا مەردەمێر و عەگیدان بوویە و شەنگستا هەبوونا ئێزیدخانەکا ئازا و ماکا کەلتوور و زمانێ شرین یێ کوردی بوویە و جڤاكا وێ ب هەموو پێکهاتەیێن خۆ ڤە وەکو چەپەرەکی ب هێز یێ بەرخۆدانێ بۆ بەرگریكرن ژ ناسنامەیا خۆ یا کوردەواریێ د ئامادەبووینە، زێدەباری ئەڤێ چەندێ ژی بلنداهیا چیایێ وێ یێ خۆراگر کەلها ئەوان خۆشمێر و فێرسێن ناڤدار یین کوردستانێ بوویە کو هەردەم دەستبەردایی نشتیمان و نەتەوەیا خۆ یا رەسەن نەبووینە.
ل درێژیا دیرۆکا جڤاکێ ئێزدی و سەرەرایی هەولێن قڕکرن و ئەوان هەموو فەرمانێن گران یێن کو ب سەرێ وان هاتین شنگال و هیچ دەڤەرەکا دی یا ئێزدیا نەبووینە ئالاڤ و کەرستەیەکی کڕین و فرۆتنێ ل بەردەستێ بازرگانێن سیاسەتێ ئەوێن دهێنە ژ لایێ دوژمنێ نەتەوەیا کورد و نەحەزێن گەلێ کوردستانێ ڤە هاندان.
خەلکێ شنگالێ هیچ دەمەکی زۆرداریا دوژمنان ل سەر ئاخا خۆ یا پیرۆز قەبوول نەکریە و ناسنامەیا خۆ یا نەتەوەیی یا رەسەن نەگوهۆرینە، هەر دیسا ل دەمێ دەستهەلاتا بەعسیان ژی کو دژوارترین رژێما سەپینەر بوو ل سەر گەلێن ئیراقێ هەلوەستێ وان یێ موکم ل سەر کوردبوونا خەلکێ شنگالێ نەهاتیە گوهۆرین و رێک نەداینە نەیاران دەست ب سەر ئاخا وێ یا پیرۆز دا بگرن، سەرەڕای هەموو هەولێن عەرەبكرن و گوهۆرینا دیمۆگرافییا دەڤەرێ و پێخەمەت ئەڤێ چەندێ رویبارێن خوینێ رژاندینە و دەستبەردایی ئاخ و ئۆل و نەتەوەیا خۆ نەبووینە.
دیسا هەر ل سەردەمێ دامەزراندنا ئیراقێ وەکو وەلات، خەلکێ شنگالێ خۆ ژ نەتەوەیا خۆ یا کوردی دویرنەکریە و بەردەوام شانازی ب کوردستانیەتا دەڤەرێن خۆ کرینە و د ناڤ هەموو شۆرش و بەرخۆدانێن مللەتێ کورد دا چەکێ شەرەفێ هلگرتینە و بەرەڤانی ژ ئاخا پیرۆزا کوردستانێ کرینە و پێخەمەت ئازادیا وەلاتێ خۆ قوربانی داینە، هەروەسا د پرۆسیسا ریفراندۆمێ دا ب رێژەیەکا بلند دەنگ ل سەر دەولەتەکا سەربخۆ بۆ گەلێ کوردستانێ دایبە و هەر ب دلسۆزی د بەردەوام بووینە ل سەر بدەستڤەئینانا مافێ مللەتێ خۆ یێ کورد.
هەر وەسا ل دەمێ هێرشا هۆڤانە یا رێکخراوا تیرۆرستی یا داعش کو ب هەڤکاریا وەلاتێن بیانی و هێزێن مەزن یین نێڤدەولەتی بۆ سەر دەڤەرا شنگالێ کو پیلانەکا ڤەسترایی یا پێشوەختبوو و ئەگەر ژێ نەهێلانا ئۆلا پیرۆزا ئێزدیێن وێ دەڤەرێ و پێگیری ب نەتەوەیا وان یا کوردی یا رەسن بووینە، لەوا هەموو پیرۆزیین جڤاکێ ئێزدی کرنە ئارمانج و دەست ب سەر مال وملکێن وان دا گرتن و ژمارەکا زۆر ژێ ژناڤبرن و یێن دی ژی دەربەدەرکرن.
کوردستانیەتا شنگالێ نە پۆستەکی حوومی یە هەتا کو د ناڤبەرا چەند کەس و لایەنەکا دا دانوستاندن ل سەر بهێتەکرن و هەڤڕکیێ ل سەر چارەنڤیسێ وێ بکەن، بەلکو دیرۆکا مللەتەکی کەڤنار و ئۆلەکا رەسن و خودان بیروباوەرێن نەلڤە، کو زۆر جاران دوژمنێ گەلێ کوردستانێ هەولێن ب هێز داینە ب رێکا قڕکرنێ و فەرمانا خەلکێ شنگالێ خۆ رادەستی وان بکەن، بەلێ ب خۆراگری ئەوان بەرگری ژ هەبوونا خۆ کریە، لەوا چەند کەسێن نەفام و دویر ژ کەتوارێ جڤاكا ئێزدی و شنگالی دخوازن ب ئاسانی خۆ رادەستی هزرو بیرێن کەسانێن نەژادپەرێس و نەیارێن گەلێ کوردستانێ بکەن و شنگالێ رادەستی نەحەزێن وێ بکەن.
هەر ژبەر ئەڤێ چەندێ ئەم داخوازێ ژ ئەوان کەسێن نوو بووینە شاگردەیێن سیاسەتێ، گەل و نەتەوەیا خۆ یا رەسن ژ بیرنەکەن و نەفرۆشنە دوژمنی و بلەز ل خۆ ڤەگەڕن و هەولبدەن ل گەل کەسێن دلسۆز و خەمخۆرێن شنگال و کوردستانێ کار ژ بۆ شنگالەکا ئارام د چارچووڤەیێ کوردستانەکا ئازاد دا بکەن.
