کۆمسیون دێ تیمێن گەرۆک بۆ تۆمارکرنا وەلاتیان پێک ئینیت
ئەڤرۆ نيوز:
رێڤەبەرێ گشتیێ ئۆفیسا دھۆک یێ کۆمسیۆنا بلندا سەربخوە یا ھەلبژارتنان بۆ ئەڤرۆ دیار کر کو ھەتا نوکە د پرۆسێسا تۆمارکرنا ئەلکترۆنی (بارۆمەتری) یا گشتی دا ٢٩ ھزار و ٦١٥ وەلاتی ھاتینە تۆمارکرن و گۆت: “ئەم دخوازین وەلاتیێن ١٨ سالی و د سەردا بھێنە ھاندان کو بھێن خوە تۆماربکەن”.
یوسف سەلمان بەرواری، رێڤەبەرێ گشتیێ ئۆفیسا دھۆک یێ کۆمسیۆنا بلندا سەربخوە یا ھەلبژارتنان ئاشکرا کر، وان بەرنامەک د گەل زانکۆ یا دھۆک دارێژتی یە کو ل دەستپێکا سالا خواندنێ ھەموو مامۆستا و قوتابی بھێنە تۆمارکرن و گۆت: “د دەمێ بھێت دا مە ھەمان بەرنامە دێ د گەل ھەموو زانکۆیێن دیژی ھەبیت، ھەروەسا ب رێیا دەزگەھێن راگەھاندنێ، زانایێن ئایینی، قەوارێن سیاسی و رێکخراوێن جڤاکێ مەدەنی ھەموو بزاڤ دێ ھێنە کرن، وەلاتی بھێنە ھاندان پشکداریەکا بەرفرەە د پرۆسا تۆمارکرنا ئەلکترۆنی دا بکەن”.
ناڤھاتی ئاماژە ب وێ چەندێ ژی کر، ژ بلی بنگەھان کۆمسیۆن دێ تیمێن گەرۆک پێکئینیت و دێ سەرەدانا فەرمانگەە، زانکۆ، کۆمەلگەە و ھەر جھەکێ دی یێ پێدڤی کەن بۆ تۆمارکرنا وەلاتیان، دیسا داخوازێ ژ قەوارێن سیاسی کر، جەماوەرێ خوە ھان بدەن کو خوە تۆمار بکەن و ھەڤکاریا وان بکەن بۆ سەرخستنا ڤێ پرۆسێ.
یوسف سەلمان بەرواری خویا کر، ئەڤ پرۆسێسە بۆ ھەلبژارتنێن بھێن گەلەکا گرنگە و ھەر وەلاتەیەکێ ژییێ وی د سەر ١٨ سالیێ دا دڤێت خوە تۆمار بکەت و گۆت: “ئارمانجا مە ژ تۆمارکرنا ئەلکترۆنی ئەوە، تۆمارەکا ئەلکترۆنی یا ب رێکوپێک بۆ دەنگدەران بھێتە دروستکرن و ببیتە شەنگستە بۆ دەنگدانا ئەلکترۆنی د پاشەرۆژێ دا”.
ل ٢٦-٧-٢٠١٥ تۆمارکرنا ئەلکترۆنی یا گشتی ل سنوورێ پارێزوگەھا دھۆکێ دەستپێکر و ١٤ بنگەە بۆ تۆمارکرنا وەلاتیان ھاتینە ڤەکرن.
