گرانبوونا پانزینێ یا دەمكـی یە و كێشەیا غازێ بەر ب چارەسەریـێ دچیت
دهۆك، دلۆڤان ئاكرەیی:
رێڤەبەرێ نەفت و كانزایان ل پارێزگەها دهۆكێ دیاركر، د دو سێ رۆژێن بۆری دا بهایێ پانزینێ گرانبوویە، بەلێ ئەڤ رەوشە یا دەمكی یە و ل دووڤ زانیاریان د چەند رۆژێن بهێن دا دێ چارەسەربیت و بهایێ وێ دێ ئاسایی بیتەڤە.
كارزان رەئووف، رێڤەبەرێ نەفت و كانزایان ل پارێزگەها دهۆكێ بۆ رۆژنامەیا ئەڤرۆ گۆت: «ئەگەرێ سەرەكی یێ گرانبوونا بهایێ پانزینێ بۆ كێمبوونا پەترۆلا خاڤ ل ژێدەرێ سەرەكی ڤە دگەریت و چو گوهۆڕین ب سەر دابینكرن و بهایێ پانزینا حكومی دا نەهاتینە، وەزارەتا سامانێن سروشتی یا حكومەتا هەرێما كوردستانێ رۆژانە نێزیكی 330 هزار لێتران بۆ پارێزگەها دهۆكێ و ئیدارا سەربخۆ یا زاخۆ دابین دكەت، ئەڤ رێژەیە لسەر 9 پانزینخانەیان دا ل سەرانسەری پارێزگەها دهۆكێ دهێتە بەلاڤكرن».
گۆت ژی: «ب بەردەوامی تیمێن پشكنینێ یێن سەر ب لژنەیێن ئاسایش و دەڤەرداریان ڤە دووڤچوون و چاڤدێریا پانزینخانەیان دكەن و هەر پانزینخانەكا كوالیتیا پانزینا وێ (ب تایبەت یا نۆرمال) ل دووڤ ستاندەرد و رێنجێ دیاركری نەبیت، رێكارێن یاسایی بەرامبەر دێ هێنە وەرگرتن و دێ هێتە سزادان».
ل دۆر رەوشا غازا مالان، كارزان گۆت: «چەند رۆژەكە رێژە و ئاستێ دابینكرنا غازێ بەر ب ئاسایی بوونێ و باشتربوونێ چوویە، د سێ مەهێن بۆری دا كێشەیەك د دابینكرنێ دا هەبوو، لێ د رۆژێن بۆری دا ئەو ژی چارە بوو، ئەڤ رێژەیا هاتیە دابینكرن، هێشتا نەگەهشتیە ئاستێ پێدڤیا تەمام، لێ د نوكە دا چارەسەری گەهشتیە پتر ژ 80% و دهێتە پێشبینیكرن، هەتا دوماهیا ڤێ حەفتیێ كێشەیا كێمییا غازا مالان ب تەمامی چارەسەر ببیت و رەوش ب تەمامی ئاسایی ببیت».
